ورالدا ەلەكتروندى قىزمەت كورسەتۋ جوباسى تانىستىرىلدى

ەلباسىمىز «100 ناقتى قادام» ۇلتتىق جوسپارىندا مەدياتورلار قىزمەتى حالىقتىڭ بارلىق توبىنا قولجەتىمدى بولۋىن تاپسىرعان بولاتىن. ورالدا قانات قاققان جوبا ءدال وسى ماقساتتى كوزدەگەن.

باتىس قازاقستان وبلىستىق سوتىنىڭ توراعاسى بەك امەتوۆتىڭ ايتۋىنشا, جاڭا جوبانىڭ ناتيجەسىندە ازاماتتاردىڭ مەدياتور قىزمەتىنە جۇگىنۋىنە بارلىق جاعداي جاسالادى, ىمىراعا كەلۋ شارتتارىنىڭ اياسى كەڭەيىپ, سوت شىعىندارى ۇنەمدەلەدى, حالىق ىشىندە داۋ-دامايدى سوتقا دەيىن-اق شەشۋگە مۇددەلىلىك ارتادى.

جاڭا جوبانى تانىستىرعان «logitex» جشس مەنەدجەرى انتون سكراموۆسكي باعدارلاما ەكى كەزەڭنەن تۇراتىنىن ايتادى. ءبىرىنشى كەزەڭدە ەلەكتروندى سەرۆيس قىزمەتى ورال قالاسىنداعى №1 حالىققا قىزمەت كورسەتۋ ورتالىعىندا ىسكە قوسىلادى. وعان تەك حقكو قىزمەتكەرى جانە مەدياتور عانا كىرە الادى. مەدياتور ول جەردەن «جەكە كابينەت» اشىپ قويادى. شاعىمدانۋشى ازامات حقكو-عا كەلىپ, ءوتىنىشىن اۆتوماتتاندىرىلعان جۇيە ارقىلى تاپسىرادى. شاعىمدى مەدياتورلاردىڭ ءبىرى قابىلداعان ساتتە, الگى ازامات سول مەدياتوردىڭ قابىلداۋىنا جازىلىپ قالادى. ءسويتىپ, ءوتىنىش بەرۋشىگە شاعىمىنىڭ قابىلدانعانى, مەدياتوردىڭ اتى-ءجونى مەن مەكەنجايى, قابىلدايتىن ۋاقىتى كورسەتىلگەن تالون بەرىلەدى. بۇل قىزمەتتىڭ ودان ءارى جەمىستى بولۋى شاعىمدانۋشى مەن مەدياتوردىڭ وزدەرىنە بايلانىستى بولادى.

ەكىنشى كەزەڭ 2018 جىلدان باستالادى. كەلەر جىلى پورتال قۇرۋ ارقىلى بۇل قىزمەتتى بارلىق ازاماتتار ءۇشىن قولجەتىمدى ەتۋ جوسپارلانعان. بولمەنىڭ سىلتەمەسىنە كىرۋ ارقىلى پايدالانۋشى مەدياتسيا تۋرالى ماتەريالدارمەن تانىسىپ, مەدياتورلار ءتىزىمىن, جۇمىس كەستەسىن, پىكىرلەردى جانە مەدياتوردىڭ جۇمىس تاجىريبەسىن ت.ب. كورىپ, تانىسا الادى. سەرۆيس بولاشاقتا دەربەس گادجەتتەر مەن سمارتفونداردا جۇكتەپ الۋعا بولاتىن موبيلدىك قوسىمشاسىن ىسكە قوسپاق.

بۇل جاڭالىق ەڭ الدىمەن حالىقتىڭ مەدياتور ىزدەۋگە كەتەتىن ۋاقىتى مەن قارجىسىن ۇنەمدەيدى, قۇجات جيناۋ ماشاقاتىنان قۇتقارىپ, سوتتىڭ دا الدىن الۋى مۇمكىن. مەدياتسيانى ۇساق جانە ورتاشا اۋىر قىلمىستىق ىستەرگە دە قولدانۋعا بولادى.

قازىر جاڭا تەحنولوگيا تىرشىلىكتىڭ بارلىق سالاسىنا ەنىپ جاتىر. بۇل ءومىر تالابى, وسى ارقىلى ءبىز ءومىر ساپاسىن كوتەرۋگە ءتيىسپىز. دەمەك, وسىنداي جوبانىڭ ارقاسىندا ازاماتتار ماسەلەسىن تەز, ءتيىمدى جانە كوپ شىعىنسىز شەشۋگە مۇمكىندىك الادى. كەلەشەكتە تۇرعىندار داۋ-دامايدى ادەتتەگىدەي سوتتا ەمەس, مەدياتور قىزمەتىن پايدالانۋ ارقىلى شەشۋدىڭ قانشالىق ىڭعايلى جانە ءتيىمدى ەكەنىنە كوز جەتكىزەدى.

«قازاقستاندا جىل وتكەن سايىن مەدياتوردىڭ قاتىسۋىمەن شەشىلەتىن ىستەردىڭ سانى ءوسىپ كەلەدى. ءبىزدىڭ قوعامدا كەز كەلگەن جانجالدى شەشۋدىڭ ەڭ تابيعي ءتاسىلى – ديالوگ پەن ىمىراعا كەلۋ بولۋى ءتيىس» دەيدى جوبا اۆتورلارى.

قازبەك قۇتتىمۇرات ۇلى, «ەگەمەن قازاقستان»