ەلىمىزدىڭ 5 دۇركىن چەمپيونى «ەرتىس» تۇركياعا اتتانباق. كوماندا قۇرامىندا وزگەرىس كوپ. باس جاتتىقتىرۋشى بولىپ يسپان مامانى جەرەرد نۋس تاعايىندالدى. اسلان داراباەۆ سەكىلدى مىقتى ويىنشىلارى وزگە كلۋبتارعا اۋىسىپ كەتكەن «ەرتىس» ەندى نەگىزىنەن جەرگىلىكتى فۋتبولشىلارعا سەنىم ارتادى. سول سەنىمدى ارقالاعانداردىڭ ءبىرى – رۋسلان ەسىموۆ. ەكىباستۇز فۋتبولىنىڭ تۇلەگى بىلتىرعى ماۋسىمدا نەگىزگى قۇرامدا تۇراقتى ويناپ, پاۆلودارلىق جانكۇيەرلەردىڭ سەنىمىنەن شىققان. جاس بولسا دا جانكەشتى ويىندارىمەن كوزگە تۇسكەن قورعاۋشى الداعى جوسپارلارىمەن بولىسكەن ەدى.
– جاقىندا «ەرتىسپەن» كەلىسىمشارتتى ۇزارتتىڭ. وتكەن جىلى نەگىزگى قۇرامدا تۇراقتى جاقسى ونەرىڭمەن كوزگە تۇسكەن ويىنشىلاردىڭ ءبىرىسىڭ. باسقا كوماندالاردان ۇسىنىس بولعان شىعار؟
– ءيا, كوماندامەن كەلىسىمگە كەلدىك. وتە قۋانىشتىمىن. باسقا كوماندالاردان ۇسىنىستاردىڭ بولعانى راس. دەگەنمەن, مەن ءۇشىن قازىر «ەرتىستە» ويناۋ ەڭ دۇرىس شەشىم. پاۆلودار ءوزىمنىڭ تۋىپ-وسكەن جەرىم. جانكۇيەرلەردىڭ قولداۋىن ەرەكشە سەزىنەمىن. ءبارى كوڭىلىمنەن شىعادى. قالعانى بولاشاقتىڭ ەنشىسىندە.
– كوماندانى يسپانيادان كەلگەن جاس مامانى جەرەرد نۋس جاتتىقتىراتىن بولدى. باس باپكەرمەن تانىسىپ ۇلگەردىڭ بە؟
– تانىسىپ ۇلگەرگەن جوقپىن. بىرەر كۇننەن سوڭ وقۋ-جاتتىعۋ جيىنى باستالادى. سوندا تانىسىپ, بىرگە جۇمىس ىستەيتىن بولامىز. يسپان مامانىنان كوپ نارسە ۇيرەنەمىز دەپ ويلايمىن. باس باپكەردىڭ سەنىمىنەن شىعۋعا تىرىسامىن.
– «ەرتىس» بىلتىر ءتاپ-ءتاۋىر وينادى. دەگەنمەن, «ورداباسىنى» قۋىپ جەتە المادىڭدار. فۋتبولشى رەتىندە ماۋسىمدى قالاي باعالار ەدىڭ؟
– ەڭ باستىسى, ەۋروپا ليگاسىنا جولداما الدىق. بۇل باسشىلىق تاراپىنان ماۋسىمعا قويىلعان تاپسىرمالاردىڭ ءبىرى ەدى. ەل بىرىنشىلىگىندە كوپ ۇپاي جوعالتتىق. سۇرەڭسىز ويىندار بولدى. كەي جەرلەردە تاجىريبە جەتپەي قالدى. الداعى ماۋسىمدا جاقسى ناتيجەگە قول جەتكىزۋگە تىرىسامىز. «ەرتىس» ەلىمىزدىڭ 5 دۇركىن چەمپيونى. سوندىقتان جاۋاپكەرشىلىگىمىز ۇلكەن. ماقسات ايقىن. جۇلدەگەرلەر قاتارىنان تابىلۋعا كۇش سالامىز.
– «ەكىباستۇز» فۋتبول كلۋبىنىڭ تۇلەگىسىڭ. قاتەلەسپەسەم, العاشقى كەلىسىمشارتقا وتىرعان كومانداڭ دا وسى شىعار؟
– ءيا, ۇلكەن فۋتبولعا جولداما بەرگەن «ەكىباستۇز» كومانداسى. ءبىرىنشى رەت كەلىسىمشارتقا 2006 جىلى قول قويعانمىن. ەرەكشە اسەردە بولدىم. كاسىبي فۋتبولداعى جولىم وسىلاي باستالعان. بۇل مەنىڭ ومىرىمدەگى وتە ماڭىزدى قادام ەدى.
– «ەكىباستۇز» كومانداسىنىڭ قازىرگى جاعدايىمەن تانىس بولارسىڭ...
– ارينە. كوماندامەن ۇنەمى بايلانىستامىن. جاقسى وزگەرىستەر بولادى دەپ ۇمىتتەنەمىن. جەڭسە قۋانامىن, جەڭىلسە مۇڭايامىن. قيىن كەزەڭدەر بارلىق كوماندالاردا بولادى. باسشىلىق اۋىستى. جاڭا باپكەرمەن ۇلكەن جەڭىستەرگە جەتەدى دەپ سەنەمىن. ءوز كومانداما تەك جاقسىلىق تىلەيمىن.
– كاسىبي فۋتبولشى بولۋ بالا كەزدەگى ارمانىڭ بولدى عوي؟
– شىنىمدى ايتسام, فۋتبولشى بولامىن دەپ ارمانداعان جوقپىن. اۋلادا تاڭنىڭ اتىسى كۇننىڭ باتىسى تەك دوپ قۋالايتىنبىز. بالا كەزىمىزدە فۋتبول الاڭىن ءوزىمىز سىزىپ, قولدان قاقپا جاساپ وينايتىن ەدىك. وسە كەلە, فۋتبولعا دەگەن كوزقاراسىم وزگەرە باستادى. فۋتبول ۇيىرمەسىنە جازىلدىم. جاقسى باپكەر جولىقتى. جاسوسپىرىمدەر جارىستارىنا قاتىستىق. كاسىبي فۋتبولشى بولۋعا مۇمكىندىك تۋدى. كەيىننەن دۇرىس تاڭداۋ جاساعانىما كوزىم جەتتى.
– اڭگىمەڭە راحمەت.
اڭگىمەلەسكەن
ەركەبۇلان جومارت,
«ەگەمەن قازاقستان»