كوپ كۇتتىرگەن قولا مەدال

ءبىز, قازاق ەلىنە بياتلوننان Əلەم كۋبوگى كەزەڭىندە العاشقى جۇلدەنى سىيلاعان ماكسيم براۋننىڭ اناسىمەن تىلدەستىك. پاۆلودارداعى ورتا مەكتەپتىڭ بىرىندە مۇعالىم ەكەن. حورەوگراف. اقجارقىن كىسى. اعىنان جارىلدى. ۇلىنىڭ جەڭىسىنەن كەيىنگى əسەرىمەن ءبولىستى.

– ءƏلى سەنە الار ەمەسپىن. كەشەدەن بەرى تەلەفونىمىزدا تىنىم جوق. تۋعان-تۋىستارىمىز, دوستارىمىز, كورشىلەرىمىز قۇتتىقتاپ جاتىر. قازاق ەلىنىڭ مەرەيى ۇستەم بولدى. ماكسيمدى عانا ەمەس, بارشاڭىزدى تاريحي جەڭىسىمىزبەن قۇتتىقتايمىن, – دەپ باستادى قۋانىشتان كوزىنە جاس العان براۋن ولگا ۆلاديميرقىزى.

– جارىستى قايدان كوردىڭىزدەر؟ ۇلدارىڭىزدىڭ جۇلدە الاتىنىنا سەندىڭىزدەر مە؟

– ۇيدە وتباسىمىزبەن وتىرىپ كوردىك. بولاشاق كەلىنىمىز دە بىزبەن بىرگە بولدى. ترانسلياتسيانى ۇيدە ينتتەرنەتتەن تاماشالادىق. ۇلىمنىڭ جىلدار بويعى ەڭبەگىنىڭ اقتالعانىنا قۋانامىن. جۇلدە الماسا دا جەرگە قاراتپايتىنىنا سەندىم. ماكسيم مəرەگە جەتكەنشە əزەر شىدادىق. ابىروي بولعاندا قولاعا قول جەتكىزدى. الداعى ۋاقىتتا تالاي تۇعىردان كورەتىنىمىزگە سەنىمدىمىز. قانداي جارىسقا قاتىسسا دا اكەسى ەكەۋىمىز تىلەۋشىسى بولىپ وتىرامىز.

– ماكسيم قانشا جاسىنان بياتلونمەن شۇعىلدانىپ كەلەدى؟ بۇل سپورتتى تاڭداۋىنىڭ سىرى نەدە؟

– قاتارلاستارى سەكىلدى العاشىندا فۋتبولعا قاتىستى. بىراق اتاسى فۋتبولدى قۇپتاي قويمادى. قىسقى سپورتپەن اينالىسقانىن قالادى. 4-سىنىپتان باستاپ بياتلونعا اپاردىق. باسىندا ۇناتپاي ءجۇردى. دەگەنمەن كوپ ۇزاماي ۇيرەنىپ كەتتى. وقۋدا دا ۇلگەرىمى جاقسى بولدى. جاتتىعۋدان قالمايتىن. جاستايىنان جارىستارعا كوپ باردى. تالاي دودادا توپ جاردى. ەل چەمپيونى اتاندى. ۋنيۆەرسيادادا جاقسى ونەر كورسەتتى. حالىقارالىق دارەجەدەگى سپورت شەبەرى. ەندى مىنە بۇرىن-سوڭدى بولماعان جەتىستىككە قول جەتكىزىپ وتىر. قولداعاندارعا كوپ راحمەت! وسىنداي بيىكتەن كورىنۋى بىلىكتى مامانداردىڭ ارقاسى. باپكەرلەرىنە مىڭ العىس!

وسىدان كەيىن ماكسيم براۋننىڭ العاشقى باپكەرى نيكولاي ۆىدرينگە حابارلاستىق. شۋچينسكتە وقۋ-جاتتىعۋ جيىنىندا جۇرگەن باپكەر شاكىرتىنىڭ جەتىستىگىنە ءدان ريزا ەكەن.

– جارىستان سوڭ ماكسيم بىردەن حابارلاستى. تولقىپ ءجۇر. مىقتىلاردان وزعانىنا ءوزى دە قۋانىشتى. ەكى دۇركىن وليمپيادا چەمپيونى, 11 دۇركىن الەم چەمپيونى مارتەن فۋركادتى وزىپ كەتكەنىنە ءوزى دە سەنە الار ەمەس. ەندى ءوزىڭىز ويلاپ كورىڭىز. وڭاي ەمەس. كەرەمەت جەتىستىك. جەڭىس جولىن جالعاستىرادى دەپ سەنەمىن.

– ماكسيمنىڭ العاش جاتتىعۋعا كەلگەنى ەسىڭىزدە مە؟

– Əرينە. 2005 جىل بولاتىن. بويى كىشكەنتاي, ارىق ەدى. بىراق, وتە ەڭبەكقور-تىن. جاتتىعۋدان جالىقپايتىن. قيىندىقتان قاشپايتىن. وزگەلەردەن ەرەكشە بولدى دەپ ايتا المايمىن. دەگەنمەن تاباندىلىعىنىڭ, توزىمدىلىگىنىڭ, ءوز ەڭبەگىنىڭ ارقاسىندا وسىنداي جەتىستىككە جەتتى. شəكىرتىم ءۇشىن قۋانىشتىمىن.

– ماكسيمنىڭ جەتىستىگى ەلىمىزدە بياتلوننىڭ دامۋىنا قانشالىقتى سەپتىگىن تيگىزەدى دەپ ويلايسىز؟

– مىنا ءبىر جايتقا نازار اۋدارايىق, قازىر جۇرت بالالارىن قىسقى سپورتقا كوپ əكەلەدى. قول استىمدا 70-كە جۋىق ءجاسوسپىرىم جاتتىعىپ ءجۇر. بۇل كوزقاراستىڭ وزگەرگەنى. ال ماكسيمنىڭ جەڭىسىنەن كەيىن جۇرتتىڭ قىزىعۋشىلىعى ودان سايىن ارتا تۇسەتىنىنە سەنىمدىمىن. وتكەنگە كوز جۇگىرتىپ كورەيىكشى, وسىدان 10 جىل بۇرىنعى جاعداي مۇلدە باسقا ەدى. بياتلونعا قاجەتتى سپورتتىق قۇرال-جابدىقتار جوق بولاتىن. قازىر جاعدايىمىز جاقسارىپ كەلەدى. مەملەكەت تاراپىنان جۇمىستار جاسالدى. ششۋچينسكتە سپورتتىق بازا سالىنىپ جاتىر. ىسكە قوسىلعانىن اسىعا كۇتىپ ءجۇرمىز. دۇرىس جولدا ەكەنىمىز انىق. تالاي چەمپيونداردى تəربيەلەيمىز, بۇيىرتسا!

اتا-اناسى مەن باپكەرلەرىنىڭ كوز قۋانىشىنا اينالعان ماكسيم براۋندى قازاقستاندىق ماماندار بولاشاعى زور سپورتشى دەپ توپشىلاپ وتىر. كەلەر جىلى وليمپيادا ويىندارىندا ەلىمىزدىڭ نامىسىن ابرويمەن قورعايتىن سپورتشىنىڭ ءبىرى دەيدى. ال العاشقى ماقتاۋىن ەستىپ, ەل نازارىنا تۇسكەنىن ءبىلىپ جۇرگەن ماكسيم قازىر, بۇل جەتىستىكپەن شەكتەلىپ قالماي, كەلەسى كەزەڭدەرگە كۇش سالادى. ايتا كەتەيىك, بياتلوننان الەم كۋبوگىنىڭ العاشقى كەزەڭى 3 جەتوقسانعا دەيىن جالعاسپاق. ءبىز, ارينە دە ەستەرسۋندتان ەلەڭ ەتكىزەر تاعى ءبىر جاعىمدى جاڭالىق كۇتەتىن بولامىز.

ەركەبۇلان جومارت,

«ەگەمەن قازاقستان».