اسا قۇرمەتتى وقىرمان!

تاۋبە! ەل ءومىرىنىڭ ەڭ باستى جارشىسىنا اي­نال­عان باس باسىلىم ءۇشىن دە 2017 جىل شىن مانىندە تابىستى جىلعا اينالدى. گازەتىمىزدىڭ «ستراتەگيالىق دامۋ تۇجىرىمداماسى» نەگىزىندە 2017 جىلى العا قويعان ءبىر جىلدىق مىندەتتەرىمىزدى تولىقتاي ىسكە اسىردىق. باس باسىلىمدا جاسالعان فورماتتىق, ديزايندىق جانە مازمۇندىق وزگەرىستەر تولىعىمەن ورنىقتى.

 وسى وزگەرىستەردىڭ ناتيجەسىندە «ەگەمەن قازاق­ستان» مەملەكەتتىك ساياساتتى جازىپ كورسەتۋ تۇرعى­سىنان عانا ەمەس, قوعامدا جانە تورتكۇل دۇنيەدە بولىپ جاتقان ماڭىزدى وقيعالاردى حالىققا جان-جاقتى ءارى تۇشىمدى دايەكتەرمەن جەتكىزۋ ىسىندە دە اقپارات قۇرالدارىنىڭ فلاگمانىنا اينالىپ, وتاندىق مەديا كەڭىستىكتەگى ورنى مەن سالماعىن نىقتاي ءتۇستى. ماسەلەن, ەلباسىنىڭ جىل باسىندا جاريالاعان «جاڭعىرتۋ 3.0» اتتى جولداۋى ەلىمىزدىڭ ءۇشىنشى جاڭعىرۋ كەزەڭىندەگى ستراتەگيالىق دامۋ ماقساتتارىن بەلگىلەپ بەرسە, «بولاشاققا باعدار: رۋحاني جاڭعىرۋ» ماقالاسى حالقىمىزدىڭ رۋحاني جاڭعىرۋىنىڭ ءتۇپ نەگىزدەرى مەن الداعى باعدارىن ايقىندادى. اسىرەسە وسى باعدارلامالىق ماقالانىڭ «ەگەمەندە» جارىق كورۋى باس باسىلىمنىڭ عانا ەمەس, تۇتاستاي قازاق ءباسپاسوزىنىڭ, قازاق ءتىلىنىڭ مارتەبەسىن اسىردى. كوپتەگەن شەتەلدىك باسىلىمدار ەلباسىنىڭ وسى ماقالاسىن ءوز تىلدەرىنە اۋدارىپ باستى جانە باستاپقى دەرەك كوزى رەتىندە «ەگەمەن قازاقستاندى» بەلگىلەدى. ال گازەتىمىزدىڭ وزىندە «رۋحاني جاڭعىرۋ» اياسىنداعى تاقىرىپتار بويىنشا 1000-نان اسا ماتەريال جاريالاندى.

جالپى, وتكەن جىلى ەلدى ەلەڭ ەتكىزەر وقيعا­لار­دىڭ كوپ بولعانىن اتاپ وتكىم كەلەدى. جىل باسىندا الەمدىك ماڭىزى بار قىسقى ۋنيۆەرسيادا ويىندارى ءوتىپ, دۇنيە ءجۇزىنىڭ نازارى قازاقستاندا باق سىناعان سپورت ساڭلاقتارىنا اۋدى. سونداي-اق ەلىمىزدىڭ قۇقىقتىق مەملەكەت رەتىندەگى الداعى دامۋىندا زور ءمانى بار كونستيتۋتسيالىق وزگەرىستەر قابىلدانىپ, پرەزيدەنتتىڭ بىرقاتار وكىلەتتىكتەرى پارلامەنت پەن ۇكىمەتكە بەرىلدى. ال قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋى وتكەن جىلدىڭ حالىقارالىق وقيعالار ساپىنداعى ەڭ ۇلكەن ساياسي جاڭالىقتارىنىڭ ءبىرى بولعانى انىق. بۇل قاتاردا شىۇ, يسلام ىنتىماقتاستىعى ۇيىمى سامميتتەرىن, استانا ەكونوميكالىق فورۋمىن, سيرياارالىق كەلىسسوزدەردىڭ اسا ماڭىزدى ديالوگ الاڭى بولعان استانا پروتسەسىنىڭ تابىستى وتكەنىن دە ايتۋعا بولادى. 

البەتتە, جىلدىڭ ماڭىزدى وقيعالارىنىڭ قاتارىندا ءبىز ورتالىق ازيادا تۇڭعىش رەت وتكەن استاناداعى ەكسپو-2017 حالىقارالىق كورمەسىن ايرىقشا ايتامىز. الەم ەلدەرىنىڭ بالامالى ەنەرگەتيكا سالاسىنداعى ەڭ ۇزدىك تەحنولوگيالارىن نازارعا تارتقان بۇل كورمەنى حالقىمىز ەرەكشە ىقىلاسپەن تاماشالادى. كورمەنىڭ ءۇش اي ىشىندەگى ەكونوميكالىق تابىسى ءوز الدىنا, ونداعى كوپتەگەن عىلىم جانە تەحنولوگيا جەتىستىكتەرى, ياعني ەكسپو مۇ­رالارى ەل ەكونوميكاسىنىڭ ءتۇرلى سالالارىنا ەن­گى­زىلەتىن بولدى. ەڭ باستىسى دا وسى دەپ ويلايمىز.

ءبىز وسىلايشا ەل تاريحىنداعى ايتۋلى وقي­عا­لاردى قامتي وتىرىپ, وقىرمان قاۋىمنىڭ تال­عامى مەن تالابىن جاڭا ايدارلارىمىزدا ەسكەرۋ­گە تىرىستىق. قىزمەتكەرلەرىمىزدىڭ دە ساپالىق قۇرا­مى ايتارلىقتاي كۇشەيتىلدى. سول ارقىلى ەكو­نوميكالىق, حالىقارالىق ساراپتامالار مەن قوعامدىق ءمان-ماڭىزى زور, وزەكتى ماسەلەلەردى كوتەرگەن تالداۋ ماقالالارعا كوبىرەك ورىن بەردىك. ءنا­تيجەسىندە «ەگەمەن» قوعامدىق-ساياسي جانە الەۋ­مەتتىك-ەكونوميكالىق ماڭىزى زور كوپتەگەن وزەكتى ماسەلەلەردى كوتەرىپ, ولاردىڭ مەملەكەتتىك دەڭگەيدە دۇرىس شەشىلۋىنە ءوز ىقپالىن تيگىزدى.

وسى ورايدا گازەتىمىزگە 2018 جىلعا جازى­لىم بىلتىرعى مەجەدەن دە اسىپ ءتۇسىپ, 204 165 داناعا جەتكەنىن جانە «ەگەمەن» قىزمەتكەرلەرى دە 2017 جى­لى كوپتەگەن مەملەكەتتىك, ۆەدومستۆولىق ماراپات­تارعا يە بولعانىن ماقتانىشپەن ايتا وتىرىپ, بۇل كورسەتكىش رەداكتسيا جۇمىسىنىڭ تالعامى بيىك وقىرماننىڭ تالاپ ۇدەسىنەن شىعا العاندىعىنىڭ ناتيجەسى دەپ ويلايمىز.

وتكەن جىلدىڭ تاعى ءبىر ۇلكەن جاڭالىعى – رەداكتسيامىزعا حات جازىپ, كۇن سايىن حابارلاسىپ جاتاتىن قالىڭ وقىرماننىڭ تىلەگىن ورىنداۋ ماقساتىمەن «ەگەمەن قازاقستان» گازەتى سوڭعى 24 جىلدا تۇڭعىش رەت بولشەك ساۋدا جەلىسىنە ءتۇسىپ, كيوسكىلەردە ساتىلا باستادى. قازىر باس باسىلىمدى الماتى, شىمكەنت جانە استانا قالالارىن قوسا العاندا, 80-گە تارتا كيوسكىدەن تابۋعا بولادى.

سايتىمىزدا جىل باسىنان قازاق تىلىمەن قاتار ورىسشا اقپار تاراتۋدى قولعا الدىق, ال قىركۇيەكتەن باستاپ اعىلشىن تىلىندە الەمگە ەلىمىزدەگى ەلەۋلى وقيعالاردى ءوز مۇددەمىز تۇرعىسىنان ايتىپ,  ەلەڭ ەتكىزەر جاھاندىق جاڭالىقتاردى اعىلشىن تىلىندە تاراتىپ كەلەمىز. سونداي-اق اۋديو ماقالا قوسۋدى جولعا قويىپ, ساراپتاما مەن حالىقارالىق جاڭالىقتاردىڭ ۇلەسىن ارتتىردىق. قازىر سايتىمىز بەن الەۋمەتتىك جەلىلەردەگى وقىرمانىمىزدىڭ سانى 42 مىڭنان اسادى.

قۇرمەتتى وقىرمان, 2017-ءنى وسىنداي ءناتي­جە­لەر­مەن اياقتاعان «ەگەمەن قازاقستان», مىنە, 2018-ءدىڭ تا­بال­دىرىعىنان اتتاپ, ءار شاڭىراققا جاڭا جىلدىڭ العاش­قى جاڭالىقتارىن دا الا كەلدى. بيىل ەلىمىز ءۇشىن دە, ەلىمىزدىڭ باس گازەتى «ەگەمەن» ءۇشىن دە اي­رىقشا ماڭىزدى جىل.

بىرىنشىدەن, قازاقستان تورتكۇل دۇنيەنىڭ تورىنە شىعىپ, بۇۇ قاۋىپسىزدىك كەڭەسىندە تورەلىك ەتۋىن باس­تادى. بۇل تاريحتا قالار شەشۋشى ساتتەردىڭ ءبىرى ەكەنى بەلگىلى. سونىمەن قاتار 2018 جىل الەمدىك جانە ءداستۇرلى دىندەر ليدەرلەرىنىڭ كەزەكتى سەزى سىندى وزگە دە ايتۋلى داتالار مەن حالىقارالىق, جاھاندىق ءمان-ماڭىزى بار ءىس-شارالارعا تولى بولماق. ولاردىڭ نەگىزگىلەرىنە قولدارىڭىزداعى وسى ساندا مۇمكىندىگىنشە شولۋ جاسالعانىن جانە الداعى ۋاقىتتا بۇل تاقىرىپتار «ەگەمەننىڭ» نازارىندا بولىپ, وقىرمانعا جان-جاقتى جەتكىزىلەتىنىن ايتقىم كەلەدى.

ەكىنشىدەن, بيىل «ەگەمەن قازاقستان» ءۇشىن ءوزىنىڭ 100 جىلدىق مەرەيلى بەلەسىن اتاپ وتۋگە دايىندىق جىلى بولماق. ەلىمىزدىڭ ءبىر عاسىرلىق دامۋ جولىنىڭ دەرەكتى شەجىرەسىن جازىپ كەلە جاتقان, مەملەكەتتىك ساياساتتىڭ نەگىزگى ناسيحاتشىسى ءارى حالىقتىڭ ءۇنى بولىپ وتىرعان «ەگەمەن قازاقستان»  گازەتى 2019 جىلى جۇزگە تولادى. البەتتە بۇل داتانى ءبىز رەسپۋب­ليكا كولەمىندە اتاپ وتەتىن بولامىز. بۇل ورايدا ءبىز گازەتتىڭ 1919 جىلدان بۇگىنگە دەيىنگى ساندارىنىڭ ءارحيۆىن تۇگەندەپ, تسيفرلى فورماتتاعى كوشىرمەلەرىن جاساۋدى اياقتايمىز. ەل تاريحىن ءباسپاسوز بەتىنەن زەرتتەۋشىلەر ءۇشىن بۇل زور تارتۋ بولماق.

ءسوز سوڭىندا گازەتىمىزگە جازىلىپ, ەل تىنىسىن «ەگەمەنمەن» تانىپ وتىرعان وقىرماندارىمىزعا ال­عى­سىمىزدى بىلدىرەمىز! جاڭا جىل جاقسى جاڭا­لىق­تار جىلى بولسىن!

قۇرمەتپەن,

دارحان قىدىءرالى