بۇگىن شىمكەنت قالاسىنداعى «تۇركىستان» سارايىندا قازاقستان رەسپۋبليكاسىنىڭ تاۋەلسىزدىك كۇنىنە ارنالعان «تۇعىرلى بول, تاۋەلسىزدىك» اتتى سالتاناتتى شارا ءوتتى. مەرەكەلىك كەشتە ءسوز العان وبلىس اكىمى جانسەيىت تۇيمەباەۆ ءوڭىر تۇرعىندارىن ايتۋلى مەرەكەمەن قۇتتىقتادى.
«تاۋەلسىزدىك كۇنى – ۇلى مەرەكە. ءبىزدىڭ اتا-بابالارىمىز عاسىرلار بويى ازاتتىقتىڭ اق تاڭى ءتۇبى ءبىر اتارىنان ءۇمىت ۇزبەي تاۋەلسىزدىك الۋدى ارمانداپ ءوتتى. ۇلان-عايىر دالانى امان ساقتاۋ ءۇشىن جانقيارلىقپەن كۇرەستى. حالقىمىزدىڭ سان عاسىرلىق ارمانى ورىندالىپ, ەلىمىز ەگەمەندىككە قول جەتكىزدى. مىنە, ءبىز بۇگىن ەلىمىزدىڭ باستى مەرەكەسى – تاۋەلسىزدىك كۇنىن جيىرما التىنشى رەت تويلاپ وتىرمىز. قازاق ەلىنىڭ وسىناۋ جىلداردا قول جەتكىزگەن جەتىستىكتەرى قازاقستان رەسپۋبليكاسىنىڭ تۇڭعىش پرەزيدەنتى – ۇلت كوشباسشىسى نۇرسۇلتان ءابىش ۇلى نازارباەۆتىڭ ەسىمىمەن جانە ونىڭ سارابدال ساياساتىمەن تىكەلەي بايلانىستى. تاۋەلسىزدىك كۇنى – ءبىزدىڭ جالپىۇلتتىق مەرەكەمىز. ولاي بولسا, بىرلىگىمىز بەكەم, ىنتىماعىمىز ىرىستى بولىپ, ەلىمىز گۇلدەنە بەرسىن!», - دەدى جانسەيت قانسەيىت ۇلى.
سالتاناتتى جيىندا وبلىس باسشىسى مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى مەن وڭىرگە ەڭبەگى سىڭگەن وڭتۇستىكقازاقستاندىق 74 ازاماتقا مەملەكەتتىك ناگرادالار تابىستادى.
ولاردىڭ بىرقاتارىن ايتىپ وتسەك, ءىىى دارەجەلى «ايبىن» وردەنىمەن وبلىستىق توتەنشە جاعدايلار دەپارتامەنتىنىڭ باستىعى ن.دەربىسوۆ ماراپاتتالسا, «كورپوراتسيا «بەرەكە ا» جشس باس ديرەكتورىنىڭ كەڭەسشىسى ر.وسپاناليەۆا مەن وڭتۇستىك قازاقستان وبلىسى اكىمىنىڭ ورىنباسارى ۇ.سادىبەكوۆ «پاراسات» وردەنىنىڭ يەگەرلەرى اتاندى. ال, «قۇرمەت» وردەنىمەن «ەۆرورەمونتسەرۆيس» جشس ديرەكتورى ج.اعابەكوۆ, وبلىستىق ءازىل-سىقاق جانە ساتيرا تەاترىنىڭ ءارتىسى ۋ.ءابدىرايىموۆ, م.اۋەزوۆ اتىنداعى وقمۋ-ڭ دەكانى س.ءابدىرايىموۆا, تۇركىستان قالاسىنىڭ اكىمى ءا.وسەرباەۆ, اقىن ت.قابىلبەك سىندى ازاماتتار ماراپاتتالدى. سونىمەن قاتار, «كەنتاۋ ترانسفورماتور زاۋىتى» اق تسەح باسشىسى س.زۋبكوۆ, «يۋكمز» اق توكارى ت.يسمايلوۆتار ءىىى دارەجەلى «ەڭبەك داڭقى» وردەنىن يەلەندى.
تاۋەلسىزدىك مەرەكەسىندەگى ءىس-شارادا «ەرەن ەڭبەگى ءۇشىن» مەدالىمەن «تىلەۋبەردى» جشس ديرەكتورى س.باتىرباەۆ, «شىمكەنت كۇردەلى قۇرىلىس» جشس باس ديرەكتورى ءى.بۇرالقيەۆلار ماراپاتتالسا, ەڭبەك ارداگەرى م.مامبەتوۆ, ارىس اۋداندىق ەمحاناسىنىڭ فەلدشەرى ن.ادىلبەكوۆالار «شاپاعات» مەدالىن يەلەندى. قۇرمەت گراموتاسىمەن ءشامشى قالداياقوۆ اتىنداعى وبلىستىق فيلارمونيا ءارتىسى گ.ابۋوۆا, ارىس قالالىق №8 ۆ.كوماروۆا اتىنداعى جالپى ورتا مەكتەبىنىڭ مۇعالىمى س.كورچاگينا سىندى تاعى باسقا ازاماتتار ماراپاتتالدى.
مەرەكەلىك شارا «قازىنا», «شامسينۇر» بي ۇجىمدارىنىڭ ورىنداۋىمەن «تىرشىلىكتىڭ باستاۋى - قازىعۇرت» سازدى-حورەوگرافيالىق كومپوزيتسياسىمەن جالعاستى. ش.قالداياقوۆ اتىنداعى وبلىستىق فيلارمونيا جانە وبلىستىق وپەرا جانە بالەت تەاترلارىنىڭ ونەرپازدارى جينالعانداردى ونەرىمەن ءتانتى ەتسە, كەش سازگەر ا.اسانوۆتىڭ «ماڭگىلىك ەل ءۇشىن» انىمەن قورىتىندىلاندى.