بۇگىن الماتىدا جرۆي مەن تۇماۋدى الدىن الۋ ماسەلەلەرىنە ارنالعان ءباسپاسوز ءماجىلىسى ءوتىپ, بۇل ءىس-شارانى وتكىزۋگە قالالىق دەنساۋلىق ساقتاۋ باسقارماسى ۇيىمداستىردى.
جۋرناليستەرمەن وتكەن جيىندا قالالىق دەنساۋلىق ساقتاۋ باسقارماسى دارىلىك, ماتەريالدىق-تەحنيكالىق قامسىزداندىرۋ جانە مونيتورينگ ءبولىمىنىڭ باسشىسى جانار بورانباەۆا, جۇقپالى جانە پارازيتتىك اۋرۋلارعا ەپيدەميولوگيالىق قاداعالاۋ جاساۋ ءبولىمىنىڭ باس مامانى ۆلاديمير يۋسۋپوۆ, يجەكەنوۆ اتىنداعى قالالىق كلينيكالىق جۇقپالى اۋرۋحانا باس دارىگەرىنىڭ ورىنباسارى مەن تامارا ۋتاگانوۆا مەن دەنساۋلىق ساقتاۋ باسقارماسىنىڭ باس مامانى ەلۆيرا يبراگيموۆا قاتىسىپ, كوتەرىلگەن ماسەلەگە قاتىستى ساۋالدارعا تۇسىنىكتەمە بەردى.
سپيكەرلەر ءبىر اۋىزدان قازىر الماتى قالاسىندا جرۆي جانە تۇماۋمەن بايلانىستى ەپيدەميولوگيالىق جاعداي تۇراقتى دەڭگەيدە ساقتالىپ وتىر دەدى. وتكەن جىلمەن سالىستىعاندا تۇماۋ 23 پايىزعا ازايعان. مۇنىڭ بىرنەشە سەبەپتەرى بار. بىرىنشىدەن جەلتوقسان ايىنا دەيىن الماتىدا تۇراقتى جىلى اۋا-رايى ساقتالدى. ەكىنشىدەن, الدىن الا ساقتىق شارالارى مەن ابايسىزدا تۇماۋراتىپ قالعانداردىڭ كوپشىلىكپەن بايلانىسى شەكتەلۋى دە ءوز ناتيجەسىن بەرىپ وتىر.
سول سياقتى كورسەتىلگەن كەزەڭ ىشىندە تۇماۋعا جاتپايتىن باسقا دا ۆيرۋستاردى جۇقتىرعان 65 ادام تەكسەرىلگەن. ولاردىڭ اراسىندا 4 ادەنوۆيرۋس, 3 رس ۆيرۋس, 10 بوكاۆيرۋس, 6 رينوۆيرۋس انىقتالدى.
سپيكەرلەر اتاپ وتكەندەي, تۇماۋدى الدىن الۋدىڭ ەڭ ءتيىمدى جولى – ەگۋ. ويتكەنى ۆاكتسينا سالۋ تۇماۋدىڭ ءورشىپ كەتۋى مۇمكىن ماۋسىمىندا ونىڭ تۇرلەرىنەن ساقتانۋعا كومەكتەسەدى.
جىل سايىن الماتىدا تۇماۋعا قارسى ۆاكتسينا جوعارى قاۋىپ توبىنا جاتاتىن ازاماتتاردىڭ بارلىعىنا سالىنادى.
بيىل ۆيرۋس جۇقتىۋرعا بەيىم توپقا جاتاتىن ازاماتتارعا ۆاكتسينا سالۋ ماقساتىندا «گريپپول پليۋس» (رەسەي) ۆاكتسيناسىنىڭ 100 مىڭ دوزاسى جەرگىلىكتى بيۋدجەت قارجىسىنا ساتىپ الىندى. ۇستىمىزدەگى جىلدىڭ 13 جەلتوقسانىنداعى جاعدايعا سايكەس, 193199 قالا تۇرعىنىنا نەمەسە جالپى حالىقتىڭ 11,1 پايىزىنا تۇماۋعا قارسى ۆاكتسينا جاسالعان. ولاردىڭ ىشىندە جوعارعى قاۋىپ توبىنا جاتاتىن 100 مىڭ ادامعا (5,7%) جەرگىلىكتى بيۋدجەت ەسەبىنەن, 80079 ادامعا (4,6%) جۇمىس بەرۋشى ەسەبىنەن, 13120 ادامعا (0,7%) اقىلى نەگىزدە ۆاكتسينا جاسالدى.
ۆاكتسينا الۋى ءتيىس حالىق كونتينگەنتى ىشىندە: 14 جاسقا دەيىنگى بالالار سانى – 38145 (ەگىلگەن ازاماتتاردىڭ جالپى سانىنىڭ 19,7%-ى), مەديتسينالىق قىزمەتكەرلەر – 21546 ادام (نەمەسە 11,2%), جۇكتىلىكتىڭ ەكىنشى جانە ءۇشىنشى كەزەڭىندەگى ايەلدەر – 7811 (نەمەسە 4,1%). ۆاكتسينادان كەيىنگى اسقىنۋلار تىركەلمەگەن.
جەكەمەنشىك مەديتسينالىق ورتالىقتاردا تۇماۋعا قارسى قازاقستان رەسپۋبليكاسى اۋماعىندا رۇقسات ەتىلگەن ۆاكتسينالار قولدانىلدى.
ايناش ەسالي,
«ەگەمەن قازاقستان»
الماتى