وتپان تاۋدا تاۋەلسىزدىك مەرەكەسى قارساڭىندا «بولاشاققا باعدار: رۋحاني جاڭعىرۋ» باعدارلاماسىنا وراي «الاش وردا» ۇكىمەتىنىڭ قۇرىلعانىنا 100 جىل جانە الاش ارىسى جالاۋ مىڭباي ۇلىنىڭ تۋعانىنا 125 جىل تولۋىنا وراي «الاش قوعالىسى جانە ماڭعىستاۋ» دەپ اتالاتىن شارا بولىپ ءوتتى.
شاراعا «الاش» قوزعالىسى مەن قايراتكەرلەرى, اسىرەسە الاش ارىسى ج.مىڭباەۆ تۋرالى زەرتتەۋ جۇمىستارىمەن اينالىسىپ جۇرگەن قدپ «اق جول» ماڭعىستاۋ وبلىستىق فيليالى جاستار قاناتىنىڭ جەتەكشىسى ءاليا يساەۆا مەن شاكىرتتەرى, ماڭعىستاۋ ونەر كوللەدجى ستۋدەنتتەرى مەن ۇستازدارى, تۇششىبەك نەگىزگى ورتا مەكتەپ وقۋشىلارى, مەكتەپ ديرەكتورى جانە اۋىل اكىمى قاتىستى.
شارانى جۇرگىزۋشى الاش قوزعالىسىنىڭ قۇرىلۋى حح عاسىردىڭ باسىندا قازاق تاريحىندا بولعان ەرەكشە وقيعا, زاڭدى قۇبىلىس ەكەنىن اتاپ ءوتتى. «سەبەبى سول كەزدەگى ءار سالا بويىنشا الدىڭعى قاتارلى ءبىلىم العان قازاق زيالىلارىنىڭ ەل بولاشاعىن ويلاپ, سول كەزدەگى ساياسي ۇتىمدى جاعدايدى پايدالانىپ تۋعان ەلىندە ۇلكەن ساياسي بەتبۇرىس جاساپ, دەربەس مەملەكەت قۇرۋدى كوكسەۋلەرى, سوعان ارەكەت ەتۋلەرى ورىندى ەدى. بىراق, وكىنىشكە وراي, سول كەزدە رەسەيدە قۇلاعان پاتشا ۇكىمەتىنىڭ ورنىنا ساياسي بيلىكككە كەلگەن, قارا حالىقتىڭ مۇددەسىن كوزدەيمىز, ساياسي جانە الەۋمەتتىك تەڭدىك ورناتامىز دەگەن بولشەۆيكتەردىڭ ءسوزى مەن ءىسى ساي بولمادى. ولار ۇلتتىق مەملەكەت قۇرۋعا تالپىنعان «الاش ورداشىلاردىڭ» وزدەرىنىڭ ويلاعان ماقساتتارىنا جەتۋلەرىنە كەدەرگى كەلتىرەتىنىن ءبىلىپ, «الاش وردا» ۇكىمەتىن تاراتىپ, ۇكىمەت مۇشەلەرىنە ءتۇرلى جالا جاۋىپ, رەپرەسسياعا ۇشىراتقانى تاريحتان بەلگىلى...» دەي كەلە, ءسوزدى الاشتانۋشى ءاليا يساەۆاعا بەردى. ءاليا جانگەلدىقىزى الاش قوزعالىسى مەن «الاشوردا» ۇكىمەتىنىڭ قۇرىلۋى, قىزمەتى «الاش» قوزعالىسى مەن جالاۋ مىڭباەۆتىڭ بايلانىسى تۋرالى باياندالاتىن بەينەلى ءفيلمدى كورسەتە وتىرىپ, الاش قوزعالىسى قايراتكەرلەرى مەن سول كەزدە قازاق واك توراعاسى بولعان ج.مىڭباەۆتىڭ قارىم-قاتىناستارى, ونىڭ ەكى وتتىڭ ورتاسىندا ءجۇرىپ قازاق مەملەكەتتىگىن ساقتاپ, ەلدى اشارشىلىقتان, ازاماتتاردى رەپرەسسيادان امان الىپ قالۋ ءۇشىن سول كەزدەگى سسسر اتتى مەملەكەت باسشىسى ستالين, قازاق اسسر-نىڭ باسشىسى گولەششەكين سياقتى باسكەسەرلەرمەن تىرەسە وتىرىپ, جانقيارلىقپەن جۇمىس جاساعانىن, مۇستافا شوقاي سىندى ءبىرتۋار ازاماتتى نكۆد قۇرىعىنا ىلىنبەس ءۇشىن تۇرىكمەنستان ارقىلى شەتەلگە شىعارىپ جىبەرۋگە اتسالىسقانىن ت.ب. بايانداپ بەردى.
ءاليانىڭ تەاتر ونەرىنە باۋلىپ جۇرگەن شاكىرتتەرى, جاقىندا ن.جانتۋرين اتىنداعى وبلىستىق مۋزىكالىق-دراما تەاترىندا تۇساۋى كەسىلگەن دراماتۋرگ وتەن احمەتتىڭ «ەلىم دەپ وتكەن ەر جالاۋ» اتتى سپەكتاكلىندە جالاۋ مىڭباەۆتى سومداعان رامازان تاڭسىقباەۆ پەن مۇستافا شوقايدى سومداعان عازيز ىزتۇرعانوۆ سپەكتاكلدەن ءۇزىندى-ديالوگ ورىنداپ بەردى. كەلۋشىلەر, سونىڭ ىشىندە ونەر كوللەدجىنىڭ ۇستازى ماناپ قوسان مەن تۇششىبەك نەگىزگى ورتا مەكتەبىنىڭ ديرەكتورى جۇباندىقوۆا التىناي ريزالىق سەزىمدەرىن ءبىلدىرىپ, جاستارعا العىستارىن ايتتى, دەپ حابارلادى «وتپان» مكقك قىزمەتكەرى جومارت ايداربەك.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى