بيىل قوستانايدا ون ەكىنشى رەت ۇزدىك جاستاردىڭ ەسىمى «قوستاناي وبلىسى جاستارىنىڭ التىن كىتابىنا» تىركەلدى.
ولاردىڭ بارلىعى دا جاستىعىنا قاراماي, ءومىردىڭ ءار سالاسىندا ۇزدىك جەتىستىككە جەتكەندەر بولاتىن. مىسالى, قادىرجان ماقانعاليدىڭ ءوزى جاس عالىم. ول تاياۋ ۋاقىتتا وبلىس ورتالىعىنان شالعايدا جاتقان قامىستى اۋدانىندا حالىقارالىق دارەجەدە اتالىپ وتكەن يننوۆاتسيالىق تەحنولوگيامەن وڭدەلەتىن شۇجىق تسەحىن اشۋدى جوسپارلاپ وتىر. ال دميتري روماششەنكو مەملەكەتتىك ءتىلدى تازا مەڭگەرىپ الۋىمەن قاتار, فەدوروۆ اۋدانىنداعى №1 ورتا مەكتەپتە قازاق تىلىنەن وزىق ادىستەمەمەن ساباق بەرەدى. بيىل «التىن كىتاپقا» ەسىمدەرى جازىلعان 11 جاستىڭ ارقايسىسى ءوزىنىڭ ىسىمەن, دارىنىمەن قىزىقتى داستان سەكىلدى.
– مەنىڭ بالا جاسىمنان مەملەكەتتىك تىلگە قىزىعۋشىلىعىم بولاتىن. بىراق ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ قازاق فيلولوگياسى ماماندىعىنا تۇسكەنىمدە ءتىلىم قازاقشاعا ونشا كەلمەيتىن جانە كوپ سوزدەردى تۇسىنبەيتىنمىن. ءبىرىنشى كۋرستا ءبىر ءسوز دە ايتقان جوقپىن, تاپسىرمانى ءۇنسىز ورىنداۋمەن بولدىم. ەكىنشى كۋرستا ءبىر-ەكى اۋىز ءسوز سويلەيتىن بولدىم, ءۇشىنشى كۋرستا ودان دا جاقسى, تەزىرەك سويلەدىم, ءتورتىنشى كۋرستا سويلەپ كەتتىم. مەن مەملەكەتتىك ءتىلدى ءبىلۋىم كەرەك دەگەن ماقسات بولدى مەندە, سونىمەن قاتار ءوزىم تۋعان فەدوروۆ اۋدانىنان ەشقايدا شىقپايمىن دەگەن ويىم بولدى. ال اۋىلدا مەملەكەتتىك تىلدە ساباق بەرۋ مەنىڭ ومىرلىك نانىم دەپ ءبىلدىم, – دەيدى ديما اعىنان جارىلىپ. قازىر ونىڭ قازاق ءتىلىن مەڭگەرۋ جانە ۇيرەتۋ جونىندەگى ىزدەنىستەرى ءتىل ماماندارىنىڭ نازارىن اۋدارىپ ءجۇر.
جىل دا ءداستۇرلى وتەتىن «قوستاناي وبلىسى جاستارىنىڭ التىن كىتابى» بالىنا بيىل دا وبلىس اكىمى ارحيمەد مۇحامبەتوۆ قاتىستى.
«ەلباسى نۇرسۇلتان نازارباەۆ جاستار ىسىنە ىلعي دا كوڭىل ءبولىپ وتىرادى. ونىڭ «بولاشاققا باعدار: رۋحاني جاڭعىرۋ» اتتى ماقالاسىنداعى ايتىلعان ماسەلەلەردىڭ بارلىعى دا جاستارعا ارنالادى, سوندىقتان ونى جۇزەگە اسراتىنىن دا سىزدەر بولاسىزدار. ەڭبەكسىز, ماقساتسىز ەشكىم دە مەملەكەتكە, وتباسىنا پايدالى ءىس ىستەي المايدى. ءبىزدىڭ بۇل شارا جىل سايىن ەل بولاشاعىنىڭ كوكجيەگىندەي ارمان قۋعان تالانتتى, دارىندى جاستاردىڭ ءوسىپ كەلە جاتقانىنا كەپىل بولادى. بۇگىنگى ماراپات, قۇرمەت سىزدەردىڭ ەڭبەكتەرىڭىزدى مويىنداۋ عانا ەمەس, قوعامنىڭ سىزدەرگە كورسەتكەن ۇلكەن سەنىمى. وزگە جاستار سىزدەرگە تەڭەلگىسى كەلەدى», دەدى ارحيمەد مۇحامبەتوۆ.
قوستانايدا 184 جاستىڭ ەسىمى «قوستاناي وبلىسى جاستارىنىڭ التىن كىتابىنا» جازىلدى. جالپى قوستاناي وبلىسىندا مەملەكەتتىك جاستار ساياساتىن قارجىلىق قولداۋ دا جىل سايىن ءوسىپ كەلەدى. بيىل بيۋدجەتتەن وسى ماقساتقا 190 ميلليون تەڭگە ءبولىندى.
جاستارعا ارنالعان بيىلعى بال قايىرىمدىلىق اكتسياسىمەن اياقتالدى. «الاقانداعى ءومىر» جوباسى اياسىندا 9 جاسار كونوۆالچۋك يراعا وپەراتسيا جاساۋعا كەرەك 5 ميلليون تەڭگە قارجىنى جيناۋ ءجۇرىپ جاتىر. كەشتە وعان ارنالعان قايىرىمدىلىق جاشىگىنە 50 مىڭ تەڭگە جينالدى.
ءنازيرا جارىمبەت,
«ەگەمەن قازاقستان».
قوستاناي