ەلباسى: قازاقستان مەن بەلارۋس رەسپۋبليكاسىنىڭ ستراتەگيالىق قارىم-قاتىناسى وتە جوعارى

كەزدەسۋ بارىسىندا نۇرسۇلتان نازارباەۆ بەلارۋس رەسپۋبليكاسى پرەزيدەنتىنە رەسمي ساپارمەن شاقىرعانىنا العىسىن ءبىلدىردى. «بۇل كەزدەسۋىمىز ەكى مەملەكەتتىڭ اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولعان ايتۋلى داتامەن تۇسپا-تۇس كەلىپتى. وسى جىلدار ارالىعىندا قازاقستان مەن بەلارۋس رەسپۋبليكاسى مىقتى ەكونوميكالىق جانە ساياسي بازاسى بار قارىم-قاتىناس ورناتقانىن ايتا كەتۋ كەرەك», دەي كەلە ەلباسى نۇرسۇلتان نازارباەۆ الەكساندر لۋكاشەنكونىڭ ەڭبەگىن جوعارى باعالادى. «مەملەكەتىڭىز ءۇشىن ءسىزدىڭ اتقارعان ەڭبەگىڭىز زور. بەلارۋس ەلىنىڭ اۋىل شارۋاشىلىعى ونىمدەرى مەن ماشينا قۇراستىرۋ سالاسىنداعى جەتىستىكتەرى الەمگە كەڭىنەن تانىلىپ ۇلگەردى», دەدى پرەزيدەنت. نۇرسۇلتان نازارباەۆتىڭ ايتۋىنشا, قازاقستاندا 260 بەلارۋس كاسىپورىنى جۇمىس ىستەيدى.

«قازاقستان بەلارۋس جەرىنەن اۋىل شارۋاشىلىعى جانە جيھاز ونىمدەرىن يمپورتتايدى. وسى كەزدەسۋ بارىسىندا قازاقستانعا بەلاز ونىمدەرىن تاسىمالداۋ تۋرالى كەلىسىم شارت جاسالماق. كەزدەسۋ ناتيجەسىندە جاڭا تەحنيكا جەتكىزۋ, تاسىمال ساپاسىن ارتتىرۋ دا دامي تۇسەدى دەپ ويلايمىن», دەدى ەلباسى.

نۇرسۇلتان نازارباەۆ قازاقستان مەن بەلارۋس رەسپۋبليكاسى اراسىنداعى دوستىق قارىم-قاتىناستى جوعارى باعالادى. «ەكى مەملەكەت اراسىنداعى ستراتەگيالىق قارىم-قاتىناس وتە جوعارى دەڭگەيگە جەتتى. مەملەكەتتەرىمىزدىڭ اراسىندا دوستىق قارىم-قاتىناس پەن ىنتىماقتاستىق ورناعان», دەي كەلە پرەزيدەنت بەلارۋس رەسپۋبليكاسىنا وتكەن جولى كەلگەندە مەملەكەتتىڭ باتىسىندا بولعانىن ەسىنە الدى.

«بۇگىن يننوۆاتسيالىق جەتىستىكتەرىڭىزدى ارنايى كورمە بارىسىندا تانىستىرادى ەكەنسىزدەر. قازاقستان دا بارىنشا يننوۆاتسيالىق دامۋعا ەرەكشە كوڭىل ءبولىپ كەلەدى. ياعني, بىزدە ورتاق تاقىرىپ كوپ. ارينە, ەكى مەملەكەت اراسىنداعى تاۋار اينالىمىنىڭ دەڭگەيى تومەندەپ كەتكەن كەزدەر بولدى. بىراق بيىلعى جىلدا بۇل كورسەتكىش بىردەن 60 پايىزعا ارتتى», دەدى نۇرسۇلتان نازارباەۆ. پرەزيدەنتتىڭ ايتۋىنشا, مەملەكەتتەر اراسىندا كەدەندىك كەدەرگىلەردىڭ بولماۋى ساۋدا اينالىمىن بۇل دەڭگەيدەن دە ارتتىرا تۇسۋگە سەپتىگىن تيگىزە الادى.

نۇرسۇلتان نازارباەۆ قازاقستاننىڭ مۋلتيمودەلدى كولىك دالىزىنە اينالعانىن اتاپ ءوتتى. «بۇگىندە قازاقستان ارقىلى بەلارۋس رەسپۋبليكاسى مەن ەۋروپا ەلدەرىنە جىل سايىن 136 مىڭ تاۋار كونتەينەرى وتەدى. بۇل ءبىزدىڭ مەملەكەتىمىزدەگى كولىك سالاسىنا كوپ پايدا اكەلىپ وتىر. سوندىقتان بۇل سالانىڭ بولاشاعى زور دەپ ويلايمىن», دەدى پرەزيدەنت.

بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو نۇرسۇلتان نازارباەۆتىڭ بەلارۋس حالقىنا دەگەن جىلى لەبىزىن ءبىلدىرىپ جۇرەتىنىن ايتىپ, ءوز ەلىنىڭ دە قازاقستاندىقتارعا دەگەن ىقىلاسى ەرەكشە ەكەنىن ايتتى. «بەلارۋس رەسپۋبليكاسىنىڭ قازاقستانعا دەگەن سىيلاستىعى ەرەكشە. ءبىز قازاقستاننىڭ كۇننەن-كۇنگە دامىپ جاتقانىنا كۋامىز», دەگەن الەكساندر لۋكاشەنكو بەلارۋس حالقىنىڭ كوبى قازاقستاندا بولىپ كورگەنىن جەتكىزدى.

«استانا – وتە كەرەمەت قالا. مەنىڭ ويىمشا, ءسىزدىڭ قازىرگى جۇمىسىڭىز عاسىرلارعا قالاناتىن, ۇرپاققا قالاتىن ەسكەرتكىش. بەلارۋس مەملەكەتى قازاقستاننان كوپ نارسە ۇيرەنىپ جاتىر. استانانىڭ كەيبىر قۇرىلىس ەلەمەنتتەرىن ەلىمىزگە كوشىرىپ جاتقانىمىزدى دا ايتا كەتكىم كەلەدى», دەدى الەكساندر لۋكاشەنكو.

ەسكە سالا كەتسەك, ەلباسى نۇرسۇلتان نازارباەۆ بۇعان دەيىن بەلارۋس ەلىنە 2012 جىلدىڭ مامىر ايىندا رەسمي ساپارمەن بارعان ەدى. ال الەكساندر لۋكاشەنكو قازاقستانعا رەسمي ساپارمەن 2013 جىلى كەلدى. نۇرسۇلتان نازارباەۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن وسى جىلدىڭ 8 ماۋسىمىندا شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسى اياسىندا كەزدەسىپ, ەكىجاقتى سەرىكتەستىكتىڭ ماڭىزدى ماسەلەلەرىن تالقىلاعان بولاتىن.

گۇلنۇر قۋانىشبەكقىزى,

«ەگەمەن قازاقستان»

مينسك