بۇگىن قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا قۇقىق قورعاۋ قىزمەتىن, اتقارۋشىلىق ءىس جۇرگىزۋ مەن سوت ساراپتاماسىنىڭ مالىمەتتەرىن تسيفرلاندىرۋ بارىسى قارالدى. بۇل تۋرالى primeminister.kz حابارلادى.
باس پروكۋروردىڭ ورىنباسارى مارات احمەتجانوۆ «تسيفرلىق قازاقستان» مەملەكەتتىك باعدارلاماسى اياسىندا ەلەكتروندىق قىلمىستىق ءىس, اكىمشىلىك وندىرىستەردىڭ بىرىڭعاي ءتىزىمى, تەكسەرۋ وبەكتىلەرى مەن سۋبەكتىلەرىنىڭ بىرىڭعاي ءتىزىمى, تالداۋ ورتالىعى, ازاماتتاردىڭ ەلەكتروندىق وتىنىمدەرى سەكىلدى بەس قۇرامداس بولىكتەن تۇراتىن «ەلەكتروندىق ءىس» جوباسى جۇزەگە اسىرىلىپ جاتقانىن اتاپ ءوتتى. مالىمدەلگەن دەرەكتەرگە سايكەس, جوبانى ىسكە اسىرۋ مەرزىمى — 2021 جىلدىڭ جەلتوقسان ايىنا دەيىن جالعاسادى.
ىشكى ىستەر ءمينيسترى قالمۇحانبەت قاسىموۆ ءوز سوزىندە قازىرگى تاڭدا ىشكى ىستەر ورگاندارىندا, سونىڭ ىشىندە جول پوليتسياسى, كوشى-قون قىزمەتى, قىلمىستىق-اتقارۋ جۇيەسى جانە جەدەل-كريميناليستيكالىق قىزمەت سالاسىندا 19 اقپاراتتىق جۇيە بار ەكەنىن حابارلادى.
«تسيفرلىق قازاقستان» مەملەكەتتىك باعدارلاماسى اياسىندا ءىىم-ءنىڭ ءۇش ينۆەستيتسيالىق جوباسىن — «پوليتسيانىڭ ۋچاسكەلىك ينسپەكتورى», «تەرگەۋشى» ااج جانە «شاعىن قالالاردىڭ جەدەل باسقارۋ ورتالىقتارىن قۇرۋ» اقپاراتتىق دەرەكقورىن جۇزەگە اسىرۋ كوزدەلگەن.
ادىلەت ءمينيسترى مارات بەكەتاەۆ «قازپوشتا» اق-مەن بىرلەسىپ, بورىشكەرگە مەملەكەتتىك شەكارا جانە قالالار مەن وبلىستاردىڭ قوعامدىق ورىندارىندا كاسسالىق قىزمەت كورسەتۋ پۋنكتەرى مەن تەرمينالدار ارقىلى قارىزدارىن تولەۋ مۇمكىندىگىن بەرۋ ماقساتىندا ءتيىستى قىزمەتتەر ازىرلەندى.
ماسەلەن, 2017 جىلدىڭ ماۋسىم ايىندا استانا, الماتى, اقتاۋ, قاراعاندى, شىمكەنت, اتىراۋ, قىزىلوردا جانە وسكەمەن قالالارىنىڭ اۋەجايلارىندا «قازپوشتا» تەرمينالدارى ارقىلى بەرەشەكتى وتەۋ قىزمەتى ەنگىزىلدى. جاقىن ارادا قازاقستاننىڭ حالىقارالىق قاتىناستاعى بارلىق اۋەجايلارىن جانە «قورعاس», «قورداي», «جاڭاجول», «جىبەك جولى» جانە ت. ب. سەكىلدى ءىرى شەكارالىق وتكىزۋ پۋنكتتەرىن قامتاماسىز ەتۋ جوسپاردا بار.
2017 جىلى قارىزدى تولەۋ ءۇشىن IOS جانە Android بازاسىندا قوسىمشالار ىسكە قوسىلدى. «قازپوشتا» اق قارجىلىق قۇرالدارى ارقىلى ىسكە قوسىلعان كەزەڭنەن باستاپ 649 بورىشكەر 34,4 ملن تەڭگە سوماسىندا قارىزدارىن تولەدى.
