اتا-بابامىزدىڭ تاۋەلسىز دە قۋاتتى ەلگە اينالساق دەگەن ارماندارى كەزىندە ورىندالماس قيالداي كورىنسە دە, بۇگىندە ول ۇمتىلىستىڭ بىرتىندەپ ءىس جۇزىنە اسقاندىعىنىڭ ناقتى كۋاسى بولىپ وتىرمىز. ەلدىڭ باي-قۋاتتى بولۋى سول ەلدىڭ ءار ازاماتىنىڭ ماقتانىشى ەكەنى ءسوزسىز. بۇل ورايدا, ەڭ الدىمەن, مەملەكەت باسشىسى نۇرسۇلتان نازارباەۆتىڭ «100 ناقتى قادام» ۇلت جوسپارىنداعى كوزدەلگەن مەجەلەر كوڭىلگە سەنىم ۇيالاتارى بارشاعا ايان.
اشىعىن ايتۋ كەرەك, «100 ناقتى قادام» ۇلت جوسپارى مەملەكەتتىڭ جانە ەلدىڭ ءار ازاماتىنىڭ حال-احۋالىن جاقسارتۋعا ارنالعان ۇلكەن باعدارلامالىق قۇجات بولىپ تابىلادى. ونىڭ ءمانى مەن ماعىناسى تەرەڭدە جاتىر. مۇندا مەملەكەتتىك سالالارعا تەك ۇلت جوسپارىنداعى باستى مىندەتتەردى ورىنداپ قويۋ عانا ەمەس, جەتىستىككە قاراي جاسالعان ءار قادامنىڭ ناقتى جەمىسىن قاراپايىم ادامدار كورۋگە تيىستىلىگى قوزعالدى. ءار قادامنىڭ ورىندالۋى – دامۋدىڭ, كوركەيۋدىڭ كورىنىسىنە اينالدى. ءسويتىپ باعدارلامانىڭ كوزدەگەنى كوڭىلدەن شىقتى دەپ تولىق ايتا الامىز. ال «حالىق ايتسا, قالت ايتپايدى» دەگەندەي, ۇلت جوسپارىنىڭ ورىندالعان قادامدارىنىڭ ناتيجەسى كوڭىلدەن شىعىپ جاتقانى باسا ايتىلۋدا.
ماسەلەن, قازىرگى كۇندە ءار ادام ءوز كاسىبىن دوڭگەلەتۋى ءتيىس. ال كاسىپتىڭ نەسىبەسىن كورۋ ءۇشىن ءار كاسىپكەر الاڭسىز قىزمەت ەتە الۋى كەرەك. مىنە, وسى ورايدا زاڭنىڭ ۇستەمدىگى ادال ەڭبەك ەتەمىن, ونىڭ قىزىعىن كورەمىن دەيتىن ادامدارعا اۋاداي قاجەت. ءبىر سوزبەن ايتقاندا, مەنشىك قۇقىعىنا كەپىلدىك بەرەتىن, كاسىپكەرلىك قىزمەت ءۇشىن, كەلىسىم-شارتتىق مىندەتتەمەلەردى قورعاۋ ءۇشىن جاعداي جاسايتىن, تۇپتەپ كەلگەندە ەكونوميكالىق ءوسىم ءۇشىن نەگىز بولاتىن زاڭنىڭ ۇستەمدىگى قامتاماسىز ەتىلۋى قاجەت. ول قالاي جۇزەگە اسپاق؟ جالپى, زاڭ ۇستەمدىگى دەگەندە ءبىز نەنى باسشىلىققا الامىز؟ ارينە, نەگىزگى زاڭ – كونستيتۋتسيانىڭ ورنى بولەك. وندا جازىلعانداي, ادامنىڭ قۇقىقتارى مەن بوستاندىقتارىن زاڭدى تۇردە قورعاي ءبىلۋ, ادامدى قادىرلەۋ, ونى ەڭ قىمبات قازىنا دەپ ءبىلۋ قاجەت. بۇدان شىعاتىن قورىتىندى, زاڭنىڭ ۇستەمدىگى ادامنىڭ مەنشىك قۇقىعىمەن, جەكە كاسىپكەرلىك قىزمەتىمەن, ياعني ونىڭ ءىس جۇزىنە اسۋىمەن ۇشتاسۋى ءتيىس. سوندا جەكە كاسىپكەرلىك ناتيجەسى مەملەكەتتىڭ ەكونوميكالىق دامۋىنا دەم بەرەدى. ال بۇل ادامداردىڭ, ەلدىڭ جالپى ءال-اۋقاتىنىڭ ارتۋىنا, مەملەكەتتىڭ ەكونوميكالىق جاعدايىنىڭ جاقسارۋىنا جول اشادى. مەملەكەت باسشىسى ۇلت جوسپارىنداعى زاڭنىڭ ۇستەمدىگى تۋرالى ايتقاندا, وسى ماسەلەنى العا قويعانى انىق.
