جاڭا جىل مەرەكەسى جاقسى-اۋ, بىراق جىل سايىن ونىڭ تابيعاتقا اكەلەر زيانى دا جوق ەمەس. جەلتوقسان ايىنىڭ باسىنان باستاپ, وبلىستاعى اعاشتى-ورماندى القاپتاردان شىرشا اعاشتارىنىڭ زاڭسىز كەسىلگەندىگى انىقتالىپ وتىر. سوندىقتان مەرەكە جاقىنداعان سايىن تابيعات قورعاۋ پوليتسەيلەرى ءۇشىن قىزۋ ناۋقان باستالدى. وسىعان وراي وبلىستا پوليتسەيلەردەن, ۋچاسكەلىك ينسپەكتورلاردان, وبلىستىق ورمان شارۋاشىلىعى جانە جانۋارلار الەمىن قورعاۋ باسقارماسىنىڭ, قوستاناي قالالىق تابيعات رەسۋرسىن رەتتەۋ باسقارماسى قىزمەتكەرلەرىنەن جەدەل توپتار قۇرىلدى. رەيدتەر جەلتوقسان ايىنىڭ 10-نان ۇزدىكسىز جۇرگىزىلىپ كەلەدى.
رەيد بارىسىندا وبلىس وڭىرىندەگى قىلقان جاپىراقتى ورمانداردى, ورمان شارۋاشىلىقتارىن ارالاۋ, جولدارداعى وتكەن ءار اۆتوكولىكتى, اعاش تيەلگەن كولىكتەردى تىركەۋ جۇمىستارى جۇرگىزىلۋدە. رەيد بارىسىندا اۋليەكول پوسەلكەسىنىڭ جانىنان ەكى ءتۇپ قاراعايدىڭ كەسىلگەنى بەلگىلى بولدى, ونىڭ ءىسى سوتقا جىبەرىلدى.
اعاشتى زاڭسىز كەسكەندەر ۇستالسا 200 ايلىق كورسەتكىشكە دەيىن ايىپپۇل تولەيدى نەمەسە 60 تاۋلىككە قامالادى. ەگەر كەسىلگەن اعاش ورمان قورىنا جاتاتىن بولسا, وندا ايىپپۇل 300 ايلىق كورسەتكىشكە كوبەيىپ, قاماق 75 كۇنگە سوزىلادى.
مۇنىمەن قوسا قوستاناي قالاسى مەن باسقا دا ەلدى مەكەندەردە ساتىلىپ جاتقان شارشالار مۇقيات تەكسەرىلۋدە. قازىر وبلىستا 41 ورىندا شىرشا ساتىلادى. ولار نەگىزىنەن رەسەيدەن, ونىڭ چەليابى, قورعان وبلىستارىنان جانە باشقۇرتستان رەسپۋبليكاسىنان تاسىلادى. رەيد 31 كۇنى, جاڭا جىلدى قارسى العانعا دەيىن توقتامايدى.
ءنازيرا جارىمبەت
«ەگەمەن قازاقستان»
قوستاناي