«تسەنتركرەديت» بانكىمەن بورىشكەرلەردىڭ ەسەپتىك شوتتارى تۋرالى, ولارعا تىيىم سالۋ/الۋ جانە اقشا قاراجاتتارىن ەسەپتەن شىعارۋ جونىندەگى سەرۆيس ەلەكتروندىق فورماتتا ىسكە قوسىلدى. بيىلعى جىلدىڭ اقپان ايىنىڭ سوڭىنا دەيىن وسىعان ۇقساس قىزمەتتەر «كاسپي بانك» پەن «قازاقستاننىڭ حالىق بانكىندە» ىسكە قوسىلادى. «قازكوم», «تۇرعىن ءۇي قۇرىلىس جيناق بانكى» جانە «ۆتب» اقپاراتتىق جۇيەلەرىندە تەستىلەۋ رەجيمىندە جۇمىستار جۇرگىزىلىپ جاتىر.
بۇدان وزگە, ادىلەت ءمينيسترى «سوت ساراپتاما ورتالىعى» قىزمەتىن اۆتوماتتاندىرۋ ماقساتىندا «زەردە» حولدينگىمەن بىرلەسىپ, «ە-ساراپتاما» اقپاراتتىق جۇيەسى ازىرلەنىپ جاتقانىن ايتتى. جۇيەنى جاساۋ قۇرىلىمدىق بولىمشەلەر جانە سوت ساراپتاما ورتالىعىنىڭ اراسىندا مالىمەت الماسۋدى قورعالعان بايلانىس ارنالارىمەن جۇرگىزۋگە مۇمكىندىك بەرەدى. جۇيەنى ىسكە قوسۋ 2018 جىلعا جوسپارلانعان. 2018 – 2020 جىلدارى «ە-ساراپتاما» جۇيەسىن مەملەكەتتىك ورگانداردىڭ وزگە دە اقپاراتتىق جۇيەلەرىمەن ينتەگراتسيالاۋ جوسپارلانعان.
سوت جۇيەسىن تسيفرلاندىرۋ تۋرالى جوعارعى سوت اپپاراتىنىڭ باسشىسى نۇرسەرىك ءشارىپوۆ باياندادى. اتالعان مالىمەتتەرگە سايكەس, بيىل 1 قاڭتاردان باستاپ قىلمىستىق ءىس جۇرگىزۋ كودەكسىنىڭ وزگەرۋىنە بايلانىستى سوتتار ىستەردى ەلەكتروندىق فورماتتا قاراۋعا كوشتى. بۇدان وزگە, 2017 جىلى ازاماتتىق ىستەر بويىنشا بۇيرىق ءوندىرىسى, اكىمشىلىك ىستەردى قابىلداۋ قىزمەتى ەلەكتروندى تۇردە ىسكە قوسىلدى.
«تسيفرلىق تەحنولوگيالارعا جاپپاي كوشۋ سىبايلاس جەمقورلىقتى ازايتىپ, ارتىق قاعاز تۇرىندەگى قۇجات اينالىمىنان ارىلتاتىنى ءسوزسىز», — دەدى ن. ءشارىپوۆ.
سونىمەن قاتار وسى ماسەلە بويىنشا اقپارات پەن كوممۋنيكاتسيالار ءمينيسترى داۋرەن اباەۆ, استانا قالاسىنىڭ اكىمى اسەت يسەكەشەۆ, الماتى قالاسىنىڭ اكىمى باۋىرجان بايبەك ءسوز سويلەدى.
پرەمەر-ءمينيستردىڭ ورىنباسارى اسقار جۇماعاليەۆ بۇگىنگى تاڭدا قۇقىق قورعاۋ ورگاندارىندا تسيفرلاندىرۋ بويىنشا ەلەۋلى جۇمىستار اتقارىلىپ جاتقانىن ايتتى.
«بۇگىن اتالىپ وتكەن جوبالار قىلمىستىق جانە اكىمشىلىك پروتسەستەردى جەڭىلدەتۋ ءۇشىن وتە ماڭىزدى ءارى ازاماتتاردىڭ قورعالۋىن ارتتىرۋ تۇرعىسىنان وزەكتى», — دەدى ا. جۇماعاليەۆ.
ماسەلەنى تالقىلاۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ اكىمدەرگە جاراقتاندىرۋ ماسەلەلەرىن دەر كەزىندە شەشۋدى تاپسىردى. باقىتجان ساعىنتاەۆ اقپاراتتىق جۇيەلەردى بىرىكتىرۋ بويىنشا جۇمىستاردى جالعاستىرۋ قاجەت ەكەنىن ايتتى.
جوعارىدا اتالعان ماسەلەلەردى ۇيلەستىرۋ جۇمىستارى قر پرەمەر-ءمينيسترىنىڭ ورىنباسارى اسقار جۇماعاليەۆكە جۇكتەلدى.