الداعى جىلى قالا كىتاپحانالارى رەبرەندينگ وتكىزۋدى جوسپارلاپ وتىر, دەپ حابارلايدى ەلوردا اكىمدىگىنىڭ مەديا ورتالىعى.
ەلوردا كىتاپحانالارى وقىرماندارىنا ازىرلەگەن جوبالارىنىڭ ءبىرى «جاندى كىتاپ» دەپ اتالادى. وندا كىتاپحانا وقىرماندارى تانىمال ادامدارمەن كەزدەسەدى. كەزدەسۋ فورماتى ەرەكشە بولماق.
سپيكەردىڭ الەۋمەتتىك جەلى پاراقشاسى مەن وتباسىلىق البومنان الىنىپ, الدىن الا دايىندالعان 10 قىزىقتى سۋرەتى (سپيكەر ول تۋرالى بىلمەيدى) ەكرانعا شىعارىلادى. كەزدەسۋگە كەلگەن سپيكەر ءار سۋرەتتىڭ شىعۋ تاريحىن ايتىپ بەرەدى.
«10 سۋرەتتىڭ «سىرى» بەلگىلى بولعان سوڭ, كورەرمەندەر قىزىقتىرعان سۇراقتارىن قويىپ, جاۋاپ الا الادى. كەزدەسۋگە جاستار مەن جەتكىنشەكتەردى دۇرىس جولعا باعىتتاپ, ۇلگى بولا الاتىن تانىمال تۇلعالار شاقىرىلادى», - دەلىنگەن استانا قالاسىنىڭ ورتالىقتاندىرىلعان كىتاپحانالار جۇيەسى تاراتقان حابارلامادا.