بۇگىن ەلوردانىڭ № 49 ورتا مەكتەبىندە كۇرەستىڭ بىرنەشە تۇرىمەن اينالىسۋعا ارنالعان شاعىن زالدى اشۋ سالتاناتى ءوتتى دەپ حابارلايدى استانا اكىمدىگىنىڭ مەديا ورتالىعى.
كۇرەستەن شاعىن زالدى اشۋ ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ «تۋعان جەر» جوباسىنىڭ اياسىندا مۇمكىن بولدى.
مەملەكەت باسشىسىنىڭ تاپسىرمالارىن جۇزەگە اسىرۋ ماقساتىندا قالا اكىمدىگىنىڭ, ءبىلىم باسقارماسىنىڭ قولداۋىمەن «مەن سپورتپەن بىرگە وسەمىن» قوعامدىق قورى مەن «ستالنايا ماركا» جشس جوعارىدا اتالعان زالدىڭ اشىلۋى مەن جابدىقتاردىڭ ورناتىلۋىنا كومەگىن تيگىزدى.
№49 ورتا مەكتەپتىڭ ديرەكتورى دانارا جومارتوۆانىڭ ايتۋىنشا, زامانعا ساي قۇرالدارمەن جابدىقتالعان شاعىن سپورت زالىندا كۇرەسپەن اۋدانداعى باسقا مەكتەپتەردىڭ وقۋشىلارى دا شۇعىلدانا الادى. ونىڭ پىكىرىنشە, №49 مەكتەپتىڭ جانىنداعى قازاق كۇرەسىمەن اينالىسۋعا مۇمكىندىك بەرەتىن سپورت زالى بولاشاقتا بۇل جەردەن ءتۇرلى دارەجەدەگى چەمپيونداردى كوپتەپ شىعارۋعا تۇرتكى بولماق.
«مەكتەبىمىزدە قازاق كۇرەسىمەن اينالىساتىن 4 توپ بار. ءار توپتا 15 بالا جاتتىعادى. جاتتىعۋلار ساباقتان تىس ۋاقىتتا وتەدى. جاتتىعۋلار تەگىن. سپورت زالى بالالاردىڭ بوس ۋاقىتىن ءتيىمدى وتكىزۋگە سەپتىگىن تيگىزەدى. ماسەلەن, ءبىزدىڭ مەكتەبىمىزدەن الەم چەمپيونى, رەسپۋبليكا چەمپيونى رەتىندە شىققان جانە شىعىپ جاتقان وقۋشىلارىمىز كوپ. دەگەنمەن, №49 مەكتەپ ەلوردامىزدىڭ شالعاي اۋدانىندا ورنالاسقاندىقتان بالالارىمىزدىڭ قالا ورتالىقتارىنداعى سپورتتىق ۇيىرمەلەرگە بارۋ مۇمكىندىگى از. سوندىقتان بۇل ءبىز ءۇشىن جاڭا سپورت تارلاندارىنىڭ جاڭا ەسىمدەرىن شىعارۋدىڭ زور مۇمكىندىگى», - دەپ ءبولىستى دانارا جومارتوۆا.
شاعىن زالدى سارىارقا اۋدانى اكىمىنىڭ ورىنباسارى تالعات راحمانبەردى مەن قازاق كۇرەسىنەن حالىقارالىق دارەجەدەگى سپورت شەبەرى, «قازاقستان بارىسى» رەسپۋبليكالىق ءتۋرنيرىنىڭ تۇڭعىش جەڭىمپازى ۇلان رىسقۇل سالتاناتتى تۇردە اشقان بولاتىن.