اقتوبە ايماعىندا اۋىلشارۋاشىلىق وندىرىستىك كووپەراتيۆتەرىنىڭ قىزمەتى جاڭا ساپالى كەزەڭگە اياق باستى.
ونىڭ باستى كورىنىسى – اۋىلشارۋاشىلىق ونىمدەرىن وڭدەيتىن شاعىن ءوندىرىس ورىندارىنىڭ اشىلا باستاۋى. وسىنداي ءسۇت وڭدەيتىن شاعىن تسەحتىڭ ءبىرى قوسەستەك اۋىلىندا ىسكە قوسىلدى. ونى ەركىن وتەگەنوۆ جەتەكشىلىك جاسايتىن «قوسەستەك» اۋىلشارۋاشىلىق وندىرىستىك كووپەراتيۆى جۇزەگە اسىردى.
بۇل ءۇشىن كووپەراتيۆ مۇشەلەرى ءوزارا كەڭەسە كەلىپ, ەڭ الدىمەن ءتيىستى ينفراقۇرىلىمدىق جۇيە جاساقتاۋ قاجەت دەگەن ورتاق ۇيعارىمعا كەلەدى. سولاي بولادى دا. اتاپ ايتقاندا, الداعى ۋاقىتتا سالىناتىن شاعىن وڭدەۋ نىسانى ءۇشىن ەلەكتر جەلىسى تارتىلادى. بۇدان سوڭ گاز, سۋ جانە كارىز جۇيەلەرى ىسكە قوسىلادى. كەلەسى كەزەكتە اۋىزبىرلىگى مەن ىنتىماعى جاراسقان اۋىل ازاماتتارى اۋىسىمىنا ءبىر توننا شيكىزاتتى وڭدەپ, بۇدان ءازىر ءونىم شىعارا الاتىن قۇرال-جابدىقتار ساتىپ الۋعا قول جەتكىزەدى.
ءسويتىپ «قوسەسكەك» كووپەراتيۆى سۇتتەن قايماق, سۇزبە, ماي وندىرۋگە مۇمكىندىك الدى. ءبىز ءۇشىن ەڭ باستىسى شيكىزات ءوندىرۋ كولەمىن كەمىتىپ الماۋ. ماسەلەن, وتكەن جىلى ءبىز تۇرعىنداردان 300 توننا ءسۇت قابىلداپ العان ەدىك. بۇگىنگى مەجە وسى مولشەردەن تومەندەمەي, ونى ءسۇت وڭدەۋ تسەحىنا تاپسىرۋ, – دەيدى كووپەراتيۆ توراعاسى ەركىن وتەگەنوۆ.
ولاردىڭ بۇگىنگى العا قويعان ماقساتتارى مەن ءىس-جوسپارلارى دا ومىرشەڭ. سونىڭ ىشىندە قوسەستەكتىكتەر ەرتەرەكتە جەرگىلىكتى ماي زاۋىتىنا شىعارىلعان ىرىمشىكتىڭ ەرەكشە ءتۇرىن جاڭا تەحنولوگيانىڭ كومەگىمەن قايتا جاڭعىرتۋدى كوزدەپ وتىر. ء«بارىن ايت تا, ءبىرىن ايت, كوللەكتيۆتىڭ جىرىن ايت» دەگەن ەكەن بي-اعاڭ, بەيىمبەت مايلين. وسى ولشەمگە «قوسەستەك» كووپەراتيۆى مۇشەلەرىنىڭ ىلكىمدى ءىس-قيمىلدارى دا ءدال كەلىپ تۇرعانداي.
تەمىر قۇسايىن, «ەگەمەن قازاقستان»
اقتوبە وبلىسى,
قارعالى اۋدانى,
قوسەستەك اۋىلى