مەملەكەت باسشىسى جيىنعا قاتىسۋشىلاردى جانە قازاقستان حالقىن ۇلتتىق مەرەكەمىز - تاۋەلسىزدىك كۇنىمەن قۇتتىقتادى. «بۇل كۇنى ۋاقىت ولشەمىنە باعىنا قويمايتىن ماقتانىش, قۋانىش پەن تولقىنىس ءوزارا ۇيلەسىم تاۋىپ, ەرەكشە سەزىمگە بولەيدى», - دەدى قازاقستان پرەزيدەنتى. ەلباسى تاۋەلسىزدىك جىلدارىندا قازاقستان جىلدام وسۋگە قول جەتكىزىپ قانا قويماي, الداعى ۋاقىتتا ورنىقتى دامۋ ءۇشىن بەرىك نەگىز قالاعانىن ايتتى.
«بۇعان دەيىن تاريحىمىزدا بولماعان كاسىپكەرلەر شوعىرى قالىپتاستى. 1,2 ميلليوننان استام قازاقستاندىق ءوزىنىڭ جەكە كاسىبىن جۇرگىزىپ, بارلىق ۇلتتىق كىرىستىڭ تورتتەن ءبىرىن قامتاماسىز ەتىپ وتىر», - دەدى نۇرسۇلتان نازارباەۆ. مەملەكەت باسشىسى «نۇرلى جول» باعدارلاماسى كەلەشەكتىڭ ينفراقۇرىلىمدىق دايىندىعىن قامتاماسىز ەتكەن ءارى داعدارىسقا قارسى شەشىم بولعانىن اتاپ ءوتتى. «ىزعارلى جەل سوققاندا, ءبىز قورشاۋ ەمەس, جەل ديىرمەندەر سالدىق. 7 جىلدىڭ ىشىندە وڭدەۋ ونەركاسىبىنىڭ جاڭا 24 سەكتورى پايدا بولدى. يندۋستريالىق-يننوۆاتسيالىق دامۋ باعدارلاماسىنىڭ تيىمدىلىگى نىساندار سانىمەن ەمەس, تۇتاس سالالار سانىمەن ولشەنەدى», - دەدى ەلباسى.
قازاقستان پرەزيدەنتى مەملەكەتتىڭ الەۋمەتتىك فۋنكتسياسىن نىعايتۋدىڭ كەپىلىنە اينالعان ەكونوميكالىق وزگەرىستەردىڭ تابىستى بولعانىنا ەرەكشە نازار اۋداردى. «حالقىمىزدىڭ سانى تاريحىمىزدا ءبىرىنشى رەت 18 ميلليوننان استى, بالا تۋ كورسەتكىشى ءبىر جارىم ەسە ءوستى. قازاقستان بيىل باستاۋىش ءبىلىم بەرۋدى قامتۋ اۋقىمى جونىنەن الەم بويىنشا ءتورتىنشى ورىنعا شىقتى. ءومىر ءسۇرۋ ۇزاقتىعى 4,5 جىلعا ءوسىپ, 72,5 جاستى قۇرادى. 1,1 ميلليوننان استام وتباسى باسپانالى بولدى», - دەدى قازاقستان پرەزيدەنتى.
نۇرسۇلتان نازارباەۆ قازاقستاننىڭ حالىقارالىق ارەناداعى جەتىستىكتەرىنە جەكە توقتالدى. «ەلوردامىزدا حالىقارالىق ەكسپو كورمەسى وتكىزىلدى. بيىلدىڭ وزىندە قازاقستان دۇنيە جۇزىلىك ۋنيۆەرسيادانى, شانحاي ىنتىماقتاستىق ۇيىمىنىڭ تاريحي ءسامميتىن, يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى ءسامميتىن, سيرياداعى جاعدايدى بەيبىت رەتتەۋگە ارنالعان كەلىسسوزدەردى وتكىزدى. ال 2018 جىلعى قاڭتار ايىندا ەلىمىز بۇۇ قاۋىپسىزدىك كەڭەسىنە توراعالىق ەتەدى», - دەدى مەملەكەت باسشىسى.
قازاقستان پرەزيدەنتى «100 جاڭا ەسىم» جوباسىنا قاتىسۋشىلارمەن كەزدەسۋ وتكىزگەنىنە ەرەكشە توقتالىپ, تاۋەلسىزدىگىمىزدىڭ باستى قۇندىلىعى ازاماتتار ەكەنىن اتاپ ءوتتى. «بۇلاردىڭ ۇستاناتىن ومىرلىك قاعيداسى - مەملەكەتتەن تالاپ ەتە بەرمەي, وعان ءوزىنىڭ يدەيالارىن, شىعارماشىلىق ەنەرگياسىن, قاجىرلى ەڭبەگىن ارناۋ. مىنە, ءبىز قول جەتكىزگەن تابىستىڭ ناعىز شىنايى مانيفەسى - وسى! تاۋەلسىزدىكتىڭ ۇرپاعى دا - وسىلار», - دەدى نۇرسۇلتان نازارباەۆ.
مەملەكەت باسشىسى وزىق دامىعان 30 ەلدىڭ قاتارىنا قوسىلۋ ءۇشىن سان جاعىنان وسۋدەن ساپالىق وزگەرىستەرگە كوشۋدىڭ ماڭىزدى تالاپ ەكەنىن ايقىنداپ بەردى. «قازاقستاندى قالىپتاسقان مەملەكەت رەتىندە نىعايتىپ, ءبىز بۇكىلىن قامتيتىن جاڭعىرۋعا, تاۋەلسىز قازاقستاننىڭ جاڭا تۇرپاتىن جاساۋعا كىرىستىك. سول ءۇشىن ساياسي, ەكونوميكالىق جانە رۋحاني جاڭعىرۋ ۇدەرىسىن باستاپ كەتتىك», - دەدى قازاقستان پرەزيدەنتى.
نۇرسۇلتان نازارباەۆ «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن ىسكە اسىرۋ ماسەلەسىنە توقتالدى. «بيىل ەل بولىپ الاشوردانىڭ 100 جىلدىعىن اتاپ وتتىك. قازاق ءالىپبيىنىڭ لاتىن گرافيكاسىنا ءوتۋى جونىندەگى اسا ماڭىزدى شەشىم قابىلدادىق. لاتىن قارپىنە كوشۋدىڭ تەرەڭ تاريحي لوگيكاسى بار. بۇل - اتا-بابا ارمانىنىڭ ورىندالۋى عانا ەمەس, كەلەر ۇرپاقتى بولاشاققا باستايتىن جول», - دەدى مەملەكەت باسشىسى.
سوڭىندا قازاقستان پرەزيدەنتى قاتىسۋشىلاردىڭ ءبارىن تاۋەلسىزدىك كۇنىمەن تاعى دا قۇتتىقتاپ, ساياسي تۇراقتىلىق, قوعام مەن حالقىمىزدىڭ بىرلىگى ءۇشىن جۇرگىزىلىپ جاتقان ساياساتقا تولىق قولداۋ كورسەتۋ ەلىمىزدىڭ تابىستى بولۋىنىڭ باستى كەپىلى ەكەنىن اتاپ ءوتتى. «بارلىق باستامالارىمدى ىسكە اسىرۋعا كۇش بەرگەن سەنىمدەرىڭىز ءۇشىن, شىنايى قولداۋلارىڭىز بەن جانكەشتى كۇش-جىگەرلەرىڭىز ءۇشىن بارشا قازاقستاندىقتارعا العىس ايتامىن», - دەدى نۇرسۇلتان نازارباەۆ.