قازاق مەملەكەتتىك قىزدار پەداگوگيكالىق ۋنيۆەرسيتەتىنە تۇركيانىڭ نيدە ومەر حاليسدەمير ۋنيۆەرسيتەتىنىڭ رەكتورى مۋحسين كارمەن باستاعان دەلەگاتسيا كەلدى. بۇل تۋرالى قىزدار ۋنيۆەرسيتەتىنىڭ ءباسپاسوز ورتالىعى حابارلادى.
ارنايى ساپار اياسىندا ۇيىمداستىرىلعان باسقوسۋدا قوس جوعارى وقۋ ورنى اراسىنداعى ىنتىماقتاستىق جايى كەڭىنەن ءسوز بولدى.
جيىندى اشقان قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا ءبىلىم وردالارىنىڭ ورتاق ۇقساستىعى مەن الەۋەتى تۋراسىندا ءسوز قوزعاپ, اكادەميالىق ۇتقىرلىق باعدارلاماسى اياسىندا مۇعالىمدەر مەن ستۋدەنتتەر الماسۋ قاجەتتىگىن اتاپ ءوتتى. سونىمەن قاتار, كەزدەسۋدە تاراپتار عىلىمي-مادەني قارىم-قاتىناستاردى نىعايتۋعا باعىتتالعان ءوزارا ءتيىمدى ەكىجاقتى دامىتۋ ماسەلەلەرىن تالقىلادى.
باسقوسۋدىڭ ەكىنشى بولىمىندە ۋنيۆەرسيتەت رەكتورلارى ءوزارا ىنتىماقتاستىق تۋرالى مەموراندۋمعا قول قويدى. قۇجات جوعارى جانە جوعارى وقۋ ورنىنان كەيىنگى ءبىلىم, عىلىم مەن مادەنيەت, عىلىمي-زەرتتەۋ سالاسى اياسىنداعى ىنتىماقتاستىقتى دامىتۋدى قاراستىرادى.
– الدىنا قازىرگى زامان تالابىنا تولىق جاۋاپ بەرە الاتىن پەداگوگ كادرلاردى دايارلاۋدى ماقسات ەتىپ قويعان قازاق مەملەكەتتىك قىزدار پەداگوگيكالىق ۋنيۆەرسيتەتى ءوزىنىڭ بۇل ورايداعى قىزمەتىن, نەگىزىنەن, پرەزيدەنتتىڭ 2016 جىلى 1 ناۋرىزدا قابىلدانعان «2016-2019 جىلدارعا ارنالعان قر ءبىلىم جانە عىلىمدى دامىتۋ جونىندەگى» مەملەكەتتىك باعدارلاماسى اياسىندا جۇرگىزەدى. ۋنيۆەرسيتەت 6 فاكۋلتەتتىڭ 28 كافەدراسىندا باكالاۆر بويىنشا – 42, ماگيستراتۋرا بويىنشا – 23 جانە PhD دوكتورانتۋرا بويىنشا 4 ماماندىق نەگىزىندە مۇعالىمدەر دايىندايدى. بۇعان قوسا, سىرتتاي وقۋ ءبولىمىنىڭ ستۋدەنتتەرى 20 ماماندىق بويىنشا قاشىقتىقتان وقىتۋ تەحنولوگياسىن پايدالانىپ, ءبىلىم الىپ ءجۇر. ولارعا 54 عىلىم دوكتورى, 200-گە جۋىق عىلىم كانديداتى ءدارىس بەرەدى. قازىرگى تاڭدا قىزدار ۋنيۆەرسيتەتى الەم ەلدەرىنىڭ 20-دان استام جوعارى وقۋ ورنىمەن ىنتىماقتاستىق ورناتقان. ولاردىڭ قاتارىندا اقش, ءۇندىستان, فرانتسيا, قىتاي, گەرمانيا سىندى مەملەكەتتەردىڭ بەدەلدى ۋنيۆەرسيتەتتەرى بار, – دەدى ءوز سوزىندە گاۋحار الدامبەرگەنوۆا.
