ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىننىڭ توراعالىعىمەن ۆەدومستۆو جانىنداعى ءدىني بىرلەستىكتەرمەن بايلانىس جونىندەگى كەڭەستىڭ كەزەكتى وتىرىسى ءوتتى. وعان ءدىني بىرلەستىكتەردىڭ, قازاقستان حالقى اسسامبلەياسىنىڭ, مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى, سونىمەن قاتار ءدىنتانۋشى-عالىمدار, قوعام قايراتكەرلەرى قاتىستى.
كەزدەسۋ بارىسىندا ايماقتىق ءدىب جانە ءدىن پروبلەمالارىن زەرتتەۋ ورتالىقتارىمەن جۇرگىزىلىپ جاتقان اقپاراتتىق-ءتۇسىندىرۋ جۇمىستارى تۋرالى, سونداي-اق پاۆلودار وبلىسىنىڭ ءدىن ىستەرى جانە قىزىلوردا وبلىسىنىڭ ىشكى ساياسات باسقارمالارى باسشىلارىنىڭ ايماقتىق اقپاراتتىق-تۇسىندىرمە توپتارىنىڭ جۇمىسى تۋرالى ەسەپتەرى تىڭدالدى.
ءدىن ىستەرى جانە ازاماتتىق قوعام مينيسترلىگىنىڭ وكىلدەرى تۇرعىندار اراسىندا اقپاراتتىق ءتۇسىندىرۋ جۇمىستارىن وتكىزۋدىڭ ماڭىزدىلىعىن اتاپ ءوتتى. ولاردىڭ ايتۋىنشا, شارا بارىسىندا حالىقتىڭ كەڭ اۋقىمدى الەۋمەتتىك توپتارىنا, ءبىرىنشى كەزەكتە جاستاردىڭ ءتۇرلى ساناتتارىنا دەسترۋكتيۆتى جانە راديكالدى ءدىني اعىمداردىڭ جاعىمسىز ءمانىن, قاۋپىن اشا وتىرىپ جاستاردىڭ بويىندا جات يدەولوگياعا قارسى يممۋنيتەت قالىپتاستىرۋ بويىنشا الدىن الۋ شارالارى قابىلدانۋدا.
جيىن سوڭىندا كەڭەس مۇشەلەرى كوتەرىلگەن ماسەلەلەر تۋرالى تۇرعىندارمەن اقپاراتتىق ءتۇسىندىرۋ جۇمىستارىن جۇرگىزۋدىڭ تيىمدىلىگىن ارتتىرۋ, ءدىني ەكسترەميزم مەن راديكاليزمنىڭ الدىن الۋ ءۇشىن ۇكىمەتتىك ەمەس ۇيىمداردىڭ الەۋەتىن پايدالانۋ باعىتىندا بىرقاتار ۇسىنىستار جاسادى.