بۇگىن «ەگەمەن قازاقستان» باسىلىمىنىڭ عيماراتىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ, م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ, ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ جۋرناليستيكا سالاسى بويىنشا ءبىلىم الىپ جاتقان ستۋدەنتتەرى باس قوستى.
يگى شارانى ءال-فارابي اتىنداعى قازاق ۇلتتىق ۋنيۆەرسيتەتىنىڭ (قازۇۋ) جۋرناليستيكا فاكۋلتەتى VI موبيلدىك مەديا مەكتەبى اياسىندا ۇيىمداستىرىپ وتىر. وعان استانا, الماتى قالالارىنان بولەك, جامبىل, قاراعاندى, قىزىلجار وڭىرلەرىنىڭ ستۋدەنتتەرى قاتىستى.
القالى جيىنعا باسىلىم باسشىسى دارحان قىدىرالى قاتىسىپ, بولاشاق تىلشىلەرگە گازەتتىڭ وتكەنىنەن سىر شەرتىپ, جوسپارلار جايلى وي ءبولىستى جانە ءومىرىن جۋرناليستيكامەن بايلانىستىراتىن ءاربىر ادام الدىمەن گازەتتىڭ تىنىس-تىرشىلىگىمەن تانىسۋى كەرەك ەكەنىن ايتتى. گازەت باسشىسىنىڭ ايتۋىنشا, جازا بىلەتىن مامان ءاردايىم سۇرانىسقا يە جۋرناليستەردىڭ قاتارىندا بولادى.
– قازىر رەداكتسيامىزدا جاستاردىڭ قاتارى كوبەيدى. الداعى جىلى دا بۇل ءۇردىس جالعاسا بەرمەك. ءبىز قازىر ينتەرنەت-رەداكتسيامىزدى كۇشەيتىپ جاتىرمىز. وسى ماقساتتا سايتىمىز قازاق تىلىنەن بولەك, بيىل اعىلشىن جانە ورىس تىلدەرىندە اقپارات تاراتۋدى باستادى. ناتيجەسىندە, ستۋدەنتتەردىڭ اعىلشىن تىلىندەگى ماقالالارى جاريالانا باستادى. مىنە, بۇل جاستارعا ءوزىن ءوزى كورسەتۋى ءۇشىن «ەگەمەن قازاقستان» تاراپىنان بەرىلگەن ۇلكەن مۇمكىندىك, – دەدى دارحان قىدىرالى.
وسىدان كەيىن ءسوز العان ساياسي عىلىمدارىنىڭ دوكتورى, پروفەسسور گۇلميرا سۇلتانباەۆا تاۋەلسىزدىكتىڭ قارساڭىندا استانا قالاسىنا ارنايى اتباسىن بۇرعانىن ايتا كەلىپ, بۇل كەزدەسۋدىڭ جاستارعا ۇلكەن كومەگى تيەتىنىن العا تارتتى.
سونىمەن قاتار, ول قازۇۋ رەكتورىنىڭ ۇيىتقى بولۋىمەن وسىعان دەيىن «ەگەمەن قازاقستاننىڭ» 90 جانە 95 جىلدىق مەرەيتويلارىنىڭ قۇرمەتىنە بىرقاتار ءىس-شارا وتكەنىن ەسكە سالىپ, الداعى ۋاقىتتا ۋنيۆەرسيتەت عيماراتىندا «ەگەمەن قازاقستان» وقۋ-زەرتحاناسى اشىلۋ جوسپارلانىپ وتىرعانىن ايتتى. بۇدان بولەك, قازۇۋ-دان كەلگەن ۇستاز باسىلىمدا بولىپ جاتقان وزگەرىستەردى, سايت بەتىندە جاڭادان قوسىلعان اۋديوفورماتتاعى ماقالالاردى قۋانا-قۋانا قابىلداعانىن, ستۋدەنتتەر «ەگەمەننىڭ» ءاربىر ماقالاسىن وقۋ بارىسىندا پايدالاناتىنىن جەتكىزدى.
ءسوز سوڭىندا گۇلميرا سۇلتانباەۆا «ەگەمەن قازاقستان» كىتاپحاناسىنا «ماڭگىلىك ەل» كاك ينتەللەكتۋالنايا ماتريتسا كازاحستانا» كىتابىن سىيعا تارتىپ, وسىنداي كەلەلى كەزدەسۋدىڭ وتۋىنە مۇرىندىق بولعانى ءۇشىن العىس ءبىلدىردى.
ستۋدەنتتەر كەزدەسۋدەن كەيىن گازەتتىڭ وندىرىستىك-شىعارماشىلىق بولىمدەرىنىڭ, ينتەرنەت-رەداكتسياسىنىڭ جۇمىستارىمەن تانىسىپ, وزدەرىنە قىزىقتى سۇراقتارعا جاۋاپ الدى.