قازاقستاندا وتكەن جىلمەن سالىستىرعاندا جول اپاتى سانى 5 پايىزعا ازايدى. بۇل تۋرالى استانادا وتكەن ءباسپاسوز ءماسليحاتى بارىسىندا قر ءىىم اكىمشىلىك پوليتسيا كوميتەتى توراعاسىنىڭ ورىنباسارى الىبەك كەڭىسپاەۆ ءمالىم ەتتى, دەپ حابارلايدى «قازاقپارات».
«جول قوزعالىسىنىڭ قاۋىپسىزدىگى قر ىشكى ىستەر مينيسترلىگىنىڭ ءاردايىم باقىلاۋىندا. سوڭعى جىلدارى جۇرگىزىلگەن ساراپتامالارعا سۇيەنسەك, رەسپۋبليكادا 2014 جىلدان بەرى جول اپاتى جاعدايى ازايعانىن بايقاۋعا بولادى. بيىلعى جىلدىڭ 11 ايىنىڭ قورىتىندىسى بويىنشا جول اپاتتارى 5 پايىزعا, قايتىس بولعانداردىڭ سانى 14 پايىزعا, جاراقات العانداردىڭ سانى 4,4 پايىزعا ازايدى», - دەيدى الىبەك كەڭىسپاەۆ.
قر ءىىم وكىلىنىڭ ايتۋىنشا, جول اپاتتارى جاعدايىنىڭ تومەندەۋى جەرگىلىكتى جانە رەسپۋبليكالىق ماڭىزى بار جولداردا دا بايقالىپ وتىر.
«جالپى, بۇل كورسەتكىشتەرگە قولعا الىنعان كەشەندى شارالاردىڭ سەپ بولعانىن كورىپ وتىرمىز. جولداردىڭ بويىندا باقىلاۋ كۇشەيتىلىپ, «قاۋىپسىز جول», «اۆتوكولىك», «اۆتوبۋس» اتتى الدىن الا شارالار جۇرگىزىلدى. بيىلعى جىلى عانا ماس كۇيدە كولىك جۇرگىزگەن 28 مىڭ ادام جۇرگىزۋشى كۋالىگىنەن ايىرىلدى. بۇعان قوسا جول ەرەجەسىن بۇزعانى ءۇشىن 8,5 مىڭ ادام جۇرگىزۋشى كۋالىگىنەن ايىرىلىپ, 3,2 مىڭ ادام اكىمشىلىك قاماققا الىندى», - دەيدى الىبەك كەڭىسپاەۆ.