ەلىمىزدىڭ بىرقاتار ايماعىندا كارىنە مىنگەن ساقىلداعان سارى اياز جولاۋشىلاردى دا از اۋرەگە سالىپ جاتقان جوق. كەشە ءوڭىردىڭ قۇتقارۋشىلارى مەن پوليتسيا قىزمەتكەرلەرى «الماتى - اياگوز» تاس جولىندا تۇرىپ قالعان اۆتوبۋستىڭ جولاۋشىلارىنا كومەك قولىن سوزدى.
وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ تاراتقان مالىمەتتەرىنە سۇيەنسەك, الماتىدان شىعىپ, زايساندى بەتكە العان اۆتوبۋس اياگوزگە 40 شاقىرىم قالعاندا ىستەن شىعىپ, توقتاعان ەكەن.
«ساعات 10 شاماسىندا اۋداندىق ىشكى ىستەر ءبولىمى كەزەكشىسىنەن جولدا 27 جولاۋشى جانە 2 جۇرگىزۋشى مىنگەن اۆتوبۋستىڭ بۇزىلىپ, جولدا قالعانى تۋرالى قوڭىراۋ ءتۇستى. جەرگىلىكتى اتقارۋشى ورگاندارمەن بىرلەسە وتىرىپ اۆتوبۋستاعى جولاۋشىلارعا ارنايى ورىن دايىندادىق. ءبىز بارعانشا سول ماڭدا كەتىپ بارا جاتقان اۆتوبۋس جولاۋشىلاردى جاقىن جەردەگى ءدامحانالاردىڭ بىرىنە جەتكىزىپ سالىپتى. ەكى جۇرگىزۋشىنى ءاىب قىزمەتكەرلەرى الىپ كەلدى. اۆتوبۋستاعى جولاۋشىلاردىڭ بارلىعى - زايساندىقتار. زارداپ شەككەن ەشكىم جوق. ءتۇن ورتاسىندا جولاۋشىلار جەرگىلىكتى قۇتقارۋشىلاردىڭ كۇشىمەن اياگوز قالاسىنا جەتكىزىلىپ, سپورت مەكتەبىنىڭ عيماراتىنا ورنالاستىرىلدى»,-دەيدى اياگوز اۋداندىق تج ءبولىمىنىڭ باس ينجەنەرى دارحان نۇعامەتوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى