بۇگىن تەمىرتاۋ قالاسىندا قاراعاندى مەملەكەتتىك يندۋستريالىق ۋنيۆەرسيتەتىندە قازاقستان رەسپۋبليكاسىنىڭ ءبىرىنشى پرەزيدەنتى نۇرسۇلتان ءابىش ۇلى نازارباەۆتىڭ جانە 1967 جىلعى تۇلەكتەردىڭ جوو بىتىرگەنىنە 50 جىلدىق مەرەيتويىنا ارنالعان «قازاقستاننىڭ ءۇشىنشى جاڭعىرۋى – جاڭا تۇجىرىمداما جانە قازىرگى زامانعى شەشىمدەر» اتتى IX حالىقارالىق عىلىمي-پراكتيكالىق كونفەرەنتسيا ءوتتى.
جيىنعا قازاقستان رەسپۋبليكاسىنىڭ ءبىلىم جانە عىلىم ءمينيسترى ە.ساعاديەۆ قاتىستى. مينيستر كونفەرەنتسياعا قاتىسۋشىلاردى الدا كەلە جاتقان تۇڭعىش پرەزيدەنت كۇنىمەن قۇتتىقتاپ, ەلباسىنىڭ قۇتتىقتاۋ حاتىن وقىپ بەردى.
كونفەرەنتسيانىڭ اشىلۋىمەن قۇتتىقتاۋشىلار قاتارىندا تۇڭعىش سىرتقى ىستەر ءمينيسترى, قازاقستان رەسپۋبليكاسىنىڭ توتەنشە جانە وكىلەتتى ەلشىسى, پروفەسسور ت.سۇلەيمەنوۆ باستاعان ەلباسىنىڭ سەرىكتەستەرى بولدى. جيىن بارىسىندا مەملەكەت باسشىسىنىڭ سەرىكتەسى, زاۋىت-جتوو تۇلەگى, قازاقستان رەسپۋبليكاسىنىڭ عىلىم جانە تەحنيكا سالاسىندا مەملەكەتتىك سىيلىقتىڭ يەگەرى ق.سارەكەنوۆ كونفەرەنتسيانىڭ ماڭىزى مەن ماقساتىنا كەڭىنەن توقتالدى.
كەلەلى كەڭەستى ايماق باسشىسى ە.قوشانوۆ جۇرگىزىپ وتىردى. كۇن تارتىبىندە قازاقستانداعى ءۇشىنشى جاڭعىرتۋدى جۇزەگە اسىرۋ قۇرالى رەتىندە قولدانىلاتىن يننوۆاتسيالىق جانە ەڭبەكسىيىمدىلىقتى تەحنولوگيالار جايى ءسوز بولدى. سونداي-اق, جوعارعى جانە جوعارعى وقۋ ورىنان كەيىنگى ءبىلىم بەرۋ سالاسىندا كادرلاردى دايىنداۋ ارقىلى ادامي كاپيتال ساپاسىن جاقسارتۋ ماسەلەلەرىن تالقىلادى.
بايانداماشىلار جوعارعى وقۋ ورىندارىن «رۋحاني جاڭعىرۋ» باعدارلاماسىن جۇزەگە اسىرۋعا ارنالعان قوعامدىق سانانى جاڭارتۋ ورتالىعى رەتىندە قابىلداۋدى ۇسىندى.
پرەزيدەنتتىك «تۋعان جەر» باعدارلاماسى شەڭبەرىندە تابيعاتتى پايدالانۋ جانە قورشاعان ورتانى قورعاۋ ماسەلەلەرى دە جيىننىڭ وزەگىنە اينالدى.
ميراس اسان,
«ەگەمەن قازاقستان»
تەمىرتاۋ قالاسى