ال, مۋحسين كارمەن ءوزى باسقاراتىن جوعارى وقۋ ورنى تۋرالى اڭگىمەلەپ, ارىپتەستىك ورناتۋعا نيەتتى ەكەندىگىن جەتكىزدى.
– نيدە ومەر حاليسدەمير ۋنيۆەرسيتەتى تۇركيانىڭ ىرگەلى جوعارى وقۋ ورىندارىنىڭ ءبىرى. ءبىلىم ورداسىنىڭ اتاۋى 2016 جىلعى شىلدە ايىندا تۇركيادا ورىن العان اسكەري توڭكەرىس كەزىندە قاستاندىقپەن ولتىرىلگەن سەرجانتتىڭ ەسىمىنىڭ قۇرمەتىنە بەرىلگەن. ۋنيۆەرسيتەت قالاشىعى نيدە قالاسىنان 6 شاقىرىم قاشىقتىقتا ورنالاسقان. اشىلعانىنا 26 جىل بولعان وقۋ ورنى وسى جىلدار ارالىعىندا رەسپۋبليكامىزدىڭ ءبىلىم بەرۋ جۇيەسى ءۇشىن جوعارى بىلىكتى پەداگوگ كادرلار, ەكونوميستەر, ارحيتەكتورلار, اۋىل شارۋاشىلىعى سالاسىنىڭ ماماندارىن, ينجەنەرلەر مەن عىلىمي قىزمەتكەرلەر دايارلاپ كەلەدى. ۋنيۆەرسيتەت تۇلەكتەرىنىڭ قاتارىندا ەلىمىزدىڭ بارلىق سالاسىندا ەسەلى ەڭبەك ەتىپ كەلە جاتقان كوپتەگەن ازاماتتار بار. بۇگىندە وقۋ ورنىنداعى 6 فاكۋلتەت, 2 ينستيتۋت, 2 كوللەدج جانە 6 كاسىبي كوللەدج 30-دان استام ماماندىق بويىنشا ءبىلىم بەرەدى. قازىرگى كۇندە ۋنيۆەرسيتەتتە 25 مىڭنان استام ستۋدەنت وقۋدا, ولارعا 1000-نان استام پروفەسسور-وقىتۋشىلار ءدارىس بەرەدى. قالاشىق ورنالاسقان اۋماقتاعى وقۋ كورپۋستارى, جاتاقحانا مەن مادەنيەت ورتالىعى, سپورت الاڭدارى, باسسەين, سپورتتىق-ساۋىقتىرۋ كەشەنى, اقپاراتتىق-تەحنولوگيالار ورتالىعى, وقۋ زەرتحانالارى, مامانداندىرىلعان ءپان كابينەتتەرى, زاماناۋي قۇرال-جابدىقتارمەن قامتاماسىز ەتىلگەن كومپيۋتەر كلاستارى, كىتاپحانا ستۋدەنتتەردىڭ ساپالى ءبىلىم الۋىنا قىزمەت كورسەتەدى, – دەپ اتاپ ءوتتى مۋحسين كارمەن.
جيىن بارىسىندا قىزدار ۋنيۆەرسيتەتىنىڭ فاكۋلتەت دەكاندارى دا ءوزارا ىنتاماقتاستىقتى ارتتىرۋ تۋراسىندا ءسوز قوزعاپ, كوكەيلەرىندە جۇرگەن ساۋالدارىن قويدى.
ساپار اياسىندا تۇركيالىق جوعارى وقۋ ورنىنىڭ وكىلدەرى ۋنيۆەرسيتەت مۋزەيىندە جانە لاتىن ءالىپبيىن ۇيرەتۋ ورتالىعىندا بولدى. جۋىردا اشىلعان ورتالىقتا وقۋ ورنىنىڭ پروفەسسور-وقىتۋشىلارى مەن ستۋدەنتتەرى لاتىن گرافيكاسى نەگىزىندەگى جاڭا قازاق ءالىپبيى بويىنشا وقىپ, جازۋدى مەڭگەرەدى.