رەسپۋبليكالىق كوميسسيا انىقتاعان تىڭ دەرەكتەر
بۇگىن وسكەمەندەگى ايماقتىق كوممۋنيكاتسيالار قىزمەتىندە ءۇرجار اۋدانىنىڭ شولپان اۋىلىندا ورىن العان جاعدايعا بايلانىستى بريفينگ ءوتتى. بريفينگكە وبلىس اكىمىنىڭ ورىنباسارى اسەم ءنۇسىپوۆا, وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ, وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى عازيز سۇلەيمەنوۆ پەن ونىڭ ورىنباسارى نۇرلانعازى يبراەۆ قاتىسىپ, اتالعان اۋىلدا تەكسەرۋ جۇرگىزىپ, ءمان-جايدى انىقتاعان رەسپۋبليكالىق كوميسسيانىڭ اتقارعان جۇمىستارى, ەلدى مەكەندەگى قازىرگى احۋال جايىندا تۇسىنىكتەمە بەردى.
بريفينگتە ەڭ الدىمەن ءسوز العان اسەم ءنۇسىپوۆا اتالعان كوميسسيا قۇرامىندا دەنساۋلىق ساقتاۋ مينيسترلىگىنىڭ بىلىكتى ساراپشىلارى, ناقتىلاپ ايتقاندا, قوعامدىق دەنساۋلىق ساقتاۋ كوميتەتىنىڭ باسقارما باسشىسى روزا قوجاپوۆا, ينفەكتسيالىق جانە پارازيتتىك اۋرۋلاردى ەپيدەميولوگيالىق مونيتورينگىلەۋ دەپارتامەنتىنىڭ ديرەكتورى مانار سماعۇل, الماتىداعى س.اسفەندياروۆ اتىنداعى ۇلتتىق مەديتسينا ۋنيۆەرسيتەتىنىڭ بالالار جۇقپالى اۋرۋلارى كافەدراسىنىڭ دوتسەنتى مارينا گولوۆەنكو جۇمىس ىستەگەنىن, سونىمەن قاتار وبلىستىق دەنساۋلىق ساقتاۋ باسقارماسى تاراپىنان دا ارنايى كوميسسيا قۇرىلعانىن, وعان باسقارما باسشىسىنىڭ ورىنباسارى رايفا سافيوللينوۆا جەتەكشىلىك ەتكەنىن اتاپ ءوتتى. بۇدان كەيىن ءسوز سويلەگەن وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ رەسپۋبليكالىق كوميسسيانىڭ جۇمىسىنا جان-جاقتى توقتالىپ, ءۇرجار اۋداندىق ورتالىق اۋرۋحاناسىنىڭ باس دارىگەرى ج.تىلەۋبەرليننىڭ باق وكىلدەرىنە بالالاردىڭ ا گەپاتيتى جۇقپاسىن جۇقتىرۋىنا قاتىستى قاتە اقپارات بەرگەنىن, اتالعان كوميسسيا سارى اۋرۋ دياگنوزى قويىلعان 12 بالادان بولەك تاعى دا 19 ادامنىڭ مەديتسينالىق كومەككە جۇگىنگەنىن انىقتاعانىن ايتتى. «الايدا اۋداندىق اۋرۋحانا باسشىلىعىنىڭ ەپيدەميولوگيالىق جاعدايعا نەمقۇرايلى قاراۋىنان اۋداننىڭ قوعامدىق دەنساۋلىق ساقتاۋ باسقارماسىنا امبۋلاتوريا باسشىلىعى مالىمەتتى ۋاقىتىندا بەرمەگەن. سونىڭ سالدارىنان ا گەپاتيتىنىڭ جەڭىل تۇرىمەن اۋىرعان 19 ناۋقاس رەسمي ستاتيستيكاعا ەڭگىزىلمەي قالعان. ولاردىڭ بارلىعى دەر كەزىندە امبۋلاتوريالىق دەڭگەيدە ەمدەۋدەن وتكەن. قازىرگى ۋاقىتتا ولاردىڭ دەنساۋلىعى قالىپتى جانە جانىنداعى ادامدارعا قاۋىپ توندىرمەيدى. جالپى, تەكسەرۋ ناتيجەسىندە اۋداندىق ورتالىق اۋرۋحانا باسشىلىعىنىڭ ورەسكەل زاڭ بۇزۋشىلىقتارعا جول بەرگەنى, تۇرعىندارعا مەديتسينالىق كومەك كورسەتۋ مەن ونىڭ ساپاسىن قاداعالاۋ جۇمىستارى, تىركەۋگە الۋ-ەسەپ بەرۋ قۇجاتتارى دۇرىس جۇرگىزىلمەگەنى, سانيتارلىق تالاپ ەرەجەلەرىنىڭ ورىندالماعانى, دياگنوستيكا جاساۋ مەن ەمدەۋ پروتوكولى ساقتالماعانى انىقتالدى. انىقتالعان زاڭ بۇزۋشىلىقتار بويىنشا الداعى ۋاقىتتا ءۇرجار اۋداندىق ورتالىق اۋرۋحاناسىنداعى جاۋاپتى تۇلعالارعا قىزمەتتىك تەكسەرۋ جۇرگىزىلىپ, ءتيىستى شارا قولدانىلاتىن بولادى», - دەدى باسقارما باسشىسى. سونىمەن قاتار م.شورانوۆ كوميسسياعا شولپان اۋىلىنىڭ تۇرعىندارى تاراپىنان كامەلەتتىك جاسقا تولماعان بالانى ءۇرجار اۋداندىق ورتالىق اۋرۋحاناسىنا جەتكىزۋ ءۇشىن جانە ءدارى-دارمەك الۋ ءۇشىن اتا-اناسىنىڭ اقشا تولەگەنى جايىندا شاعىم تۇسكەنىن تىلگە تيەك ەتتى.
رەسپۋبليكالىق كوميسسياعا جەتەكشىلىك ەتكەن وبلىستىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى نۇرلانعازى يبراەۆ ماماندار شولپان اۋىلىندا قايتىس بولعان بالا گەپاتيتتىڭ ا تۇرىنەن ەمەس, فۋلمينانتتى, ياعني باسقا اۋىر ءتۇرى مەن وتكىر باۋىر نەكروزىنان كوز جۇمۋى مۇمكىن دەپ بولجام جاساپ وتىرعانىن, الايدا كەسىمدى بايلام تەرگەۋ امالدارىنىڭ قورىتىندىسىنان كەيىن جاريالاناتىنىن جەتكىزدى. شولپان اۋىلىنىڭ تۇرعىندارى رەسپۋبليكالىق كوميسسياعا ا گەپاتيتىمەن سىرقاتتانعان ادامداردىڭ مەديتسينالىق جانە امبۋلاتورلىق قۇجاتتارىنداعى جازبالاردىڭ وزگەرتىلگەنى تۋرالى دا شاعىم جاساعان بولاتىن. نۇرلانعازى يبراەۆ بۇل ماسەلەنىڭ جانە اۋداندىق اۋرۋحاناداعى ورىن العان ولقىلىقتاردىڭ انىق-قانىعىنا كوز جەتكىزۋ ءۇشىن قوسىمشا كوميسسيا قۇرىلاتىنىن مالىمدەدى.
بريفينگتەن كەيىن شولپان اۋىلىندا قايتىس بولعان قىز بالانىڭ اناسى ينديرا جانىبەكوۆامەن تەلەفون ارقىلى سويلەستىك. ء«ىستىڭ انىق-قانىعىنا كوز جەتكىزۋ ءۇشىن ارنايى رەسپۋبليكالىق كوميسسيا قۇرىلعانى دۇرىس بولدى دەپ ويلايمىن. باستاماسى جامان ەمەس سەكىلدى. ءبىراز ولقىلىقتاردى انىقتادى. بۇل كىسىلەر سوناۋ استانادان بىرەۋدى قورعايىن دەپ ەمەس, ءىستىڭ اق-قاراسىن اجىراتىپ, باردى بار, جوقتى جوق دەپ ايتۋعا كەلدى دەپ ەسەپتەيمىن. مۇنداي كوميسسيا قۇرىلماسا كەيبىر ولقىلىقتار جابۋلى قازان جابۋلى كۇيى قالار ما ەدى, كىم ءبىلسىن؟! قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشىننىڭ ءوزى ىسكە ارالاسىپ, باق وكىلدەرىنە سۇحبات بەرىپ, ءمان-جايدى ءتۇسىندىرىپ جاتىر. مەنىڭ بالام گەپاتيتتىڭ باسقا تۇرىنەن قايتىس بولدى دەگەن بولجامدارىن دا ايتىپ جاتىر. الايدا مەنىڭ قولىما ازىرگە ەشقانداي قۇجات تيگەن جوق. سوندىقتان قوزعالعان قىلمىستىق ءىستىڭ قورىتىندىسىن كۇتەمىز», - دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى.