بۇگىن تاۋەلسىزدىك كۇنى قارساڭىندا ەلباسى كىتاپحاناسىندا وتكەن مەملەكەت باسشىسى نۇرسۇلتان نازارباەۆتىڭ «تاۋەلسىزدىك ءداۋىرى» اتتى جاڭا كىتابىنىڭ سالتاناتتى تۇساۋكەسەر راسىمىندە ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ەلباسى ەڭبەگىن وقۋ قۇرالى رەتىندە ءبىلىم جۇيەسىندە كەڭىنەن پايدالانۋ قاجەت دەگەن ۇسىنىسىن ايتتى, دەپ حابارلايدى egemen.kz.
«كوپتەن كۇتكەن كىتاپقا بۇگىن قول جەتتى. بۇل ەڭبەك وسى وتىرعان ارقايسىمىزدىڭ تاعدىرىمىز تۋرالى. ەلىمىزدىڭ شيرەك عاسىرداعى بارى مەن نارى تۋرالى, ەڭبەگىمىز بەن ەرلىگىمىز تۋرالى, جارقىن ىستەرىمىز تۋرالى كىتاپ. بۇل ەلباسىنىڭ ەلگە سىيى, ەلدىكتىڭ باياندى باعىنا, باعانالى ورداسىنا سىيى», دەگەن ۋنيۆەرسيتەت رەكتورى تۇساۋكەسەر ءراسىمىنىڭ تاۋەلسىزدىك كۇنىنىڭ قارساڭىندا, تۇڭعىش پرەزيدەنت – ەلباسى كىتاپحاناسىندا ءوتۋىنىڭ رامىزدىك, سيمۆولدىق ءمانى بار ەكەنىن اتاپ ءوتتى.
تاۋەلسىزدىك تۇجىرىمداماسى بولعان بۇل كىتاپتى بارشا قازاقستاندىق كورىپ, وي ءتۇيۋى كەرەك دەپ بىلەتىن ەرلان ءباتتاش ۇلى جاڭا ەڭبەكتى بوياۋى كەپپەي تۇرىپ وقىعانىنا قۋانىشتى ەكەنىن ايتتى.
«بۇل كىتاپ – قازاقستان جولىنىڭ ايناسى, كۇندەلىگى, شەجىرەسى. تۇجىرىمدامالى, ىرگەلى ەڭبەك. ءبىز تاريحشىلار ءجۇرىپ وتكەن تاۋەلسىزدىك جىلدارداعى شيرەك عاسىرىمىزدى بايىپتايتىن جانە شىنايى باعا بەرەتىن ورەلى ەڭبەكتى كۇتىپ جۇرگەنبىز. ونى ەلباسىمىزدىڭ جازۋى ەلىمىز ءۇشىن دە, ەلدىگىمىز ءۇشىن دە ۇلكەن وقيعا دەپ بىلەمىن. نۇرسۇلتان نازارباەۆ جاي ەل باسشىسى ەمەس. قۇرۋشى, جاسامپاز, كورەگەن پرەزيدەنت. ەندەشە بۇل ەڭبەك جاڭا مەملەكەتتى ءوز قولىمەن, ءوز باستاماسىمەن تۇرعىزعان اسا ءىرى تاريحي تۇلعانىڭ ءارى جىلناماسى, ءارى ءداۋىرناماسى», دەدى ە.سىدىقوۆ.
سونداي-اق, ول مەملەكەت قۇرۋدىڭ ءجون-جوسىعىن دا, تەوريا, پراكتيكاسىن دا عىلىمي ورەدە مەڭگەرگەن نۇرسۇلتان ءابىش ۇلىنىڭ ەل تاريحىن جازۋعا تولىق مورالدىق قۇقى بار ەكەنىن ايتا كەلىپ كىتاپ توڭىرەگىندە بىرقاتار ۇسىنىستارىن ورتاعا سالدى.
«ەڭ الدىمەن, بۇل ەڭبەكتى وقۋ قۇرالى رەتىندە ءبىلىم جۇيەسىندە كەڭىنەن پايدالانۋ قاجەت. ەكىنشىدەن, كىتاپتاعى تۇجىرىمدامالار, ويلار مەن ماڭىزدى فاكتىلەر بويىنشا ءتۇرلى مادەني-تانىمدىق شارالار كەشەنىن ۇيىمداستىرعانىمىز دۇرىس. ۇشىنشىدەن, ەل تاريحىن, ونىڭ دەڭگەيىن تانىتاتىن جاڭا ەڭبەكتى كوپ كەشىكتىرمەي بىرىككەن ۇلتتار ۇيىمىنىڭ تىلدەرىنە اۋدارىپ باستىرتىپ, الەمگە تاراتقانىمىز ءجون. سونداي-اق, تەحنولوگيا داۋىرىندە ەلباسى ەڭبەگىن تسيفرلى جۇيەگە ءتۇسىرىپ, ءتۇرلى فورماتتا ناسيحاتتاۋ ءتيىس», دەدى ول.
ايتا كەتەيىك, جاڭا تۋىندىدا ەگەمەن ەلدىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن 26 جىلدىق تاۋەلسىزدىك داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى باياندالعان. تۇساۋكەسەر راسىمىنە پارلامەنت دەپۋتاتتارى, قوعام قايراتكەرلەرى, «نۇر وتان» پارتياسىنىڭ باسشىلىعى مەن مۇشەلەرى, عىلىم, زيالى قاۋىم, اقپارات قۇرالدارى جانە جاستار ۇيىمدارىنىڭ وكىلدەرى, ساراپشىلار مەن ستۋدەنتتەر قاتىستى.
مايگۇل سۇلتان,
«ەگەمەن قازاقستان»