ادامزات كەرۋەنى شەجىرەسىنىڭ ادەتتە كەمەل كوشباسشى, جارقىن تۇلعالار قولىمەن جاسالىنارىن كارى تاريح دايەكتەيدى. تۇڭعىش پرەزيدەنتىمىز نۇرسۇلتان نازارباەۆتىڭ «تاۋەلسىزدىك ءداۋىرى» اتتى ەلدىك تۋىن كوتەرگەن كەڭ تىنىستى تۋىندىسىن وقىپ وتىرىپ وسىعان قايىرا ءبىر كوز جەتكىزەسىز.
جاڭا كىتاپ جاسىمىز بار, جاسامىسىمىز بار, وتانىمىزدى سۇيەر پاتريوتتاردىڭ كۇندەلىكتى پاراقتار باستى شىعارماسىنا, باعىت-باعدار الار شىراعدانىنا اينالۋى شارت دەپ ەسەپتەيمىز. مۇنداعى قاعيداتتى تۇجىرىمدار جاستار تاربيەسىندە, ورتا جانە جوعارى ءبىلىم بەرۋدە اسىرەسە, مەملەكەتتىك قىزمەت جۇيەسىندە كەڭىنەن تالقىلانىپ, عيبراتتى قاينارعا الىنسا – ۇتقانىمىز دەر ەدىك.
ءيا, وسى شىعارمادا ايتىلعانداي, ءبىز ەلباسىمەن بىرگە قاسيەتتى جەرىمىزگە ۇيىسقان ۇلتتاردى ۇيىتىپ, ەل تاتۋلىعىن, ءتۇرلى ءدىن وكىلدەرىنىڭ ءوزارا تۇسىنىستىگىن قامتاماسىز ەتتىك. وتتان دا ىستىق وتانىمىزدىڭ وشپەس شىراعىن جارقىراتا جاعا بىلدىك. مىڭ ءولىپ, مىڭ تىرىلگەن اتا مۇرامىزدى اسپەتتەپ, كەلەر ۇرپاق ميراس تۇتار ۇلتتىق قۇندىلىقتارىمىزدى ايشىقتادىق. اسۋ بەرمەس رەفورمالاردى اۋىزدىقتاپ, ەلدىڭ تۇرمىستىق ءال-اۋقاتىن جاڭا دەڭگەيگە كوتەردىك, ەكولوگياعا ءوڭ بەرىپ, دەموگرافيانى دامىتتىق. كوپ ۇزاماي-اق, الەمدەگى دامىعان وتىزدىقتى ايتاسىز, العاشقى وندىقتىڭ كوشىنە ەركىن ەنەرىمىزگە بەك سەنەمىز. سەبەبى ەلىمىزدە ءبارىمىزدىڭ دە زور شابىتپەن ءونىمدى ەڭبەك ەتۋىمىزگە بارلىق جاعداي تۋعىزىلعان. باي-قۋاتتى, تاي-تۇياقتىمىز. ەلباسى تۇعىرى – ەلىمىزدىڭ عۇمىرى. ءبىز ەرتەڭىنە ۇكىلى ءۇمىت ارتقان بايتاق جۇرتپىز!
بۇل تۋىندى, تۇپتەپ كەلگەندە, ەلباسىمىزدىڭ ازات ەلى مەن تۋعان حالقىنا دەگەن پەرزەنتتىك شەكسىز سۇيىسپەنشىلىگىنىڭ كورىنىسى دەر ەدىك. ەلدىڭ ەرتەڭى مەن كەشەگىسى وي-ساناسىنان ءبىر ساتكە دە شىقپايتىنىن اڭعاراسىز. بۇل رەتتە ايتار پىكىرىن كەز كەلگەن قولايلى ساتتە ىركىلمەي اقتارىپ سالاتىندىعى دا سودان. اتالمىش كىتاپ وسى ءسوزىمىزدىڭ جاندى ايعاعى!
دانا حالقىمىز: «قۇداي جاققان شىراقتى شايتان ۇرلەپ وشىرە المايدى» دەمەۋشى مە ەدى. مىڭداعان جىلدار مۇعدارىندا مەنمۇندالاعان شىراعىمىزدىڭ تاۋەلسىزدىك جىلدارىندا تىپتەن جارقىراي ءتۇسۋى, ءسوز جوق, ەلىن سۇيگەن, جەرىن سۇيگەن, جانىم ارىمنىڭ ساداعاسى دەپ قازاق ەلىنىڭ كەلەشەگى جولىندا ەرتەگىگە پارا-پار ەرلىك جاساپ جۇرگەن نۇرسۇلتان ءابىش ۇلىنىڭ كەمەڭگەرلىكپەن پىشىلگەن كەنەن ساياساتىنىڭ ارقاسى! ەلباسىنىڭ مەككەدەگى قاعبا قاقپاسىنىڭ الدىندا تۇرىپ تاۋەلسىز تۋعان حالقىمدى باقىتتى ەتە گور دەپ ءۇش مارتە تىلەگەنىن بىلەمىز. قۇدىرەتتى اللا قابىل الدى شىن نيەتتى. ەڭسەمىز كوتەرىلدى – ەلدىگىمىزدى قاستەرلەدىك. بەدەلىمىز ارتتى – باسەكەلەستىككە بەل بۋدىق. سانامىز جاڭعىردى – تاريحىمىزدى تارازىلادىق. رۋحىمىز ءوستى – حالىقتىق قالپىمىزدى بەدەرلەدىك.
