وڭتۇستىكتە بالالارعا ارنالعان پرەزيدەنتتىك شىرشا ءوتتى

مەرەكەلىك شىرشاعا قاتىسقان بالالارعا تەلەەكران ارقىلى ەلباسىنىڭ ارنايى قۇتتىقتاۋى كورسەتىلىپ, «اسقاق وردام - استانا»  اتاۋىمەن شىراعىن جاققان جاسىل شىرشا جانىندا حالىقارالىق كونكۋرستاردا جۇلدەلى ورىندارعا يە بولعان بيشىلەر مەن بۇلدىرشىندەر ونەر كورسەتتى.

سالتاناتتى شاراعا قاتىسقان وبلىس اكىمى جانسەيىت تۇيمەباەۆ بالالاردى مەرەكەمەن قۇتتىقتاپ, پرەزيدەنتتىڭ اتىنان 200 بالاعا قىستىق جىلى كيىمدەر مەن نوۋتبۋك ۇلەستىردى.

«سىزدەر, بۇگىن پرەزيدەنتتىك جاڭا جىلدىق شىرشاسىنا قاتىسىپ وتىرسىزدار!  بۇل - ەلباسىمىز نۇرسۇلتان ءابىش ۇلى نازارباەۆتىڭ ەلىمىزدىڭ جارقىن بولاشاعى – سىزدەرگە دەگەن ۇلكەن قۇرمەتى. جاڭا جىل – بارشا قازاقستاندىقتارعا جانە كوپتەگەن مەملەكەتتەر ءۇشىن دە ەرەكشە ىقىلاس, زور ۇمىتپەن كەلەر جىلدان جاقسىلىق كۇتەتىن مەرەكە. بۇگىنگى مەرەكە مەن سىيلىقتار سەندەرگە ەستەن كەتپەيتىن, ەرەكشە جارقىن كۇن سىيلاسىن. مەن سەندەرگە زور دەنساۋلىق, باقىت تىلەيمىن. جاڭا جىل قۇتتى بولسىن!»,-دەدى اكىم.

2017 جىلدى وڭتۇستىكقازاقستاندىق وقۋشىلارى تولىمدى جەتىستىكتەرمەن قورىتىندىلاپ وتىر. ەلباسىمىز نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا وبلىس ورتالىعىندا 1 ماۋسىم كۇنى بالالار مەن جاستاردىڭ مۋزىكالىق وركەسترلەرى مەن انسامبلدەرىنىڭ شەرۋى تۇڭعىش رەت وتكىزىلىپ, رەسپۋبليكالىق دەڭگەيدە جوعارعى باعاعا يە بولدى.

سونداي-اق, رەسپۋبليكادا تۇڭعىش رەت «قازاقستان بالالارى شەكسىز الەمدە!» اتتى شىعارماشىلىق كينو فەستيۆالى وڭتۇستىك وڭىردە ءبىرىنشى رەت ۇيىمداستىرىلىپ, ناتيجەسىندە وبلىستىڭ كومانداسى ءىى جۇلدەلى ورىندى يەلەندى.

جالپى ءبىلىم بەرەتىن پاندەردىڭ جاراتىلىستانۋ-ماتەماتيكا باعىتى بويىنشا وتكەن رەسپۋبليكالىق وليمپيادادا وڭتۇستىك قازاقستان وبلىسىنان قاتىسقان 40 وقۋشىنىڭ 16-ى جۇلدەگەر اتانسا, قوعامدىق - گۋمانيتارلىق باعىتىنداعى پاندەر بويىنشا قاتىسقان 35 وقۋشىنىڭ 14-ءى جۇلدەلى ورىنداردى يەلەندى. سونداي-اق, پرەزيدەنتتىك وليمپياداعا وبلىستان   قاتىسقان 8 وقۋشىنىڭ 4-ەۋى ۇزدىك شىقتى. قورىتا ايتقاندا, جالپى حالىقارالىق, رەسپۋبليكالىق ينتەللەكتۋالدىق كونكۋرستارعا ءبىزدىڭ وبلىستان قاتىسقان 6673 وقۋشى جەڭىمپاز اتاندى.