قۇرامىندا شاعىن جانە ورتا بيزنەس سالاسىنىڭ, مەملەكەتتىك ورگانداردىڭ, ۇلتتىق كومپانيالاردىڭ, قارجى ينستيتۋتتارىنىڭ, وقۋ ورىندارىنىڭ وكىلدەرى بار دەلەگاتسيا مۇشەلەرى بىرىككەن اراب امىرلىكتەرىندە بولىپ, كەزدەسۋلەر وتكىزدى.
وبلىس اكىمىنىڭ ءباسپاسوز قىزمەتى بەرگەن اقپاراتتار بويىنشا توپ جەتەكشىسى, ايماق باسشىسى قۇمار اقساقالوۆ فۋدجەيرانىڭ بيلەۋشىسى شەيح حاماد بەن مۇحاممەد Əل شاركيمەن كەزدەسىپ, قوس تاراپ ءتۇرلى سالادا تىعىز ارىپتەستىك بايلانىستار ورناتۋعا ۋاعدالاسقان. ونىڭ ىشىندە ونەركاسىپ, يننوۆاتسيالىق قىزمەت, ءداندى داقىلدار ەكسپورتى مەن تاسىمالدانۋى, مال شارۋاشىلىعى, تۋريزم جوبالارىن جۇزەگە اسىرۋ جانە كولىكتىك-لوگيستيكالىق بىرلەسكەن توراپ قۇرۋ سەكىلدى كەلىسىمدەر بار.
تەرىسكەيلىك دەلەگاتسيا مۇشەلەرى بيزنەس-فورۋمنىڭ جۇمىسىنا قاتىسىپ, ىرگەلى ەكونوميكالىق قارىم-قاتىناستى نىعايتۋ, اۋقىمدى جوبالارعا قارجى تارتۋ, ساۋدا-كاسىپكەرلىك پالاتالارى, “سولتۇستىك” الەۋمەتتىك-كاسىپكەرلىك كورپوراتسياسى مەن “Fujairah National Group” كومپانياسى, سولتۇستىك قازاقستان مەملەكەتتىك جانە فۋدجەيرا ۋنيۆەرسيتەتتەرى ارالارىندا ىنتىماقتاستىق تۋرالى مەموراندۋمدار قابىلداندى.
بيزنەس-فورۋمدا ءسوز سويلەگەن قۇمار ىرگەباي ۇلى وبلىسىمىز بەن امىرلىكتىڭ ىسكەر توپتار وكىلدەرىنىڭ كەلىسسوزدەرى ءوزارا ءتيىمدى ارىپتەستىككە نەگىز قالايتىندىعىن اتاپ ءوتتى.
فۋدجەيرا – بىرىككەن اراب امىرلىگىنىڭ شىعىس بولىگىندەگى ومان شىعاناعىن تولىق الىپ جاتقان ءىرى امىرلىك. مۇندا بالىق, اۋىل شارۋاشىلىعى, ونەركاسىپ جاقسى دامىعان.
ءومىر ەسقالي, «ەگەمەن قازاقستان»