وڭتۇستىكتەن اكەلىنگەن جەمىستەر اتىراۋداعى «سارايشىق» كوممۋنالدىق بازارىندا ارزان باعامەن ساتىلۋدا دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
وڭتۇستىك قازاقستان وبلىسىندا وسىرىلگەن 18 توننا المانىڭ العاشقى توپتاماسى «سارايشىق» بازارىنا 20 قاڭتاردا ساۋداعا شىعارىلدى. جەتكىزۋشىلەر قالالىق اكىمدىكپەن كەلىسىمشارتقا وتىرىپ, جەمىستەرگە نارىق قۇنىنان تومەن باعا بەكىتكەن.
- «DALA-FRUIT» كومپانياسىنىڭ باسشىلىعى تۇرعىنداردىڭ وتاندىق اۋىل شارۋاشىلىعى ونىمدەرىنە دەگەن سۇرانىسى مەن قىزىعۋشىلىعىن ارتتىرۋ ماقساتىندا قالالىق اكىمدىككە ءوتىنىش ءبىلدىردى. قازىر اتىراۋعا بىرىنشى سۇرىپتى المانىڭ ءۇش ءتۇرى اكەلىندى, ولار بازار نارقىنان 15-20 پايىزعا ارزانعا ساتىلادى, - دەيدى قالالىق كاسىپكەرلىك جانە تۋريزم ءبولىمىنىڭ باسشىسى رۋسلان داۋلەتوۆ.
كومپانيا مۇنايلى وڭىرگە 18 توننا الما اكەلگەن. كوممۋنالدىق بازاردا وڭتۇستىكتەن كەلگەن المالاردىڭ ءبىر كيلوگرامى 230 تەڭگەدەن ساتىلۋدا. نەگىزى المانىڭ ورتاشا باعاسى – 400 تەڭگە. ساتىلىمنىڭ العاشقى كۇنىنەن باستاپ تۇرعىنداردىڭ وتاندىق ونىمگە دەگەن سۇرانىسى جوعارى ەكەنى بايقالدى. جارتى كۇننىڭ ىشىندە ءبىر تونناعا جۋىق الما ساتىلعان.
ەگەر ءونىمنىڭ ساپاسى مەن باعاسى تۇرعىنداردىڭ كوڭىلدەرىنەن شىقسا, اتىراۋدا العاشقى الما باعى بولۋى ابدەن مۇمكىن. كومپانيا وكىلدەرى المانى اتىراۋدا دا وسىرۋگە نيەتتى. وبلىستىق اكىمدىكتەن حابارلاعانداي, بيزنەسمەندەرگە مەملەكەتتىك قولداۋ شارالارى كورسەتىلەدى.