ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا شىعىس قازاقستان وبلىسىنىڭ اكىمى دانيال احمەتوۆ ايماقتىڭ الەۋمەتتىك-ەكونوميكالىق دامۋى, ەلباسى ن.ءا. نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنىڭ, سونىمەن قاتار «رۋحاني جاڭعىرۋ» باعدارلاماسىنىڭ جۇزەگە اسۋ بارىسىنا توقتالدى.
«شىعىس قازاقستان وبلىسى اكىمدىگىنىڭ اعىمداعى جىلعى جۇمىسى ەلباسى نۇرسۇلتان ءابىش ۇلى نازارباەۆتىڭ ەكونوميكالىق ءوسىمنىڭ جاڭا مودەلىن قۇرۋ جانە قوعامدىق سانانى جاڭعىرتۋ جونىندەگى مىندەتتەرىن ىسكە اسىرۋعا جۇمىلدىرىلعان. وبلىس ەكونوميكاسى تۇراقتى دامىپ كەلەدى. جالپى وڭىرلىك ءونىم جىل باسىنان بەرى 102 پايىزعا ءوستى. بۇل اۋىل شارۋاشىلىعى ءونىمىنىڭ 102, قۇرىلىس جۇمىستارىنىڭ 108 پايىزعا ۇلعايۋى ەسەبىنەن جۇزەگە اسىپ وتىر. 234 مىڭ شارشى مەتر تۇرعىن ءۇي پايدالانۋعا بەرىلدى, ءوسىم 104 پايىزدان استى. ونەركاسىپ ونىمدەرىنىڭ كولەمى 100,1 پايىزعا ءوستى. مىس رۋداسىن ءوندىرۋ 134 پايىزعا, تاس كومىر ءوندىرۋ 116 پايىزعا ارتتى. شاعىن جانە ورتا بيزنەستىڭ ونەركاسىپ ءونىمىنىڭ بارلىق كولەمىنەن الاتىن ۇلەسى 10 پايىز (113 ملرد. تەڭگە). ال ءىرى بيزنەستىڭ ۇلەسى 90 پايىزدى (1 ترلن 100 ملن تەڭگە) قۇرايدى. نەگىزگى كاپيتالعا سالىنعان ينۆەستيتسيا 107 پايىزعا ۇلعايدى», دەدى ءوڭىر باسشىسى.
سونىمەن قاتار ول نەگىزگى كاپيتالعا سالىنعان ينۆەستيتسيا 107 پايىزعا ۇلعايعانىن تىلگە تيەك ەتتى.
«شاعىن جانە ورتا بيزنەس سۋبەكتىلەرىنىڭ سانى 103 پايىزدان استى. ناقتى سەكتوردىڭ تۇراقتى ءوسىمى, مەملەكەت كىرىسىنە اۋدارىمنىڭ 115 پايىزعا (245 ملرد. تەڭگە) ارتۋىنا ىقپال ەتتى. تۇرعىنداردىڭ اقشالاي كىرىستەرى 112 پايىزعا ارتتى, ايلىق ورتاشا ەڭبەكاقى 120 مىڭ تەڭگەگە جەتتى. جەكە تۇلعالاردىڭ دەپوزيتتەرى 115 پايىزعا ۇلعايدى. جۇمىسسىزدىق 4,8 پايىز دەڭگەيىندە. كاسىپكەرلىكتى قولداۋ كارتاسى شەڭبەرىندە بيىل 6 جوبا ىسكە اسىرىلۋدا. بارلىق سوماسى 381 ملرد 400 ملن تەڭگەنى قۇرايدى. 4 جوبا قولدانىسقا بەرىلدى. 1560 جۇمىس ورنى قۇرىلدى. ولاردىڭ ىشىندە, الەمدەگى اسا ىرىلەردىڭ ءبىرى - اقتوعاي تاۋ-كەن بايىتۋ كومبيناتىنىڭ قۇرىلىسى, وسكەمەن ارماتۋرا زاۋىتىندا ءوندىرىستى جاڭعىرتۋ. جىل سوڭىنا دەيىن قالعان 2 جوبانى اياقتاۋ جوسپارلانىپ وتىر. يندۋستريا-يننوۆاتسيالىق دامۋ باعدارلاماسىن ىسكە اسىرۋ جىلدارىندا 46 جوبا ورىندالدى. 2020 جىلعا دەيىن, ينۆەستيتسيا كولەمى 393 ملرد تەڭگەنى قۇرايتىن, تاعى 33 جوبانى ىسكە اسىرىپ, 11 300 جاڭا جۇمىس ورنىن اشۋ كوزدەلۋدە», دەدى د.احمەتوۆ.
راۋان قايدار,
«ەگەمەن قازاقستان»