قاراعاندى اكىمى نۇرلان اۋباكىروۆ 180 وتباسىعا تاۋەلسىزدىك مەرەكەسى قارساڭىندا «جاڭا ورتالىق» شاعىن اۋدانىنداعى جاڭا تۇرعىن ۇيلەردەن پاتەر كىلتىن تابىستادى.
«جاڭا ورتالىق» شاعىن اۋدانىنداعى پاتەرلەردى كوپبالالى وتباسىلار, جەتىمدەر, مۇگەدەك بالا اسىراپ وتىرعان جانۇيالار, بيۋدجەتتىك ۇيىمداردىڭ قىزمەتكەرلەرى, تولىق ەمەس وتباسىلار الدى. پاتەرلەردىڭ قۇنى ءبىر شارشى مەترى 100 مىڭ تەڭگەنى قۇرايدى.
«جاڭا ورتالىق» شاعىن اۋدانى قاراعاندىنىڭ وڭتۇستىك-شىعىسىندا سالىنىپ جاتىر. ءۇش 14 جانە 16 قاباتتى ۇيلەردە جالپى اۋدانى 59 532 شارشى مەتردى قۇرايتىن 1128 پاتەر ورنالاسادى. قۇرىلىس جۇمىستارى تولىعىمەن 2018-ءشى جىلى اياقتالادى دەپ جوسپارلانۋدا. بۇگىنگى كۇنى ەكى كوپقاباتتى ۇيلەردەگى ءۇش بلوك-سەكتسيا قولدانىسقا بەرىلدى, 552 پاتەر تاپسىرىلدى. تۇرعىن ءۇي كەشەنىندەگى باسقا سەكتسيالاردا قۇرىلىس جۇمىستارى كەستەگە ساي جۇرگىزىلىپ جاتىر.
ميراس اسان,
"ەگەمەن قازاقستان"
قاراعاندى