ەگەر ۇلكەندى-كىشىلى دەڭگەيدەگى اتقارۋشى ورگانداردا قىزمەت جاسايتىن جەتەكشى تۇلعالار وزىنە تىكەلەي تاپسىرىلعان مىندەتتەردى سالاقسىتىپ جىبەرسە, نەمەسە وزىنە جۇكتەلگەن جاۋاپكەرشىلىكتى سەزىنبەسە –سوگىس الۋى ابدەن مۇمكىن. سونداي-اق قوعامدىق ومىردە سوگىس وزگە دە ارقيلى جاعدايلاردا جاريالانادى. اقتوبە وبلىسى اكىمىنىڭ ءباسپاسوز قىزمەتى لاۋازىمدى تۇلعاعا داعدىلى تاجىريبەدەن تىس بەرىلگەن ەرەكشە ءبىر سوگىس جونىندە جەرگىلىكتى باسىلىمدار ارقىلى اقپارات تاراتتى.
اقتوبە وبلىسىنىڭ كادرلىق كوميسسياسىنىڭ شەشىمى بويىنشا ايىرىقشا تارتىپتىك جازا قارعالى اۋدانىنىڭ اكىمى راحات سىدىقوۆقا بەرىلگەن. نە ءۇشىن؟ ايدىڭ, كۇننىڭ امانىندا نە ءبۇلدىرىپ قويدى ەكەن؟ اتقارىپ جۇرگەن قىزمەتىندە ءبىر شيكىلىك بولعانى-اۋ شاماسى. جوق, مۇنىڭ ءبىرى دە ەمەس, گاپ باسقادا بولىپ شىقتى. ول اقتوبە وبلىسىنىڭ اكىمى بەردىبەك ساپارباەۆتىڭ قارعالى اۋدانىنا ساپارى كەزىندە ۇستىرتتىكتە ۇرىنعان. ناقتىراق ايتقاندا ر.م.سىدىقوۆ وبلىس باسشىسى اتالعان اۋدانعا قاراستى بادامشا اۋىلىندا تۇرعىندارمەن كەزدەسۋ ساتىندە الا-قۇلالىققا جول بەرگەن. اۋدان اكىمى بۇل باسقوسۋعا تەك ءبىر عانا جەرگىلىكتى مەملەكەتتىك قىزمەتشىلەر مەن شاعىن جانە ورتاشا بيزنەس وكىلدەرىن جانە كاسىپكەرلەردىڭ عانا شاقىرىلۋىنا تۇرتكى بولىپتى. سوگىستى سول ءۇشىن ارقالاپتى.
بۇعان نە دەۋگە بولادى؟ ارينە مۇنىڭ ءوزى تەك ءبىر عانا قارعالى اۋدانىنڭ اكىمى راحات سىدىقوۆتىڭ تاراپىنان كەزدەسكەن كەمشىلىك دەسەك, شىندىقتان الشاقتاۋ كەتىپ قالارمىز. وزگە وڭىرلەردە دە وسىعان ۇقساس كورىنىستەر كەزدەسىپ قالىپ جۇرگەنى دە جاسىرىن ەمەس. مۇنداي سىڭارجاق ۇستانىم كەزدەسۋگە كەلىپ وتىرعان جەرگىلىكتى اتقارۋشى ورگاندار جەتەكشىلەرىنىڭ ابىرويىنا داق ءتۇسىرۋى مۇمكىن ەكەنىن دە جوققا شىعارا الماساق كەرەك. ەكىنشىدەن لاۋازىمدى تۇلعا مەن بەتپە-بەت پىكىر الىسۋعا تەك «شتاتتاعى شەشەندەر» مەن مەملەكەتتىك قىزمەتشىلەردىڭ شاقىرىلۋى –ەل-جۇرتتىڭ اراسىندا ءار ءتۇرلى الىپ-قاشپا پىكىرلەر تۋعىزۋى دا عاجاپ ەمەس.
كانە, اڭگىمەنىڭ اشىعىنا كەلەيىكشى؟ رەسپۋبليكاداعى وبلىس اكىمدەرى ۇلكەن لاۋازىمدى تۇلعا ەمەس پە؟ وبلىس ورتالىعىنان شالعاي ورنالاسقان جەرگىلىكتى ەلدى-مەكەندەردە تۇراتىن قاراپايىم حالىقتىڭ ءوڭىر باسشىسىنىڭ قابىلداۋىنا كىرۋىنە مۇمكىندىگى بولا بەرمەيتىنى بەلگىلى. ەكىنشىدەن ولاردىڭ ءبارىن قابىلداۋعا وبلىس اكىمدەرىنىڭ جۇمىس كەستەسى سايكەس بولمايتىنى تاعى دا تۇسىنىكتى.
سوندا جەرگىلىكتى تۇرعىندار كوكەيدە جۇرگەن ويلارى مەن تىلەكتەرىن وسىنداي كەزدەسۋلەردە ايتپاعاندا قايدا ايتادى؟ ايتسە دە كەيبىر جاعدايلاردا ەل-جۇرتتىڭ وكىلدەرى وعان شاقىرىلماي قالادى. اڭگىمەنىڭ قىسقاسىەل تۇرعىندارى مەن بيلىك وكىلدەرى اراسىندا تىكەلەي ءۇن قاتىسۋلار بولعان جاعدايدا ءوزارا تۇسىنىستىك ودان ءارى تەرەڭدەي تۇسپەي مە؟ قارعالى اۋدانىنىڭ اكىمى راحات سىدىقوۆقا وڭىرلىك كادرلىق كوميسسيانىڭ شەشىمىمەن سوگىس جاريالانعانىن جەرگىلىكتى ءباسپسوز بەتتەرىنەن وقىعان كەزدە وسىنداي ويلار كەلىپ ەدى كوكەيگە. بۇل جايتتەردەن ونىڭ وزگە ارىپتەستەرى ءتيىستى ساباق السا يگى.
تەمىر قۇسايىن
«ەگەمەن قازاقستان»
اقتوبە