تاۋەلسىزدىك مەرەكەسى قارساڭىندا قىزىلوردادا جاپپاسباي باتىر كوشەسىندەگى 2 كوپقاباتتى ءۇيدىڭ تۇرعىندارى جاڭا قونىسقا كوشتى. جالدامالى تۇرعىن ءۇيدىڭ كىلتتەرى حالىقتىڭ الەۋمەتتىك جاعدايى شەكتەۋلى توپ وكىلدەرى - كوپبالالى وتباسىلار, مۇگەدەكتەر, سوعىس ارداگەرلەرى مەن اتا-انا قامقورلىعىنسىز قالعان ازاماتتارعا تابىستالدى.
قىزىلوردا وبلىسىنىڭ اكىمى قىرىمبەك كوشەرباەۆ تۇرعىنداردى تاۋەلسىزدىك كۇنىمەن جانە قونىستويىمەن قۇتتىقتادى.
"بيىل ءبىز وبلىس ورتالىعىنىڭ كۇرمەۋلى ماسەلەلەرىنىڭ ءبىرىن شەشتىك, اپاتتى ۇيلەردى جويىپ, تۇرعىنداردى جاڭا قونىسقا كوشىردىك. سوڭعى 4 جىلدا وبلىس ورتالىعىندا 7 مىڭنان استام تۇرعىنى بار 12 شاعىن اۋدان بوي كوتەردى. بۇدان بولەك, سىرداريانىڭ سول جاعالاۋىنان جاڭا قالانىڭ قۇرىلىسى باستالدى», - دەدى وبلىس اكىمى.
بالالار ۇيىندە تاربيەلەنگەن باۋىرجان يبراەۆ باسپانالى بولعانداردىڭ اتىنان وبلىس باسشىلىعىنا العىس ايتتى.
«وسىنداي قولداۋ كورسەتىپ وتىرعاندارىڭىز ءۇشىن مىڭ العىس. ءبىز, جاستار, سەنىمدەرىڭىزدى اقتاپ, ءوڭىردىڭ وركەندەۋى ءۇشىن ايانباي ەڭبەك ەتۋگە ارقاشان دايىنبىز», - دەدى ول.
سونداي-اق, جەرلەستەرىنە اكادەميك اسقار جۇمادىلداەۆ تا جىلى لەبىزىن جەتكىزدى.
«قازاقستاننىڭ تاۋەلسىزدىگىن جاريالاعان 360 دەپۋتاتىنىڭ ءبىرى مەن بولاتىنمىن. سول ۋاقىتتا قىزىلوردادا, وسى اۋداندا تۇردىم. ءالى ەسىمدە, سول كەزدە بۇدان دا سۋىق قىس بولدى, سۋ, جارىق, جىلۋ, جول جوق. ءبىز دە بۇگىنگىدەي ەلدىگىمىزدى, ەگەمەندىگىمىزدى ساقتاپ قالا الامىز با دەگەن ۋايىم بولعانىن جاسىرمايمىز. ال ەندى قىزىلوردامىز قالاي كوركەيىپ, ۇانداي كەرەمەت ۇيلەر سالىنىپ جاتقانىن كورىپ, قۋانىپ وتىرمىز!» - دەدى اكادەميك.
ەستەرىڭىزگە سالا كەتەيىك, بيىل قالادا 61 كوپقاباتتى ءۇيدىڭ قۇرىلىسى جۇرۋدە. 4 جارىم جىلدا ايماقتا قۇرىلىس كولەمى 3,5 ەسەگە وسسە, وبلىس ورتالىعىندا 8 ەسەگە ارتتى.