اۆتور وتانىمىزدىڭ شەڭبەرىندەگى تىندىرىلعان, ەندى قولعا ساتىمەن الىنىپ جاتقان شىرايلى شارۋالاردى ساۋساقپەن ساناپ تۇرىپ ءدان ريزا كۇي كەشەدى. ءبارىنىڭ اق باستاۋىندا بارشا ەتنوس وكىلدەرى ءبىر اتانىڭ بالالارىنداي بەلسەندىلىك تانىتىپ وتىرعاندىعىن ەرەكشە تولعانىس ۇستىندە جەتكىزەدى. راسىندا, وسىناۋ شيرەك عاسىر مەملەكەتىمىزدىڭ بار-جوعىن تۇگەندەۋمەن, ۇلتتىق بولمىسىمىز بەن شەكارامىزدى شەگەندەۋمەن ءوتىپتى. وزگەلەرمەن بوي تەڭەستىرۋدى ايتاسىز, عاسىرلار بويىنا ەلدىگىن ءتۇزىپ كەلگەن كوپ مەملەكەتتەردەن مەرەيىمىز اسىپ ءتۇستى.
كارى تاريحتىڭ ارعى-بەرگى يىرىمدەرىندە الەمدى اۋزىنا قاراتقان نەبىر الپاۋىت ەلدەردىڭ ىشتەن ءىرىپ, ۇيىندىگە اينالعاندىعى سانالى جانعا ساباقتىڭ تورەسى. ەلباسىمىز كىتاپتىڭ ءون بويىندا قول جەتكەن تولاعاي تابىستارمەن قاتار ورىن العان ولقىلىقتاردى, تىڭ رەفورمالاردى جۇزەگە اسىرۋداعى قازاقستاندىقتاردىڭ بىرلىگى مەن بەرەكەلى ىستەرىن دە جۇرەك تۇبىنە سىر جاسىرماستان تولعايدى. ناقتىلى مىسالدار الدىڭىزعا تارتىلادى. جان دۇنيەڭىزبەن بەرىلە يلاناسىز. سونداي جاسامپازدىق شەرۋىنە ميلليونداعان زامانداستارىمىزبەن بىرگە ءوزىمىزدىڭ دە اقجارىلا اتسالىسقانىمىزدى ماقتانىش تۇتامىز!
قازاق ەلىنىڭ جاپپاي قىرىپ-جوياتىن يادرولىق الاپات قارۋدان ءوز ەركىمەن باس تارتىپ, بەيبىتشىلىكتىڭ سيمۆولىنا اينالۋى, بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى اتانىپ, ادامزاتتىڭ اقبەرەن اراشاشىسى بەينەسىنە ەنۋى, ءسوز جوق, مىڭجىلدىقتار تولقىنىندا تۇزىلگەن العاۋسىز ۇلتتىق قۇندىلىقتارىمىزدىڭ وتەۋى دەر ەدىك!
بۇگىندە دوڭگەلەنگەن دۇنيەدە شيرەك ميللياردتان استام تۇركىلەر ءتۇتىنىن ءتۇزۋ شىعارىپ جاتىر دەسەك, سولاردىڭ بارشاسىنىڭ كوشباسشىسى تۇعىرىنا تۇركىتەكتەس مەملەكەتتەر باسشىلارى پاتيحاسىمەن نۇرسۇلتان نازارباەۆتىڭ كوتەرىلۋى مارتەبەنىڭ مۇزارت شىڭى ەمەس پە؟! كەمىندە ءتورت مىڭ جىلدىقتىڭ شەڭبەرىندە الدىنان قۇس ۇشىرتىپ, جان قاراتپاعان تۇراندىقتاردىڭ قارا ورمان جۇرتىندا ءبورىلى بايراقتى قولعا ۇستاپ قالۋىمىز – ميلليونداعان قانداستارىمىز شابىتىنىڭ شالقارى, مەرەيىنىڭ اسقارى! ۇلى قاعانداردىڭ اسىل تاقتارىنان قۇرىشتاي قۇيىلعان ءتول تابيعاتىمىز تورىنەن ماڭگىلىك ەلدىڭ ءمارت وعلاندارىنا ساي جاسىنداي جارقىلداي ءبىلۋىمىز – ۇلى دالانىڭ ۇلاعاتى, جاسامپازدىعىمىزدىڭ جارقىن بەلگىسى! ال اللانىڭ اتقان ءار اق تاڭىندا تاۋەلسىزدىك شاپاعاتىنا شومىلۋ – شەكسىز باقىت!
امىرە ءارىن, اقىن, الماتى وبلىستىق «جەتىسۋ» گازەتىنىڭ باس رەداكتورى