ءبىر ايعا دا تولماعان نەمەرەسىن وتقا تىرىدەي جاعىپ جىبەرگەن 62 جاستاعى ليۋبوۆ رۋساليەۆاعا قاتىستى سوت پروتسەسى باستالدى.
قايعىلى وقيعا مامليۋت اۋدانى دۋبروۆنوە ەلدى مەكەنىندە ورىن العان. ولەسيا گرۋدينسكايا دەگەن كەلىنشەك 9 جاستاعى ۇلىمەن, ەمشەكتەگى قىزىمەن جانە اناسىمەن ءبىر ۇيدە تۇرعان. ول بىرنەشە جىل بۇرىن كۇيەۋىمەن اجىراسىپ, اكە-شەشەسىنىڭ قولىنا كوشىپ كەلگەن. سول كۇنى كەيۋانا قىزى مەن ۇلكەن نەمەرەسىنىڭ دۇكەنگە كەتكەن مەزەتىن پايدالانىپ, دۇنيە ەسىگىن ىڭگالاپ اشقانىنا ء ۇش اپتا عانا بولعان شاقالاقتى تىر جالاڭاش شەشىندىرىپ, جانىپ جاتقان پەشكە تاستاپ جىبەرگەن. ۇيگە ورالعان ەكەۋ ءسابيدى تاپپاي قالىپ, كۇيىك ء يىسىن سەزگەننەن كەيىن ساندارىن بىراق ۇرعان.
اۋىلداستارى ل.رۋساليەۆانى اراققا قانشا قۇمار بولسا دا, جانجال, ايعاي-شۋ شىعارمايتىن, وزگەلەردىڭ مازاسىن المايتىن مومىن جان رەتىندە سيپاتتايدى. نەمەرەسى سىرقاتتانىپ, جەرگىلىكتى اۋرۋحاناعا تۇسكەندە قاتتى ۋايىمداعان كورىنەدى. اۋىلدىق وكرۋگتىڭ اكىمى گالينا شۆەتسوۆا دا تۇرمىسى تومەن ساناتتاعىلار وتباسى رەتىندە تىركەلمەگەنىن, تاتۋ-ءتاتتى تۇرعاندارىن, الەۋمەتتىك مۇقتاجدىق كورمەگەندەرىن ايتادى. تەك وتاعاسى كوز جۇمعالى بەيمازا كۇيگە ءتۇسىپ, ىشكىلىكتى توقتاتپاسا كەرەك.
تۋعان نەمەرەسىن تىرىدەي وتقا جاعىپ جىبەرىپ, سۇمدىق قىلمىسقا بارعان كەيۋانانىڭ بۇل قادامى تالايلاردىڭ جاعاسىن ۇستاتقان. كۇدىكتى سوتقا بەرگەن جاۋابىندا جانتۇرشىگەرلىك قىلمىسقا قۋ اراقتىڭ كەسىرىنەن باردىم دەپ قانشا اقتالۋعا تىرىسسا دا, قىزى مۇنداي ايۋاندىق ارەكەتكە ەش كەشىرىم بولماۋىن, ەڭ قاتال جازانى تالاپ ەتتى.
زەينەتكەرگە «اسا قاتىگەزدىكپەن ادام ءولتىردى» دەگەن اۋىر ايىپ تاعىلىپ وتىر. قىلمىسى دالەلدەنسە, قالعان عۇمىرىن اباقتىدا وتكىزۋى مۇمكىن.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى