كەشە استانادا قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ ەلىمىزگە رەسمي ساپارمەن كەلگەن ۋكراينا اسكەري دەلەگاتسياسى جانە ءوزىنىڭ ءارىپتەسى – ۋكراينا قورعانىس ءمينيسترى ميحايل ەجەلمەن كەزدەستى.
– قازاقستان-ۋكراينا اسكەري ىنتىماقتاستىعى 2005 جىلعى اسكەري-تەحنيكالىق ىنتىماقتاستىق تۋرالى ۇكىمەتارالىق كەلىسىم جانە 1997 جىلعى اسكەري ىنتىماقتاستىق ءجونىندەگى قورعانىس مينيسترلىكتەرى اراسىنداعى كەلىسىم شەڭبەرىندە جۇزەگە اسىرىلۋدا, – دەدى ادىلبەك جاقسىبەكوۆ. – ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ۋكراينامەن باسىم سالالاردا, سونىڭ ىشىندە, اسكەري جانە اسكەري-تەحنيكالىق سالالاردا سەرىكتەستىك قاتىناستاردى دامىتۋعا جانە ىنتىماقتاستىقتى نىعايتۋعا ۇلكەن كوڭىل ءبولىپ كەلەدى.
ءا.جاقسىبەكوۆ جۇيەلى كەزدەسۋلەردى وتكىزۋ ەكى ەل ارمياسىنىڭ قارىم-قاتىناستارىنا ۇلكەن ىقپال ەتەتىندىگىن اتاپ ءوتىپ, ۋكراينا تاراپىن قازاقستان ارمياسىنداعى جاعدايمەن تانىستىردى. وسى ورايدا, دەدى ءا.جاقسىبەكوۆ, بۇگىنگى تاڭداعى ەڭ باستى باسىمدىقتاردىڭ ءبىرى وتاندىق قورعانىس-وندىرىستىك كەشەندى دامىتۋ بولىپ تابىلادى. وسى ءماتىندە شەتەلدىك سەرىكتەستەرمەن, سونىڭ ىشىندە قازاقستان قورعانىس ۆەدومستۆوسى ءۇشىن ماڭىزدى سەرىكتەس بولىپ تابىلاتىن ۋكراينامەن اسكەري-تەحنيكالىق ىنتىماقتاستىققا ۇلكەن كوڭىل بولىنەدى.
ىنتىماقتاستىقتى ءارى قاراي دامىتۋ جانە بەلسەندىلىگىن ارتتىرۋ, سونداي-اق ەكى ەلدىڭ قورعانىس ۆەدومستۆولارىنىڭ ءوزارا ارەكەت ەتۋىنىڭ قۇقىقتىق نەگىزىن قۇرۋ ۇمتىلىسىنىڭ دالەلى رەتىندە ءبىرقاتار قۇجاتتارعا – قازاقستان قورعانىس مينيسترلىگى مەن ۋكراينا قورعانىس مينيسترلىگى اراسىندا اسكەري ىنتىماقتاستىق تۋرالى كەلىسىمگە, سونىمەن قاتار 2012 جىلعا ارنالعان ىنتىماقتاستىق باعدارلاماسىنا قول قويىلدى.
قازاقستان قورعانىس ءمينيسترى ۋكراينا قورعانىس ءمينيسترىن استانادا 2012 جىلى 7 مامىردا وتكىزىلەتىن قازاقستان قارۋلى كۇشتەرى قۇرىلۋىنىڭ 20 جىلدىعىن مەرەكەلەۋىنە, سونىمەن قاتار, قازاقستان ارمياسىنىڭ مەرەكەلىك كەزەڭى قارساڭىندا ەكىنشى قازاقستاندىق حالىقارالىق قارۋ-جاراق, اسكەري تەحنيكا مەن اسكەري-تەحنيكالىق م ۇلىك كورمەسى «KADEX–2012-گە» دە شاقىردى. قازاقستان قارۋلى كۇشتەرىنىڭ بۇكىل جەكە قۇرامى اتىنان 6 جەلتوقساندا 20 جىل تولۋىنا وراي ۋكراينا قارۋلى كۇشتەرىنىڭ قۇرىلۋ كۇنىمەن قۇتتىقتادى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ وكىلى.