كەنشىلەر قالاسىنداعى كەزدەسۋ

قۋاتتىلىعى جونىنەن دۇنيە جۇزىنە ءمالىم سوكولوۆ-سارىباي كەن ءوندىرۋ بىرلەستىگى كەن وندىرە باستاعان وتكەن عاسىردىڭ ورتاسىندا ىرگە تەپكەن  رۋدنىي قالاسىندا تاۋەلسىزدىككە دەيىن قازاقتاردىڭ سانى 2 پايىز عانا بولاتىن. قازاق تىلىندە ءبىلىم بەرەتىن مەكتەپ اتىمەن جوق ەدى. ال قازىر قالادا جاس ۇرپاقتى ءبىلىم نارىمەن سۋسىنداتىپ وتىرعان ءۇش قازاق مەكتەبى بار.

– ەركىندىكتىڭ لەبى ەسكەن جىلدارى يماندى بولعىر ۇلتجاندى ومار تورتباەۆ   اقساقال قازاق مەكتەبىن اشۋ ءۇشىن بۇكىل قالانى جاياۋ ارالاپ, ءار ءۇيدىڭ ەسىگىن قاعىپ ءجۇرىپ, 12 بالا جيناعان بولاتىن. سول 12 بالادان ءبىر سى­نىپ, ودان 1993 جىلى وسى باس­تاۋىش قازاق مەكتەبى اشىل­دى, ول ورىس مەكتەبىندە ورنالاستى. قيىندىقتار بول­دى, العاشقى كەزدە وقۋلىق­تىڭ, مۇعالىمدەردىڭ جەتىس­پەۋ­شى­لىگىنەن «قازاق مەكتەبىندە ءبىلىم جوق» دەگەن  سەنىمسىزدىكتەر دە ورىن الدى. قازىر سونىڭ بارلىعىن دا ارتقا تاستادىق, –  دەدى قايىرجان نۇرماعامبەتوۆ.

ايتسا ايتقانداي, №15 قازاق ورتا مەكتەبى قازىر كورسەتكىشتەرى جونىنەن  سوڭعى ەكى جىلدا كەنشىلەر قالاسىنداعى  جالپى ءبىلىم بەرەتىن جيىرما مەكتەپتىڭ اراسىندا ءبىرىنشى ورىنعا يە ەكەن.

– قازىر باسەكە وتە كۇشتى, مۇن­داي جەتىستىككە جەتۋ وڭاي ەمەس. مۇعالىمدەر سوڭعى جىلداردىڭ ىشىندە 37 ادىستەمەلىك اۆتورلىق جۇمىس جازدى. بيىل تاعى دا بەس اۆتورلىق ادىستەمەلىك جۇمىس دايىنداپ جاتىر. مۇنىڭ بارلىعى بالانىڭ ءبىلىم ساپاسىن كوتەرۋگە قىزمەت ەتەدى, – دەدى ديرەكتور.

– «قازاق مەكتەبىندە ءبىلىم جوق» دەگەن  ۇشقارى ەستىلىپ قالاتىن پىكىرگە  ايتارىم بار ەدى. ورىس بالاباقشاسىنا بارعان بالانى اتا-انالار قازاق مەكتەبىنە بەرەدى. ال ۇيدە بۇلدىرشىنمەن وزدەرى قازاق تىلىندە سويلەسپەيدى. ءتىلى ورىسشا شىققان بالا قازاق ءتىلىن مەڭگەرگەنشە قينالادى. تورعاي وڭىرىنەن ءۇش جۇزگە جۋىق عىلىم دوكتورلارى مەن كانديداتتارى, جازۋشىلار, قازاقتىڭ بەلگىلى تۇلعالارى شىققان ەكەن. سولاردىڭ بارلىعى دا قازاق مەكتەپتەرىندە وقىپ, ءبىلىم الدى. تورعاي وڭىرىندە ورىس مەكتەبى جوقتىڭ قاسى, ال باسقا اۋدانداردا وسىنداي كورسەتكىشتى ەستي المايمىز,  – دەدى مەكتەپتەگى  كەزدەسۋگە بىرگە بارعان بەلگىلى اقىن, فيلولوگيا عىلىمدارىنىڭ كانديداتى, ىبىرايتانۋشى سەرىكباي وسپانوۆ.

مەكتەپتىڭ عيماراتى و باس­تا ورىس مەكتەبىنەن بوساتىلىپ بەرىلگەن ەكەن.   كوپ جىلداردان بەرى توزىپ تۇرعان عيماراتقا ەكى-ءۇش جىل بۇرىن  كۇردەلى جوندەۋ جۇمىستارى جۇرگىزىلىپتى. قازىر ءبىلىم ۇياسىنىڭ ءىشى كەڭ سارايداي قايتا جابدىقتالعان. ۇستازدار مەكتەپكە بالا سىيماي, قازىر  1100 وقۋشى  ەكى اۋىسىمدا وقيتىنىن, سونىڭ سالدارىنان بەس كۇندىك وقۋ كەستەسىنە دە اۋى­سا الماي وتىرعاندىقتارىن تىلگە تيەك ەتتى. قيىندىعى بولسا دا, وقۋشىنىڭ كوپتىگى كوڭىلگە قۋانىش ۇيىرەتىندەي.  

مۇنان كەيىن   ۇستازدار مەن اتا-انالارعا باس باسىلىمنىڭ تاريحى, بۇگىنگى اتقارىپ وتىر­عان قىزمەتى تۋرالى ايتىلدى.  ءبىر عاسىرلىق تاريحى بار باسىلىم قاشاندا الدىمەن ۇلتتىڭ مۇددەسىن مۇڭداپ, جوعىن جوقتاپ كەلەدى. گازەت بەتىنەن ورىن الاتىن الەۋمەتتىك ماسەلەلەر ىشىندە ءبىلىم سالاسىنا قاتىستى ماتەريالدار ۇلەسى ارتقانى ءسوز بولدى. كەزدەسۋگە جينالعاندار بالاباقشاعا بالالارىن ورنالاستىرا المايتىنىن, كەزەكتىڭ تىم ۇزاقتىعىن, وزبەكستاننان كەلگەن اعايىنداردىڭ تولقۇجات­تارىن تاپسىرۋدا قيىندىق بولىپ وتىرعانىن ايتتى.

وقىرماندار  ايتقان ءما­سە­لە­لەردىڭ ءبىرسىپىراسى گا­زەتىمىزدە بۇرىن دا كوتەرىلگەن بولاتىن. ولار ايتقان پىكىر­لەر قاشاندا ماڭىزدى ماقا­لالاردىڭ وزەگى بولارى ءسوزسىز. مەكتەپ مۇعالىمدەرى روزا جار­قىنبەكوۆا, جوعارى ساناتتى مۇعالىم سايران ءومىرجانوۆا گازەتتەگى «ءتالىم» بەتىنە قا­تىس­تى جاقسى پىكىرلەرىن ءبىلدىردى. وزدەرىنىڭ دە ايتارى بار ەكەنىن, ماقالا دايىنداپ جاتقانىنان حاباردار ەتتى. مەكتەپتىڭ دە, گازەتتىڭ دە باعىتى ەلدىڭ بولاشاعىن ويلاۋ, ۇلتقا قىزمەت ەتۋ ەكەنىن تۇسىنىسكەن باسقوسۋ بولدى.

ءنازيرا جارىمبەت,

«ەگەمەن قازاقستان»

قوستاناي وبلىسى,

رۋدنىي قالاسى