سيريادا يگيل سودىرلارىنىڭ كوزى تولىقتاي جويىلدى

«سيرياداعى يگيل توبىنىڭ مۇشەلەرى جەرمەن-جەكسەن بولدى. ال اۋماق تولىعىمەن ەكسترەميستەردەن تازارتىلدى. بىرەر ساعات بۇرىن رەسەي قورعانىس ءمينيسترى سەرگەي شويگۋ وسى تۋرالى جوعارعى باس قولباسشى, پرەزيدەنت ۆلاديمير پۋتينگە باياندادى», – دەدى ۆالەري گەراسيموۆ.

ونىڭ ايتۋىنشا سارسەنبى كۇنى, ياعني 6 جەلتوقسان كۇنى سيريا اسكەرى دەي-ءاز-زور پروۆينتسياسىندا يگيل-ءدىڭ قالعان مۇشەلەرىنىڭ كوزىن جويعان. «وسىلايشا, قازىرگى ۋاقىتتا سيريا جەرىندە يگيل يەلىك ەتىپ وتىرعان ەشقانداي ايماق جوق», – دەپ قوستى گەراسيموۆ.

كوپ ۇزاماي كرەمل سايتىندا سەرگەي شويگۋدىڭ ۆلاديمير پۋتينگە بايانداما جاساعانى حابارلاندى. «ەكى ساعات بۇرىن قورعانىس ءمينيسترى ەۆفراتتىڭ شىعىس جانە باتىس جاعالاۋلارىنداعى ەكسترەميستەر تولىعىمەن جويىلعانىن حابارلادى», – دەدى پۋتين جۋرناليستەرگە بەرگەن پىكىرىندە.

5 جەلتوقساندا رەسەي قورعانىس ءمينيسترى سيريا ۇكىمەتىنىڭ اسكەرى اتالعان توپ سودىرلارىنىڭ قالعان بولىگىن جويۋعا كىرىسكەنىن حابارلاعان بولاتىن.

ايتا كەتەيىك, قاراشا ايىندا رەسەي بيلىگى جىل سوڭىنا دەيىن سيرياداعى رەسەي وپەراتسياسى ءساتتى اياقتالۋى ءتيىس ەكەنىن جەتكىزگەن. ال باستى ماقسات – يگيل مۇشەلەرىن تولىقتاي جەڭۋ. ناقتىراق ايتا كەتەيىك, 20 قاراشا كۇنى سوچيدە پۋتين مەن سيريا پرەزيدەنتى باشار اساد كەزدەسۋىندە وپەراتسيا جۇمىستارىن تەزىرەك اياقتاۋ تۋرالى كەلىسىلگەن بولاتىن. «نەگىزگى ماقسات قازىردىڭ وزىندە اياقتالۋعا جاقىن قالدى. سوندىقتان تاياۋ ارادا بۇل ماسەلەنى شەشۋىمىز مۇمكىن», – دەگەن ەدى سول كەزدەسۋدە ۆلاديمير پۋتين.

ال 21 قاراشا كۇنى سوچيدە پۋتين يران مەن تۇركيا ەلدەرىنىڭ پرەزيدەنتتەرىمەن كەزدەسىپ, سيرياداعى ماسەلەنى تالقىلادى. وسى كەزدەسۋدە پۋتين سيريا ۇكىمەتىنىڭ اسكەرى ەلدىڭ 98% اۋماعىن ءوز باقىلاۋىنا العانىن العا تارتقان. «لاڭكەستەر ءالى دە قارسىلىق تانىتۋى مۇمكىن, الايدا ءبىزدىڭ اسكەري-عارىش كۇشتەرىمىزدىڭ سوققىلارىنا توتەپ بەرە المايدى», – دەدى.

ارادا ەكى كۇن وتكەننەن كەيىن ۆالەري گەراسيموۆ تىلشىلەرگە بەرگەن سۇحباتىندا سيرياداعى رەسەي اسكەرى ازايۋى مۇمكىن ەكەندىگىن ايتقان. ال رەسەيدىڭ قاۋىپسىزدىك كەڭەسىنىڭ حاتشىسى نيكولاي پاترۋشەۆ 30 قاراشا كۇنى سيرياداعى رەسەيلىك كونتينگەنتتى ازايتۋ جۇمىسى باستالىپ كەتكەنىن مالىمدەدى.

ساراپشىلار ءپۋتيننىڭ سيرياداعى وپەراتسيا جۇمىستارىن پرەزيدەنتتىك سايلاۋ الدىنداعى ناۋقان باستالعانعا دەيىن اياقتايدى دەپ كۇتكەن. ەسكە سالا كەتەيىك, كەشە, ياعني 6 جەلتوقساندا پۋتين گاز زاۋىتىنىڭ 85-جىلدىعىنا ارنالعان جيىندا سايلاۋعا تۇسەتىنىن حابارلادى.

رەسەي سيريا جەرىندە ەكى جىلدان استام ۋاقىت شايقاسىپ كەلەدى.

دايىنداعان ايان ءابدۋالي, «ەگەمەن قازاقستان»