استانا قالاسىندا قازاقستان رەسپۋبليكاسى تۇڭعىش پرەزيدەنتىنىڭ مۋزەيى بار. ول ەلباسىنىڭ بۇرىنعى رەزيدەنتسياسىندا ورنالاسقان. مۋزەي 2005 جىلدىڭ 4 شىلدەسىنەن باستاپ جۇمىس ىستەپ كەلەدى. جالپى الاڭى 10000 شارشى مەتردەن اسادى. مۋزەي ەكسپوزيتسيالارى ءتورت قاباتتى تۇگەلدەي الىپ جاتىر.
وسىندا مەملەكەت باسشىسىنىڭ ءومىر جولىنا قاتىستى بارلىق دەرەكتەر جيناقتالعان. اتاپ ايتقاندا, پرەزيدەنتتىڭ بالا كەزدەگى فوتوسۋرەتتەرى, اتا-اناسى قولدانعان وتباسىلىق بۇيىمدار, شەتەلدىك مەملەكەت باسشىلارى تاراپىنان تابىستالعان قۇندى سىيلىقتار مەن اسا مارتەبەلى ناگرادالار جانە تاعى باسقالار.
وسىلاردىڭ اراسىندا ەلباسى نۇرسۇلتان نازارباەۆ ءار كەزدەرى قولدانعان قالامنىڭ بىرنەشەۋى دە ەكسپوزيتسياعا قويىلىپتى. سونىڭ ىشىندە ءبىزدىڭ نازارىمىزدى ەرەكشە تارتقانى – التىن ساقينالى قارا قالام. بۇل جادىگەر ءدال قازىر مەكەمەنىڭ ءۇشىنشى قاباتىندا ورنالاسقان «رامىزدەر» زالىندا تۇر
مۋزەي قۇندىلىقتارىن ەسەپكە الۋ جانە ساقتاۋ قىزمەتىنىڭ جەتەكشىسى زۋلفيا مولداعارينوۆانىڭ ايتۋىنا قاراعاندا, بۇل قالاممەن ەلباسى نۇرسۇلتان نازارباەۆ 1998 جىلى 6 مامىر كۇنى «اقمولا قالاسىنىڭ اتىن «استانا» دەپ وزگەرتۋ تۋرالى» جارلىققا قول قويىپتى.
بەكەن قايرات ۇلى, «ەگەمەن قازاقستان»
سۋرەتتى تۇسىرگەن ەرلان ومار, «ەگەمەن قازاقستان»