جازىلعان جايدىڭ جالعاسى: ولگينكاداعى اعايىنداردىڭ الاڭداۋىنا نەگىز جوق

تاياۋدا وبلىس اكىمى بولات باقاۋوۆ ولگينكا اۋىلىنداعى قىتايدان كەلگەن اعايىندارعا جولىعىپ, ولاردىڭ ءوتىنىش-تىلەكتەرىن ءوز اۋىزدارىنان تىڭداپ قايتتى. ءوڭىر باسشىسىمەن كەزدەسۋدەن كوڭىلدەرىندە ءبىر قۋانىش ەسكەننىڭ اسەرى بولار, ونداعى قانداستارىمىز بىزگە حابارلاسىپ, العىس ايتتى. جالپى, وبلىس باسشىلىعى تەرىسكەيدىڭ ءتوسىن تولتىرۋعا باعىت العان باۋىرلاردىڭ بارلىعىنىڭ جاعدايىمەن تانىسۋعا ق ۇلىقتى ەكەنىن جەتكىزگەن بولاتىن كەلەلى جيىندا. ال ولگينكاعا بارعان ءوڭىر باسشىسى ءبىزدىڭ كەيىپكەرىمىز ادال حاميتحان اعامىزبەن دە كەزدەسكەن ەكەن. ول قىتايدان ولگينكاعا دەيىنگى 1,5 مىڭ شاقىرىم جەردى ءوزىنىڭ تراكتورىمەن ءجۇرىپ كەلگەن بولاتىن. اۋىلدان 2 ميلليون تەڭگەگە ءۇي ساتىپ الىپ, 7 ميلليون تەڭگەگە جەكە شارۋاشىلىعىن اشىپتى. قازىر باسقا دا قونىس اۋدارۋشىلار كۆوتا الۋ ماقساتىندا قۇجاتتارىن رەسىمدەۋدە.

مەملەكەت باسشىسى دا جۋىردا باق وكىلدەرىمەن كەزدەسۋدە « ۇلى كوشتى باستادىق. سودان بەرى ءبىر ميلليون قانداسىمىز كەلدى. ولاردان ءوسىپ جاتقان ۇرپاقتار ودان دا كوپ. ۇلى كوش توقتاعان جوق. ەشقاشان دا توقتاتپايمىز, ەشكىمگە قارسىلىعىمىز جوق. كەلەم دەگەندەرگە ەسىك اشىق», دەدى. شەتەلدە ءالى 4 ميلليوننان استام قانداسىمىز بار ەكەنىن ايتقان ەلباسى ولاردى دا جىلى كوڭىلمەن قابىلداۋىمىز كەرەكتىگىن ايتىپ ءوتتى. «ول جاقتا جاعدايلارى جاقسى, قيىنشىلىق كورمەسە, تۇرا بەرسىن. كەلەم دەگەندەرگە كەل دەيمىز. ءبىزدىڭ قالتالى ازاماتتارعا ايتارىم, قانداستىرىمىزدى قابىلداۋعا جاقىن بولۋىمىز قاجەت. قازىر ارنايى قور قۇرىلدى. سول قورعا قول ۇشىن بەرۋىمىز كەرەك.

جۇمىسقا ورنالاسۋعا, باسپانا سالۋعا از دا بولسا كومەك بەرۋىمىز كەرەك. كۆوتانى كوبەيتىپ جاتىرمىز. سوندىقتان جۋرناليستەر دە وسى ماسەلەنى ايتىپ وتىرسا, قيىنشىلىق بولسا, ءبارىمىز كومەكتەسىپ وتىرساق, بارلىق قانداستارىمىزعا جاقسىلىق جاساعانىمىز بولىپ سانالادى», دەپ اتاپ كورسەتكەن ەدى ەلباسى. «ەلگە ەل قوسىلسا – قۇت». ولگينكا ىسپەتتى بار اۋىلىمىزدا ورتا تولسىن, ەل قونسىن!

فاريدا بىقاي, «ەگەمەن قازاقستان»

پاۆلودار وبلىسى, ۋسپەن اۋدانى