ءبىزدىڭ زاماننىڭ كەمەڭگەرى

قاتىسۋشىلار «جاس جۋرناليست», «ۇزدىك ستۋدەنت», «جاس عالىم», «جاس اسكەري قىزمەتكەر», «ۇزدىك جاس وتباسى», «جاس دارىگەر», «جاس ونەرپاز», «جاس مەملەكەتتىك قىزمەتكەر», «جاس ۇستاز», «جاس كاسىپكەر», «ۇزدىك اۋىل شارۋاشىلىق مامانى», «جاس سپورتشى», «جاس باتىر» سىندى 17  نوميناتسيا بويىنشا ماراپاتتالدى.  قۋانىشتىسى, سۋلەيمان دەميرەل اتىنداعى ۋنيۆەرسيتەتتىڭ اعا وقىتۋشىسى ەرمەك توقتاروۆ «ۇزدىك جاس عالىم» اتانىپ, ارنايى ديپلوممەن قارجىلاي سەرتيفيكاتقا يە بولدى.

بۇل كوشباسشىلار جەكە تۇلعا رەتىندە جانە كاسىبي جەتىستىكتەرىمەن  وزگەلەرگە ۇلگى بولارلىقتاي ءبىزدىڭ زاماننىڭ جاڭا باتىرلارى. بۇلاردىڭ ماراپاتقا لايىق ەڭبەكتەرى ەل ەرتەڭى ءۇشىن بيىك بەلەستەردى باعىندىرۋعا جول اشاتىن ناقتى تىرەك, - دەپ اتاپ ءوتتى وبلىس اكىمى سىيلىقتاردى تابىستاي وتىرىپ.  

ايتا كەتكەن ءجون, ەرمەك توقتاروۆتىڭ  ءوزى قاراپايىمدىلىق تانىتىپ, ەلىمىزدە بۇدان دا بيىك دارەجەگە يە تالانتتى جاستار كوپ دەگەن پىكىردە. جاس عالىم وزىنە تابىستالعان ماراپاتتى – تاڭداعان سالاسى بويىنشا تاباندى ەڭبەكتى ءارى قاراي جالعاستىرۋ ءۇشىن ارتىلعان ۇلكەن سەنىم دەپ تۇسىنەدى.

ەرمەك توقتاروۆ پاۆلودار قالاسىنىڭ تۋماسى, قاراپايىم وتباسىنان شىققان.  ايتۋىنشا, بىلىمگە دەگەن قۇشتارلىعى 40 جىل مەكتەپتە ءتالىم بەرگەن ناعاشى اجەسىنەن دارىعان قاسيەت. جاس عالىم 2016 جىلى «قازاقستاندىقتاردىڭ ۇلتتىق سايكەستىگىن ترانسفورماتسيالاۋداعى عالامتوردىڭ ءرولى» تاقىرىبىندا ديسسەرتاتسياسىن قورعاعان. عالىمنىڭ ايتۋىنشا, زەرتتەۋ مەن الەۋمەتتىك-فيلوسوفيالىق تالداۋ بارىسىندا وتاندىق عىلىم مەن شەتەلدىك عىلىمدا ءالى كۇنگە دەيىن شەشىمىن تاپپاعان كوپتەگەن تىڭ دۇنيەلەر تابىلعان. ءوزىنىڭ عىلىمي جۇمىسىندا ەرمەك زاماناۋي اقپاراتتىق-كوممۋنيكاتسيالىق تەحنولوگيالار مەن ۆيرتۋالدىق شىنايىلىق ۇلتتىق سايكەستىكتى قالاي قالىپتاستىرادى دەگەن سۇراقتاردى زەرتتەگەن.  ونىڭ پىكىرىنشە, ەلىمىزدە ۆيرتۋالدى قارىم-قاتىناس جاڭادان قالىپتاسىپ, كوممۋنيكاتيۆتىك تاجىريبە ۆيرتۋالدى تۇرگە كوشۋدە. ايتا كەتكەن ءجون, ەرمەكتىڭ 2013 جىلى باستالعان عىلىمي جۇمىسى ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا جارىق كورگەن ۇلتتىق بىرەگەيلىكتى ساقتاۋ يدەياسىمەن سايكەس كەلىپ, بۇگىنگى كۇن تارتىبىندە كەڭىنەن تالقىعا سالىنعان وزەكتى سۇراقتاردىڭ ءبىرى بولىپ تابىلادى.

- جالپى, كەڭەس داۋىرىنەن كەيىنگى كەڭىستىكتە ۇلتتىق ساياساتتتىڭ سۇراقتارى ەرەكشە ماڭىزدى بولىپ, ۇلتتىق دامۋ كەزەڭىنەن ءوتىپ, ءوز بەتىنەشە مەملەكەت قۇرىپ كەلە جاتقان ەلدەرگە  عانا ەمەس, سونىمەن قوسا ورتالىق ازيا ەلدەرىندەگى جاعدايدى باقىلاپ وتىرعان حالىقارالىق قاۋىمداستىقتىڭ دا ەرەكشە نازارىندا, - دەپ تۇيىندەيدى  ەرمەك توكتاروۆ.

