وڭتۇستىكتە گاز قۇبىرىنىڭ قۋاتىن ارتتىراتىن ستانسا اشىلدى

بۇل – «قازمۇنايگاز» ۇك» اق پەن قىتايلىق  CNPC كورپوراتسياسى اراسىنداعى ارىپتەستىك نەگىزىندە جۇزەگە اسىرىلعان ءىرى ينۆەستيتسيالىق جوبا. 

تۇڭعىش پرەزيدەنت كۇنىنە وراي­لاس­تىرىلعان جاڭا قوندىرعىنىڭ اشىلۋ سالتاناتى №1 كس پەن اس­تانا­داعى ۇلتتىق وپەراتور «قاز­ترانسگاز» كومپانياسىنىڭ بىرىڭعاي ديس­پەتچەرلىك ورتالىعىمەن تىكەلەي بايلانىس ارقىلى ءوتتى. ءىس-شاراعا سونداي-اق تاسىمالداۋ بەكەتىنىڭ ماماندارى, بۇ­قارالىق اقپارات قۇرالدارىنىڭ وكىلدەرى قاتىستى. تىكەلەي بايلانىستا الدىمەن ءسوز العان «قازمۇنايگاز» ۇك» اق كومپانياسى گاز تاسىمالداۋ جانە ماركەتينگ جونىندەگى اتقارۋشى ۆيتسە-پرەزيدەنتى قايرات شارىپباەۆ بۇل ينفراقۇرىلىمدىق جاڭا نىسان گاز قۇبىرىنىڭ «س» تارماعىنىڭ  ونىمدىلىگىن ارتتىرۋعا جانە تاسىمال كو­لەمىن جىلىنا 25 ميلليارد تەكشە مەترگە دەيىن جەتكىزۋگە مۇمكىندىك بە­رەتىنىن اتاپ ءوتتى.

«ەلباسىنىڭ 2020 جىلعا دەيىن كولىك-ترانزيتتىك تاسىمال قۋاتىن ەكى ەسەگە ارتتىرۋ جونىندەگى تاپسىرماسىنا سايكەس گاز سالاسىندا وڭ قادامدار جاسالۋدا. «قازاقستان – قىتاي» ماگيس­ترالدى گاز قۇبىرىنىڭ كەزەكتى ستانساسىن ىسكە قوسۋ ارقىلى ەلىمىزدىڭ گاز تاسىمالداۋ جۇيەسىن جەتىلدىرۋگە ۇلكەن ۇلەس قوسىلدى, دەدى ول.

جالپى, بۇگىنگى كۇنى ەلدىڭ گاز سالاسى ءىس جۇزىندە تولىقتاي جاڭارتىلدى جانە قازىرگى زامانعى ەڭ وزىق جابدىقتارمەن جاساقتالعان. نىساندى پايدالانۋعا ەن­­­گى­­زۋ­مەن قازاقستان شىعىستىق گاز ءتران­­­زيتىن ەكى ەسەگە ارتتىرۋعا قول جەتكىزدى.

جاڭا نىسان وتكىزۋ قابىلەتى مەن ۇزىن­دىعى بويىنشا ەڭ ءىرى سانالاتىن «ورتالىق ازيا – قىتاي» ترانسۇلتتىق گاز قۇبىرىنىڭ قۇرامداس بولىگى بولىپ تابىلادى.  بۇل قۇبىر ءتورت مەملەكەتتى – قازاقستان, تۇرىكمەنستان, وزبەكستان, جانە  قىتايدى  بايلانىستىرىپ وتىر.

«ازيالىق گاز قۇبىرى» جشس باس ديرەكتورىنىڭ ءبىرىنشى ورىنباسارى عالىمجان ساعىنتاەۆتىڭ پىكىرىنشە, «س» جەلىسىندە 8 كومپرەسسورلىق ستانسا بار بولسا, سونىڭ تورتەۋى 2016 جىلى ىسكە قوسىلعان. ەكەۋى بيىل ىسكە قوسىلسا, ەندىگى جىلعا تاعى دا ەكى كومپرەسسور ستانساسى جۇمىس ىستەي باستايدى. سوندا 2018 جىلدان باستاپ «ا», «ۆ» جانە «س» جەلىلەرى ارقىلى جوسپارلانعان 55 ملرد تەكشە مەتر ورتاازيالىق گاز قىتايعا قاراي تاسىمالدانباق. ونىڭ ىشىندە 5 ملرد تەكشە مەتر قازاقستاننىڭ گازى ەكسپورتتالادى.  

جاڭا كومپرەسسورلىق ستانسادا زاماناۋي جابدىقتار ورناتىلعان. مۇندا ورناتىلعان «Roolls Royse» كومپا­نياسىنىڭ گاز ايداۋشى اگرەگاتتارىنىڭ جوبالىق قۋاتى ساعاتىنا 516 مىڭ تەكشە مەتر گاز ايداۋعا ارنالعان.

پايدالانىلعان يننوۆاتسيالىق جابدىق, سونداي-اق قوسالقى تەحنولوگيا­لار كەشەنى ماگيسترالدى گاز قۇبىرىن پاي­دا­لانۋدىڭ بارلىق كەزەڭى ىشىندە قاۋىپ­سىز جانە تەحنولوگيالىق ۇزدىكسىز گاز تاسىمالداۋدى قامتاماسىز ەتە الادى. پەرسپەكتيۆادا كس-1 كوم­پرەس­سور­لىق ستانساسى, ەگەر قاجەتتىلىك تۋىن­داسا, گاز ءترانزيتىنىڭ كولەمىن ۇلعاي­تا الادى. ول ءۇشىن تەحنولوگيالىق پارا­مەترلەرى بويىنشا سالىنۋى مۇمكىن ءتورتىنشى «D» جەلىسىنە كوم­پرەسسورلىق ستانسانى قوسىمشا قوسۋ كوزدەلگەن.

باقتيار تايجان, «ەگەمەن قازاقستان»

وڭتۇستىك قازاقستان وبلىسى