جىل باسىنان بەرى قازاقستاندىق سپورتشىلار ەل ابىرويىن اسقاقتاتىپ جاتىر. ولاردىڭ قاتارىندا ادەتتەگىدەي كاسىپقوي بوكسشى گەننادي گولوۆكين مەن شاڭعىشى الەكسەي پولتورانين بار.
شاڭعىشى الەكسەي پولتورانين سلوۆەنيادا ءوتىپ جاتقان الەم كۋبوگى كەزەڭىندە جەڭىمپاز اتاندى. پولتورانين كلاسسيكالىق ادىسپەن 15 شاقىرىم قاشىقتىقتا مارەگە ءبىرىنشى بولىپ جەتتى. ەكىنشى ورىن العان نورۆەگيالىق يوحاننەس حوەسفليوت كلەبو الەكسەيدەن 13,2 سەكۋندقا قالىپ قويدى. ا.پولتورانيننەن 42,8 سەكۋندقا كەيىن كەلگەن شۆەتسيالىق كاللە حالفارسسون ۇزدىك ۇشتىككە جايعاستى.
وتانداسىمىز وسىمەن قىسقى وليمپيادا قارساڭىنداعى ماۋسىمدىق جارىستاردا ءتورتىنشى رەت جۇلدەگە يە بولدى. وسىعان دەيىن ول 17 جەلتوقسان كۇنى يتاليانىڭ توبلاح قالاسىندا الەم كۋبوگى كەزەڭىندە 15 شاقىرىم قاشىقتىقتا كلاسسيكالىق تاسىلمەن ىزگە ءتۇسىپ جارىسۋدا ءۇشىنشى ورىن السا, لەنتسەرحايدەدە (شۆەيتساريا) «تۋر دە سكي» كەزەڭىندە كلاسسيكالىق ادىسپەن 15 شاقىرىم قاشىقتىقتا جۇگىرۋدە كۇمىس جۇلدەگەر اتاندى. سونداي-اق يتاليانىڭ ۆال-دي-فەممە قالاسىندا 6 قاڭتار كۇنى «تۋر دە سكي» كەزەڭىندە 15 شاقىرىم قاشىقتىقتا كلاسسيكالىق ادىسپەن چەمپيون اتانعان ەدى.
ەندى الەكسەي وڭتۇستىك كورەيانىڭ پحەنچحان قالاسىندا وتەتىن وليمپيا ويىندارىندا مەدالدىڭ سىڭعىرىن ەستىرتسە, قانەكەي. بابىندا جۇرگەن سپورتشىمىز كوك تۋىمىزدى جەلبىرەتىپ, ءانۇرانىمىزدى شىرقاتسا ەكەن دەپ تىلەيمىز.
سونىمەن قاتار كۇللى بوكس الەمىنە اڭگىمەسى جۇرەتىن «WorldBoxingNews.net» سايتى 2017 جىلدىڭ ەڭ ۇزدىك بوكسشىسىن انىقتادى. ءۇش ۇمىتكەردىڭ اراسىنان ولار ءبىزدىڭ وتانداسىمىز گەننادي گولوۆكيندى تاڭداپتى. كروۋفورد پەن لوماچەنكونى شاڭىنا ىلەستىرمەگەن قازاقستاندىق بوكسشى وتكەن جىلدىڭ ۇزدىگى اتاندى. اتاقتى اعىلشىندىق سايتتىڭ ايتقانىمەن وزگەلەرى دە كەلىسىپ جاتقانى ايقىن. سونىمەن بىرگە «vringe.com» سايتى 2017 جىلدىڭ ەڭ ايتۋلى كەزدەسۋى گولوۆكين مەن الۆارەس اراسىندا ءوتتى دەپ مالىمدەدى. ەڭ كوپ قارالعان ءارى تالقىلانعان بوكس كەزدەسۋىنىڭ جىرى شىنىن ايتۋ كەرەك ءالى دە تارقاماي تۇر. ەكىجاقتى كەلىسسوزدەر ءجۇرىپ جاتقانىنان حاباردار بولىپ وتىرعان حالىقارالىق بوكس قاۋىمداستىعى گەننادي مەن ساۋلدىڭ اراسىنداعى قارىمتا كەزدەسۋدى مامىر ايىنىڭ 5-ىنە بەلگىلەپتى. ماسەلەنىڭ ءمان-جايى جاقىن ارادا انىقتالۋى ءتيىس.
ەرمۇحامەد ماۋلەن, «ەگەمەن قازاقستان»