بيىل قازاقستانعا تابىستى جىل بولدى. ەلىمىزدە بىرقاتار وزگەرىستەر ورىن الىپ, الەمدىك دەڭگەيدەگى شارالار وتكىزدىك. ساياسي جۇيەنى جەتىلدىرۋ, بيلىك تارماقتارىنىڭ فۋنكتسيالارىن ۇشتاۋ ماقساتىندا ەلەۋلى جۇمىس ىستەلدى. سولاردىڭ ەڭ باستىسى – اتا زاڭعا ەنگىزىلگەن وزگەرىستەر.
پرەزيدەنت نۇرسۇلتان نازارباەۆتىڭ باستاماسىمەن اتقارۋشى جانە زاڭ شىعارۋشى تارماقتارىنا قوسىمشا قۇزىرەتتەر بەرىلدى. مۇنىڭ ءبارى بيلىك تارماقتارى اراسىنداعى دەربەستىك پەن تەپە-تەڭدىكتى ساقتاۋ ءۇشىن جاسالدى. بۇل – وتكەن جىلدىڭ ساياسي سالاداعى ماڭىزدى ءبىر جەمىسى.
ەلباسىنىڭ ەكونوميكالىق, ساياسي رەفورمالارمەن قاتار, رۋحاني سالاداعى ماسەلەلەرگە نازار اۋدارۋى دا ماڭىزدى وقيعانىڭ ءبىرى. پرەزيدەنت ن.نازارباەۆ «بولاشاققا باعدار: رۋحاني جاڭعىرۋ» ماقالاسىندا قوعامدىق سانانىڭ جاڭعىرۋى جونىندە ايتىلعان ويلارى, ساياسي سالاداعى وزگەرىستەرى تۋرالى پىكىرى ەرەكشە. سونىڭ ناتيجەسىندە رۋحاني سالادا, قوعامدىق ءومىر مەن عىلىمدا ۇلكەن بەتبۇرىس پايدا بولدى. قوعامتانۋ عىلىمدارىن جاڭاشا وقىتۋ, ولارعا قاجەتتى جاڭا وقۋلىقتار شىعارۋ, وسى سالاداعى پاندەردى رەتكە كەلتىرىپ, ولاردى بولاشاق ماماندار دايىنداۋعا پايدالانۋ − بىزگە بەرىلگەن مۇمكىندىك.
2017 جىلى قازاقستان ەكونوميكالىق قۋاتىن كورسەتىپ, الەمدىك وركەنيەتتىڭ جولىنا شىققانىن پاش ەتەتىن بىرقاتار حالىقارالىق شارالار وتكىزدى. سولاردىڭ بىرەگەيى – ەكسپو-2017 حالىقارالىق كورمەسى. جاس مەملەكەت ءوزىنىڭ زور الەۋەتىن الەمگە دالەلدەدى. ەكسپو-2017 عاسىردان عاسىرعا سوزىلاتىن, ەل تاريحىندا وزىندىك ورنى بار ەرەكشە وقيعا. بۇدان بولەك, قازاقستاندا سيريا بويىنشا استانا كەلىسسوزدەرى, يسلام ىنتىماقتاستىعى ۇيىمىنىڭ جانە شانحاي ىنتىماقتاستىق ۇيىمىنىڭ سامميتتەرى ءوتتى.
تابىستى, جەمىستى بولعان بيىلعى جىلدى قورىتىندىلاي كەلە, احمەت بايتۇرسىن ۇلىنىڭ «ولجالى جەردە ۇلەستەن, وردالى جەردە ورنىنان, جورالى جەردە جولىنان قالماۋىمىز كەرەك» دەگەن ءسوزىنىڭ ۇدەسىنەن شىقتىق. قازاقستان ءار سالاداعى ءوز ورنىن بەكەمدەدى. وتكەن جىلعا وكپە جوق. جاڭا جىل تابىستى, جەمىستى ءارى ورنىقتى بولسىن!
ءناۋبات قاليەۆ, ساياسي عىلىمدار دوكتورى