ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەردى جۇزەگە اسىرۋ اياسىندا تاراز قالاسىنداعى «بالاساعۇن» ورتالىق كونتسەرت زالىندا مادەنيەت قايراتكەرى, «قۇرمەت» وردەنىنىڭ يەگەرى, كومپوزيتور دۇيسەنالى بىقىباەۆتىڭ ء«ان-عۇمىر» اتتى شىعارماشىلىق كەشى ءوتتى.
شىعارماشىلىق كەشتىڭ شىمىلدىعى كومپوزيتوردىڭ «بابالار رۋحى», «جۋساندى دالا» اتتى كۇيلەرىمەن اشىلىپ, اتالعان شىعارمالاردى ديريجەر مۇحتار راحمانقۇلوۆ جەتەكشىلىك ەتكەن قازاق ۇلت-اسپاپتار وركەسترى ورىندادى. دۇيسەنالى بىقىباەۆ ء«بىز ەكەۋمىز», «ەلىكتەي ەركە قىز», «اعايىن» جانە باسقا دا اندەرىمەن تىڭدارمان قاۋىمعا بەلگىلى. مارفۋعا ايتحوجينا, ءابدىراحمان اسىلبەكوۆ, جاڭىل اسىلبەكوۆا سياقتى بەلگىلى اقىندارمەن شىعارماشىلىق بايلانىستا بولعان كومپوزيتور شىعارماشىلىعى بۇل كۇنى ەلىمىزگە تانىمال انشىلەردىڭ ورىنداۋىندا اۋليەاتا اسپانىندا قالىقتادى. دوسىمجان تاڭاتاروۆ, سايات مەدەۋوۆ, گۇلنۇر ومىرباەۆا, ءادىل سلامحان, دانا ماحانباەۆا, ايگۇل ماقاشەۆا, مارالبەك باباقۇلوۆ, عاني ماتەباەۆ جانە وزگە دە ونەر يەلەرى كومپوزيتوردىڭ اندەرىن ناقىشىنا كەلتىرە ورىنداپ, كورەرمەننىڭ قوشەمەتىنە بولەندى.
قۇلان توپىراعىنىڭ تۋماسى, ومىردەن ەرتە وزعان دارىندى كومپوزيتور مەلس وزبەكوۆتىڭ قازاقتىڭ ءان تاريحىنداعى ورىنى ايرىقشا. وسى ورايدا ءسوز العان كەش يەسى حالىققا ءوزىنىڭ مەلستەي ونەر يەسىنىڭ رۋحاني شاكىرتى ەكەنىن جەتكىزىپ, رۋحاني ۇستازىنىڭ «كەلشى, ايىم» ءانىن قاسيەتتى دومبىرامەن ورىنداپ بەردى. سونداي-اق مەلس وزبەكوۆتەن قالعان قاسيەتتى قارا دومبىرانى دوسىمجان تاڭاتاروۆقا تارتۋ ەتتى. ال گۇلنۇر ومىرباەۆانىڭ ورىنداۋىنداعى كومپوزيتوردىڭ «مەلستى اڭساۋ» ءانى كورەرمەننىڭ ىقىلاسىنا بولەنىپ, حالىقتىڭ پەرزەنتىنە دەگەن ساعىنىشىن كورسەتتى. بۇل ءان تىڭدارماندارعا قۇلاننان ەسكەن قوڭىر ساز سياقتى اسەر ەتىپ, كوپشىلىك كوڭىلىنەن شىقتى. شىعارماشىلىق كەش سوڭىندا كونتسەرتكە قاتىسقان انشىلەر «جاسا ماڭگى, استانا» ءانىن ورىندادى.
حاميت ەسامان,
«ەگەمەن قازاقستان»
جامبىل وبلىسى