ۇجىمدىق رۋح ۇلى جەڭىستەرگە قول جەتكىزەدى. قازاق ايتادى: ء«ۇش ادامنىڭ باسى قوسىلسا – قاۋىم». قاۋىمداسقاننان بەرى ادامزات سان ءتۇرلى قوعامدىق قۇرىلىستى وتكەردى. ال قازىرگى نارىقتىق قوعامنىڭ كىلتى – تابىس. ياعني بيىك مۇددە جولىندا ۇجىمداسۋ جانە بەلگىلى ناتيجەگە قول جەتكىزۋ.
مۇنى كوممەرتسيالىق مۇددە تۇرعىسىنان قاراعاننىڭ وزىندە اقشا ءۇشىن ەمەس, ىشكى تۇسىنىستىككە قۇرىلعان ەنتۋزيازم بىرلىگىنە اينالدىرا الساق, ۇتارىمىز كوپ. كوپ ايتىلاتىن يننوۆاتسيانىڭ ءوزىن ەنتۋزيازم تۋدىرادى. ءتورت جىل بۇرىن استانا ەكونوميكالىق فورۋمىنا مارتەبەلى مەيمان بولعان حيميا سالاسى بويىنشا نوبەل سىيلىعىنىڭ لاۋرەاتى كۋرت ۆيۋتريح وسكەمەنگە دە كەلىپ, ستۋدەنتتەرمەن كەزدەسكەن ەدى. سول جۇزدەسۋدە ستۋدەنتتەر عالىمعا يننوۆاتسيا جونىندە ساۋال قويدى. ءسال ويلانعان سىڭاي تانىتقان ك.ۆيۋتريح سوندا «يننوۆاتسيا دەگەنىمىز مىناۋ» دەپ قولىنداعى سمارتفونىن كورسەتكەن. راسىندا «تسيفرلى رەۆوليۋتسيانىڭ اكەسى» اتالاتىن ستيۆ دجوبس سىندى جاھاندىق ساۋدا جەلىسىن جاۋلاعان كومپانيالار مەن كاسىپورىندار جەتەكشىلەرىنىڭ ءومىربايانىنان وسى ۇجىمدىق ەنتۋزيازمدى ايقىن اڭداۋعا بولادى.
ءاسانالى ءاشىموۆ ءوزىنىڭ اۆتورلىق جانرىنا اينالدىرعان كۇندەلىگىندە كامال سمايىلوۆ تۋرالى قازاق كينوسىندا ودان ارتىق باسشى بولماعانىن جازادى. راسىندا ك.سمايىلوۆ «قازاقفيلمدى» باسقارعان تۇستا قازاق كينوسىنىڭ كلاسسيكاسىنا اينالعان التىن قورىمىزداعى فيلمدەر ءتۇسىرىلدى. كورنەكتى قايراتكەر «قىز جىبەك», «اتاماننىڭ اقىرى», «شوق پەن شەر», «كوكسەرەك», ء«ترانسسىبىر ەكسپرەسى», «تاقيالى پەرىشتە», «قاراش-قاراش وقيعاسى» سياقتى ۇلتتىق كارتينالارعا كىل كلاسسيكتەر ۇجىمىن تارتا ءبىلدى. جازۋشىسى, دراماتۋرگى, ستسەناريشىسى, سۋرەتشىسى, اكتەرى, كومپوزيتورى – ارقايسىسى دارا تۇلعا ەدى. ۇجىمدىق رۋح ۇلتتىق رۋحقا ۇلاستى. شىعارماشىلىقتا مۇنداي رۋحپەن ادەبيەت تە جاسالادى. ماسەلەن, ءىلياس ەسەنبەرليننىڭ ايگىلى «كوشپەندىلەر» تريلوگياسىنداعى ءتورت عاسىردى قامتىعان ەپيكالىق قۇلاشقا سول تۇستاعى جاس قالامگەرلەر مۇحتار ماعاۋين, قادىر مىرزاليەۆ, قابدەش جۇمادىلوۆتەر دەرەك پەن ماعلۇمات جيناۋ جاعىنان قول ۇشىن سوزعاندارىن مەمۋارلاردان وقىدىق. كەيىن بۇل شىعارمانىڭ شەڭبەرىنە سىيماعان تاريحي كەزەڭدەر مەن كەيىپكەرلەر جازۋشىلاردىڭ جاڭا تىنىستى جەكە تۋىندىلارىنا وزەك بولدى. ارينە شىعارمالاردىڭ دارا اۆتورلىق قۋاتپەن قاعازعا تۇسكەنى كۇمانسىز.
