ول ءسىزدىڭ جەلىدە نە ىزدەيتىنىڭىزدى, قانداي سايتتارعا ءجيى كىرەتىنىڭىزدى, ءسىز جايلى ءتىپتى ودان دا كوپ اقپارات بىلەدى.
«Google قىزمەتىن پايدالانۋ ارقىلى بىزگە جەكە مالىمەتتەرىڭىزدى سەنىپ تاپسىرا الاسىز», – دەپ باستايدى ءسوزىنىڭ باسىن كومپانيانىڭ پايدالانۋشىلار كەلىسىمىنىڭ ءبولىمى. ياعني, تەحنولوگيالىق كومپانيا تۇتىنۋشىلاردى نە نارسەگە دايىن بولۋى كەرەكتىگىن بىردەن ەسكەرتەدى. دەگەنمەن كوپشىلىك جەلىدەگى مالىمەتتەردى وشىرۋگە بولاتىنىن بىلە بەرمەيدى. Google «مەنىڭ ارەكەتتەرىم» («موي دەيستۆيا») قىزمەتى ارقىلى اقپاراتتاردى ءوشىرۋ مۇمكىندىگىن قاراستىرعان.
Google تۇتىنۋشىسىنىڭ ىزدەگەن ءاربىر ماتەريالىن, ءتىپتى ءاربىر ءىس-ارەكەتىن ونىڭ اككاۋنتىمەن بايلانىستىرىپ قويادى. ماسەلەن, Google-ءدىڭ فورمالارىن, انكەتالارىن تولتىرۋ, سونداي-اق, Gmail پوشتاسىمەن جۇمىس ىستەۋىنىڭ ناتيجەسى ارقىلى ءوزى جايلى مالىمەت تاراپ وتىرادى.
مىنە, وسىعان ۇقساس اقپاراتتاردىڭ ءبارى «مەنىڭ ارەكەتتەرىم» بولىمىندە ساقتاۋلى تۇر. وسى بولىمگە كىرۋ ارقىلى ساقتاۋلى تۇرعان ناقتى پاراقشالاردى, ونىمدەردى, مالىمەتتەردى بەلگىلەپ الىپ وشىرۋگە بولادى. سونداي-اق, بارلىق مالىمەتتەردى, ءبىر كۇن بويى كىرگەن نەمەسە بەلگىلى ءبىر ۋاقىت ارالىعىندا پايدالانعان سايتتاردى دا وشىرۋگە مۇمكىندىك بار.
وسىلاردىڭ ىشىندەگى ەڭ قاۋىپتىسى – بۇكىل ۋاقىتتاعى ونىمدەر مالىمەتىن جويۋ. بۇل وپەراتسيانى ورىنداماس بۇرىن Google كەيىنگى بولاتىن سالدارى, قيىندىقتارى تۋرالى ەسكەرتۋ جىبەرەدى. دەگەنمەن, ىزدەۋ جۇمىسىنداعى بارلىق مالىمەتتەردى جويۋ نەمەسە Google قوسىمشالارى مەن ونىمدەرىن پايدالانۋ اككاۋنت جۇمىسىنا ەش زيانىن تيگىزبەيدى.
YouTube-تاعى بارلىق ارەكەتتى قالاي وشىرۋگە بولادى؟
YouTube – Google-ءدىڭ ەنشىلەس ۇيىمى. ول دا تۇتىنۋشىنىڭ قانداي ۆيدەولاردى ءجيى كورەتىنىن باقىلاپ وتىرادى.
دەگەنمەن, Google-مەن سالىستىرعاندا YouTube-تان مالىمەتتەردى جىلدام وشىرۋگە بولادى. «تاريح» («يستوريا») بولىمىنە كىرىپ, «ىزدەۋ تاريحىن ءوشىرۋ» («وچيستيت يستوريۋ پويسكا») جانە «كورۋ تاريحىن ءوشىرۋ» («وچيستيت يستوريۋ پروسموترا») وپتسيالارىن تاڭداۋ قاجەت. ءتىپتى, جەكەلەگەن ىزدەۋلەردى نەمەسە كورىلگەن ۆيدەولاردى وشىرۋگە مۇمكىندىك بار. سونداي-اق, قىزمەت كورسەتۋ الاڭىندا مالىمەتتەردى ساقتاۋىنا دا تىيىم سالۋعا بولادى.
Google تۇتىنۋشىلار جايلى مالىمەتتەردى جيناپ قانا قويماي, ونى جارناما جاساۋشىلارعا نەمەسە سەرىكتەستەرىنە جىبەرەدى. مىنە, وسى سەبەپتى پايدالانۋشىلار از ۋاقىت بۇرىن ىزدەگەن مالىمەتتەرى جايلى جارنامالاردى ءجيى كەزدەستىرىپ جاتادى. بۇدان قورقاتىنداي ەش سەبەپ جوق. سەبەبى, تۇتىنۋشى Google-ءدىڭ سەرىكتەستەرىنە قانداي اقپارات بەرگەنىن بىلە الادى. ول ءۇشىن Google-داعى اككاۋنتىنا كىرىپ «قۇپيالىلىق» («كونفيدەنتسيالنوست») ءبولىمىن تاڭداۋ قاجەت. ول جەردە «جارنامالىق ارتىقشىلىق قىزمەتى» («ناسترويكا رەكلامنىح پرەدپوچتەني»), ال ارى قاراي «جارناما قىزمەتى» («ناسترويكا رەكلامى») بولىمدەرى بار.
جەكەشەلەندىرۋ فۋنكتسياسىن وشىرگەننەن كەيىن ىزدەۋ جۇيەسى ءسىز تۋرالى اقپاراتتى جارناما تاراتۋشىلارعا جىبەرە المايدى. مىنە, وسى جەردەن ءبارىن توقتاتۋعا بولادى. دەگەنمەن, بۇل ارەكەتتەر ورىندالعاننىڭ وزىندە جارنامادان تولىق قۇتىلۋ مۇمكىن ەمەس.
Google ىلعي دا جەكەشەلەندىرىلگەن جارنامالار تۇتىنۋشىلاردىڭ قىزىعۋشىلىعىنا بايلانىستى جۇمىس ىستەيتىنىن ەسكەرتىپ كەلەدى.
ورنالاسقان جەرىڭىز تۋرالى اقپاراتتى قالاي وشىرۋگە بولادى؟
Google-عا تيەسىلى Android وپەراتسيالىق جۇيەسىندە ءسىز جۇرگەن جەرلەر ساقتالىپ تۇرادى.
الدىمەن گەولوكاتسيالىق قاداعالاۋ قىزمەتىن وشىرۋگە بولادى. قوزعالىس تاريحىن تولىعىمەن, جەكە-جەكە نەمەسە جەكەلەگەن كۇندەر مەن بەلگىلى ءبىر ۋاقىت ارالىعىن تاڭداپ وشىرۋگە دە مۇمكىندىك بار.
دايىنداعان: ايان ءابۋدالي, «ەگەمەن قازاقستان»