بۇگىن استانا قالاسى ەسىل اۋدانىنىڭ «جاڭا يلينكا» تۇرعىن الابىندا قاتتى وتىندا پەشپەن جىلىتۋدىڭ جارامسىزدىعىنان 2 ەرەسەك جانە 3 بالا ىس ءتيىپ, ورتا دەڭگەيلى اۋىرلىقپەن اۋرۋحاناعا جاتقىزىلدى, دەپ حابارلايدى قر ءىىم تج كوميتەتىنىڭ ءباسپاسوز قىزمەتى.
كۇن سۋىتقالى بەرى سۇيىق جانە قاتتى وتىنمەن پەش جاعۋ كەزىندە حالىق قاراپايىم قاۋىپسىزدىك ەرەجەلەرىن ساقتاي بەرمەيدى.
«وتىننىڭ تولىق جانباۋىنان اۋادا ۋلى گاز پايدا بولادى. پەشتەگى ءتۇتىن شىعاتىن جەردى كۇنى بۇرىن جابۋ كەزىندە ۋلانۋ ءجيى بولادى. بيىل 1-28 قاراشا ارالىعىندا تۇرعىن-ءۇي سەكتورىندا 31 ۋلى گازدان زارداپ شەگۋ وقيعاسى تىركەلدى, سونىڭ ىشىندە قاتتى وتىنمەن جاناتىن پەشتىڭ اقاۋلىعى سالدارىنان 26 وقيعا, گاز باللوندا رەدۋكتوردىڭ جانە گاز كولونكاسىنىڭ اقاۋلىعى سالدارىنان 5 وقيعا. بۇل رەتتە 43 ادام (ونىڭ ىشىندە 11 بالا) ۋلانىپ, اۋرۋحاناعا جاتقىزىلدى, 10 ادام (بارلىعى ەرەسەكتەر) وقيعا ورنىندا كوز جۇمدى» دەلىنگەن ءباسپاسوز حابارلاماسىندا.
شىعىس قازاقستان – 4, سولتۇستىك قازاقستان – 4, جامبىل – 4, الماتى – 4, پاۆلودار وبلىستارىندا – 2, استانادا – 2 گازدان ۋلانۋ وقيعالارى تىركەلگەن. قىزىلوردا, اقمولا, قوستاناي, باتىس قازاقستان, اقتوبە, قاراعاندى وبلىستارىندا جانە الماتى قالاسىندا دا بولعان.
ۋلانۋدىڭ نەگىزگى بەلگىلەرى – باس اۋرۋ, سامايدا سوققىلار, جۇرەك اينۋ, ۇيقىشىلدىق, از ۋاقىتقا تالىپ قالۋدان باستاپ سال اۋرۋلارعا, ەستەن تانۋ, تىنىس الۋ مەن مي قان اينالىمىنىڭ بۇزىلۋىمەن بىرگە كوماتوزدى كۇيگە دەيىن بولادى. اۋىر جاعدايلار جۇرەكتىڭ قىزمەتىن توقتاتۋى مۇمكىن. زارداپ شەككەن ادامدى دەرەۋ اۋرۋحاناعا جاتقىزۋ قاجەت.
دارىگەر كەلگەنشە ناۋقاستى تازا اۋاعا شىعارۋ كەرەك. كەيىن ستاتسيوناردا وتتەگىنى ۇزاق دەممەن قابىلداۋ, اپپاراتپەن جاساندى تىنىس الۋ وتكىزىلەدى; اعزانىڭ زارداپ شەككەن جۇيەلەرىنىڭ تىرشىلىك ارەكەتىن قالپىنا كەلتىرەتىن قۇرالدار قولدانىلادى.