تۇڭعىش پرەزيدەنت كۇنى قارساڭىندا اۋدان ورتالىعى شولاققورعان اۋىلىندا شاعىن فۋتبول الاڭى اشىلدى.
جانكۇيەرلەردىڭ سپورتتىق جارىستاردى تاماشالاۋىنا بارلىق جاعداي جاسالىپ, جاڭا قۇرىلعىلار ورناتىلعان, جاساندى توسكەنىش سالىنعان فۋتبول الاڭشاسىنا اۋداندىق بيۋدجەتتەن 11 ملن تەڭگە جۇمسالىپتى. سپورت الاڭىنىڭ اشىلۋ سالتاناتىندا سوزاق اۋدانىنىڭ اكىمى سالىحان پولاتوۆ: «ەلباسى ن. ءا. نازارباەۆ قازاقستان حالقىنا ارناعان جولداۋىندا, اۋدان, قالا اكىمدەرىنە حالىقتىڭ دەنە شىنىقتىرۋمەن جانە سپورتپەن جاپپاي اينالىسۋى ءۇشىن سپورتتىق ينفراقۇرىلىمداردىڭ قولجەتىمدىلىگىن كەڭەيتۋدى تاپسىرعان بولاتىن. بۇگىندە ءبىز وسى تاپسىرمانى ورىنداۋ ماقساتىندا جۇمىستار جاساپ كەلەمىز. ماسەلەن, اۋدان بويىنشا 236 سپورت عيماراتى بار. ونىڭ ىشىندە يپپادروم, تەننيس الاڭى, ءجۇزۋ باسسەيندەرى تۇراقتى جۇمىس ىستەپ كەلەدى. مىنە, بۇگىن تاعى ءبىر شاعىن فۋتبول الاڭىن اشىپ, بارشا سپورتسۇيەر قاۋىمعا جاعداي جاساپ وتىرمىز», - دەدى. سونداي-اق, اۋداندىق ءماسليحاتتىڭ حاتشىسى بەگىمبەت بايعاراەۆ, ارداگەر سپورتشى, سوزاق اۋدانىنىڭ قۇرمەتتى ازاماتى امانعالي ايمۇرزاەۆ ءسوز سويلەپ, جينالعان قاۋىمدى قۇتتىقتادى.
سالتاناتتى جيىن سوڭى اۋىل وكرۋگتەر اراسىندا جاساقتالعان كوماندالار اراسىندا فۋتبولدان جارىسقا ۇلاستى. جىل اياعىنا دەيىن شولاققورعان اۋىلىندا دەمەۋشىلەر ەسەبىنەن تاعى ءبىر سپورت الاڭشاسى اشىلماق.
عالىمجان ەلشىباي,
«ەگەمەن قازاقستان»