ەندەشە ادامنىڭ جەكە قۇقى مەن زاڭدى مەنشىك قۇقى ناقتى قورعالا الاتىن جاعدايدا ادام بوستاندىعى ساقتالاتىندىعى ايقىندالىپ, بۇل قازاقستاندىق قۇقىقتىق جۇيەنىڭ سالتانات قۇرۋىنىڭ ءبىر بەلگىسى بولماق. ال ازاماتتار مەن ۇيىمداردىڭ, كاسىپكەرلەردىڭ قۇقىقتارى مەن بوستاندىقتارىن, زاڭدى مۇددەلەرىن قورعاۋ جانە ونى قامتاماسىز ەتۋ سوت جۇيەسىنىڭ مىندەتى بولىپ تابىلاتىندىعى جوعارىدا ايتىلعان اتا زاڭىمىزدا جازىلىپ تۇر. دەمەك, زاڭ ۇستەمدىگىنىڭ سالتانات قۇرۋىن ءىس جۇزىنە اسىرۋ بارىسىندا سوتتاردىڭ ءرولى دە, ورنى دا بولەك. بۇل ورايدا, الدىمەن, سۋديالارعا جۇكتەلەر جاۋاپكەرشىلىك ۇلكەن.
سوندىقتان سۋديا بولىپ تاعايىندالماس بۇرىن وعان ۇمىتكەر ادام قۇقىقتىق جاعىنان دامىعان ەلدەردەگى قاتاڭ تاجىريبە تارتىبىندەي كۇردەلى ءارى كوپ ساتىلى سىناقتاردان وتەدى. ماسەلەن, سۋديا ءتۇيىنى قيىن ماسەلەلەردى شەشە الاتىن بىلىكتى دە ءبىلىمدى مامان بولىپ كەلۋى كەرەك. سول ءۇشىن دە پرەزيدەنت جانىنداعى مەملەكەتتىك باسقارۋ اكادەمياسىنىڭ قۇرامىنا ەنەتىن سوت تورەلىگى ينستيتۋتىندا جوعارى زاڭ ءبىلىمىن بەرۋ مەكەمەلەرىنىڭ سۋديالىق قىزمەتكە لايىقتى تۇلەكتەرىنىڭ ارنايى ەكى جىل ءبىلىم الۋى كوزدەلگەن بولاتىن. ەندى بۇل ينستيتۋت اكادەميا قۇرامىنان شىعارىلىپ, جوعارعى سوتتىڭ جانىندا جۇمىس ىستەيدى. ماگيسترانتتار مۇندا ەكى جىلدىق ءبىلىم الادى. سوسىن ءبىر جىل سوتتاردا تاعىلىمدامادان وتەدى. سىناق مۇنىمەن شەكتەلمەيدى. تۇلەك سوتتاردا تاعى ءبىر جىل سىناق مەرزىمىنەن وتەدى. ءسويتىپ ماگيسترانتتار سۋديا بولىپ تاعايىندالعانشا ءبىلىم دە, ناقتى سوت تاجىريبەسىن دە جيناپ الادى. مىنە, مۇنداي سۋديالار قاتاڭ ىرىكتەۋ مەن وزىق وقىتۋ ۇلگىسىنەن وتكەننەن كەيىن ادام قۇقىن قورعاۋدا ارقاشان زاڭ ۇستەمدىگىن جوعارى قوياتىندىعى ءسوزسىز. ويتكەنى مەملەكەت باسشىسىنىڭ «100 ناقتى قادام» ۇلت جوسپارىنداعى كوزدەلگەن مەجە دە وسى بولاتىن.