جاس عالىم اتالمىش تاقىرىپتى ساياساتتانۋشى, ءدىنتانۋشى, الەۋمەتتانۋشى, مادەنيەتتانۋشى ارىپتەستەرىنىڭ قاتىسۋىمەن وتكەن ءتۇرلى كاسىبي الاڭداردا كوتەرىپ,  بىرقاتار جاعىمدى پىكىرلەرگە يە بولعان. ەرمەكتىڭ ايتۋىنشا, قازاقستاننىڭ جاس عالىمدارى عىلىمي سالادا دامي الاتىن زور مۇمكىندىككە يە. 

- شىن مانىندە شەتەلدىك ماقالالاردى وقي وتىرىپ, قانداي دا ءبىر بىرەگەي جاڭالىقتاردى كورمەيمىن, نەگىزىندە ولار قاراپايىم زەرتتەۋلەر عانا.  ونداي عىلىمي جۇمىستاردى ءبىزدىڭ عالىمدار دا جاساپ ءجۇر. ەگەر دە ءبىز بۇعان كوبىرەك كوڭىل اۋدارىپ, ونى اعىلشىن تىلىندە جازاتىن بولساق, ءبىزدىڭ عىلىمي ەڭبەكتەرىمىز شەتەلدىك عالىمداردىڭ جۇمىسىنان ارتىق بولماسا, ەش كەم ەمەس. بىزدە الەمدىك دەڭگەيدە تىڭ جاڭالىقتار اشاتىن كوپتەگەن تالانتتار بار. سدۋ-دا بۇل ءۇشىن جان-جاقتى جاعداي جاسالعان جانە وقۋ ورنىنىڭ باسشىلىعى كورسەتىپ وتىرعان قولداۋىنا زور العىسىمدى بىلدىرەمىن, - دەيدى توقتاروۆ.

بۇگىنگى تاڭدا ەرمەك توقتاروۆ ەڭ جاس فيلوسوفيا عىلىمدارىنىڭ دوكتورى, Phd مامانى, 19 عىلىمي ماقالانىڭ اۆتورى (ونىڭ 6 - شەتەلدىك, 13 – وتاندىق). عالىم الداعى ۋاقىتتا بىرەگەي عىلىمي زەرتتەۋلەر جۇرگىزىپ, شەتەلدىك جوعارى رەيتينگتەگى باسپرالارعا ەڭبەكتەرىن جاريالاپ, سونىمەن قوسا عىلىمي سالانىڭ مەنەدجمەنتىن يگەرۋدى كوزدەپ وتىر. ءبىلىم وردامىزدا عالىم قۇقىق جانە الەۋمەتتىك عالىمدار فاكۋلتەتىندە   فيلوسوفيانىڭ جانە ساياساتتانۋدىڭ جالپى كۋرستارىنان ساباق بەرەدى.  ونىڭ پىكىرىنشە عالىمعا بىرىنشىدەن ءدارىس بەرۋ, بىلگەن-تۇيگەنىن جادىندا ساقتاۋعا, جاڭا مۇمكىندىكتەر  اشىپ, ءارى جاستارعا عىلىمنىڭ سوڭعى جاڭالىقتارىن جەتكىزۋگە زور مۇمكىندىك بەرەدى. سدۋ ستۋدەنتتەرىنە جانە بارلىق قازاق جاستارىنا ەرمەك توقتاروۆ ءوز كۇشتەرىنە سەنىپ, ايانباي ەڭبەك ەتىپ, تەك عانا العا ۇمتىلۋدى تىلەيدى.    

سانداعان جىلدار بويى كەمەڭگەرلىكتىڭ تىلسىم جۇمباعىنىڭ شەشىمىنە  عالىمداردىڭ بىرنەشە ۇرپاعى جاۋاپ ىزدەۋدە. بىرەۋلەرى تۇقىم ەرەكشەلىگىمەن بايلانىستىرسا, ەكىنشىلەرى دارىندىلىق بىلىممەن كەلەدى دەيدى. ال وزگەلەرى بولسا «كەمەڭگەر بولىپ تۋىلادى» دەگەن ۇستانىمدا. ال ءبىز قازىرگى زاماننىڭ كەمەڭگەرلەرى ورتامىزدا دەپ زور ماقتانىشپەن ايتا الامىز, ولار قوعامنىڭ دامۋىنا ۇلەس قوسىپ, بيىك بەلەستەردى باعىندىرىپ, وتاندىق عىلىمدى كەڭىنەن ناسيحاتتاپ ءجۇر.