رەسەيدەن كەلەتىن ارزان استىق تاسىمالىن اۋىزدىقتاۋ ءۇشىن شەكارالاس ايماقتاردا جەدەل توپتار مەن شتابتار ۇيىمداستىرىلىپ, تاۋلىك بويى كەزەكشلىك ەتەدى.
جاڭا جىل الدىندا پرەمەر-ءمينيستردىڭ ورىنباسارى توراعالىق ەتكەن وتىرىستا استىق نارىعىندا باعانى تۇراقتاندىرۋ ماسەلەسى ارنايى قارالىپ, بىرقاتار شەشىم قابىلدانعان بولاتىن. بىلتىر كورشى ەلدە ەگىن وتە بىتىك شىعىپ, استىق باعاسى كۇرت قۇلدىرادى. قىزىلجار ءوڭىرى ومبى, قورعان سەكىلدى استىقتى وبلىستارمەن شەكتەسەتىن بولعاندىقتان, جاسىرىن جولمەن جەتكىزىلگەن بيداي ءونىمىنىڭ كولەمى كۇرت ءوسىپ, جەرگىلىكتى اگرارشىلار تىعىرىققا تىرەلگەن ەدى. ويتكەنى, قازاقستاندا جوعارى سۇرىپتى ءبىر توننا بيدايدى ساتىپ الۋ باعاسى 42 مىڭ تەڭگەگە بەلگىلەنگەنمەن, شەكارانىڭ ارعى جاعىندا 7-10 مىڭ تەڭگە ارزان.
«زاڭسىز جولمەن استىق اكەلۋگە ارەكەتتەنگەن 10 تىركەمەلى كولىك توقتاتىلىپ, جارتى ميلليون تەڭگە ايىپپۇل سالىندى. مامليۋت اۋدانى اۋماعىندا ورنالاسقان «جاڭجول» كەدەن بەكەتى ارقىلى 215 توننا بيدايدى الىپ وتپەك بولعانداردىڭ جولى كەسىلدى. «ازىق-ت ۇلىك» كەلىسىم-شارت كورپوراتسياسى مىندەتتەگەن مولشەردە ساتىپ العانشا قىراعىلىقتى ءبىر ءسات تە باسەڭدەتپەيمىز», دەيدى وبلىستىق اۋماقتىق ينسپەكتسياسى باسشىسىنىڭ مىندەتىن اتقارۋشى ۆلاديمير وترادنىح.
سولتۇستىكقازاقستاندىق ديقاندار قازىرگى كۇنى 381 مىڭ توننا استىقتى سىرتقا ساۋدالاپ ۇلگىردى.
ءومىر ەسقالي, «ەگەمەن قازاقستان»