قازاق «كەمەدەگىنىڭ جانى ءبىر» دەپ قالاي ءدوپ ايتقان! ساپاردىڭ دا قيىندىعى مەن ازابى جەتەرلىك. قۇرلىقتا, سۋدا, اۋەدە بولسىن, جولاۋشىلار دا ءبىر ۇجىم. ياعني «جول مۇراتى – جەتۋ» بولسا, دىتتەگەن جەرگە امان-ەسەن جەتۋگە دە جۇمىلعان جۇدىرىقتاي ىشكى سىيلاسىم, قولداۋ كەرەك. بۇل بويىن بىلمەككە, كورمەككە دەگەن قۇشتارلىق بيلەگەن جاڭالىق اشۋشى ساياحاتشىلار ءۇشىن ءتىپتى ۇلكەن سىن. ايتالىق, پلانەتانىڭ جارتىسىن الىپ جاتقان تىنىق مۇحيتىنىڭ قۇس قاناتى شىداماس ءبىر بۇرىشىنداعى شوكىمدەي عانا پولينەزيا ارالدارىنىڭ تۇرعىندارى قايدان, قالاي كەلدى؟ ارالداعى بايىرعى تۇرعىن ايتادى: جەل جانە اعىس. مىنە, وسى جۇمباقتى شەشۋ ءۇشىن نورۆەگيالىق ايگىلى ساياحاتشى تۋر حەيەردال وڭتۇستىك امەريكا جاعاسىنان كادۋىلگى بورەنەنى بۋىپ جاسالعان سال-قايىقپەن 8 مىڭ شاقىرىمدى ارتقا تاستاپ, ەجەلگى پولينەزيالىقتار سەكىلدى ۇلى مۇحيتتى كەسىپ وتەدى. مۇحيت ارعى جاعادان بەرگى جاعاعا ءجۇزىپ وتە شىعاتىن وزەن, ءتىپتى كول دە, تەڭىز دە ەمەس. ونىڭ وزىنە ءتان تاڭعاجايىپ الەمى بار. وسى ادۋىندى دا ۇرەيلى, اسەم دە ايدىك الەممەن بار-جوعى بەس سەرىگىمەن 101 كۇن ىشىندە ءبىر بولشەگى رەتىندە تۇتاسىپ كەتكەن حەيەردالدىڭ سول ساپارى دا ادامي ۇلى رۋحتىڭ, ۇجىمدىق قۋاتتىڭ بەلگىسى ىسپەتتى اسەر قالدىرادى.
جالپى, ۇجىمدىق رۋحتى اركىم ارقالاي تۇسىنەدى. بىراق ءبارى «بىرلىك ءتۇبى – بەرەكە» نەمەسە «ىزدەنگەن جەتەر مۇراتقا» دەگەن قازاقى ارناعا ساياتىن سىقىلدى. ۇجىمدىق رۋحتى ءتۇيسىنۋ دە وسى لەكتە ەكەنىڭىزدى كورسەتەدى. الايدا ادامدارعا تاۋەلدى بولعاندىقتان ۇجىمدىق ماقسات وتە كىنامشىل كەلەدى. ياعني ەڭ الدىمەن ىشكى الەمىڭىزدىڭ ءۇنى ماڭىزدى. وسى اعىمعا ىلەسۋگە قاجەتتى قۋاتتى الدەكىم دەيل كارنەگي, ناپولەون حيلل, دجوزەف مەرفي سيياقتى الەمدىك بەستسەللەرگە اينالعان شىعارمالاردان ىزدەسە, تاعى ءبىر جاندار موتيۆاتسيالىق سەمينارلار مەن دارىستەردەن قالماۋعا تىرىسادى. بارلىعى دا قۇپتارلىق. ويتكەنى ءبىزدى ورتا وسىرەدى, تاربيەلەيدى, ورتاق ماقساتقا جۇمىلدىرادى. بۇل رەتتە ءبىر-ءبىرىمىزدىڭ جاقسىلىعىمىزدى, ارتىقشىلىعىمىزدى, بىلىكتىلىگىمىزدى باعالاي بىلۋگە ماشىقتانعاننىڭ ايىبى جوق. «گۇل سىيلاعان قولدان گۇلدىڭ ءيىسى شىعىپ تۇرادى», دەيدى قىتاي ماتەلى. قوعامنىڭ ءوزى ۇلكەن ۇجىم ىسپەتتى. ياعني الدىمەن ادامي كاپيتالدى, سول ارقىلى ۇجىمدىق رۋحتى دامىتۋ ۇلت جانە ۇلى مەملەكەت رەتىندە دامۋدىڭ العىشارتى بولسا كەرەك.
دۋمان اناش, «ەگەمەن قازاقستان»