جاڭعىرۋ جولىنداعى پورتى بار كاسپي تەڭىزىندە ەلىمىزدىڭ كوك تۋىن جەلبىرەتىپ, ساپار شەگەر سۋ كولىكتەرىنىڭ دە قاتارى ارتىپ كەلەدى. وتاندىق فلوت بىرلىكتەرىن ۇلعايتۋدى كوزدەيتىن «قازتەڭىزكولىكفلوتى» ۇلتتىق تەڭىز كەمە قاتىناسى كومپانياسى بۇل باعىتتا زاماناۋي قۋاتتى بۋكسيرلەرگە قول جەتكىزۋدى ماقسات ەتىپ وتىر.
اقتاۋ پورتىنا «ەمبى» جانە «تالاس» اتتى ەكى بۋكسير سالتاناتتى جاعدايدا كەلىپ جەتتى. ۇزىندىعى 27 مەترلىك, ەنى 9 مەترلىك بۋكسيرلەر گوللانديادا جاسالعان. ولار سولتۇستىك كاسپيدىڭ تاياز اۋداندارىندا جۇمىس ىستەپ, وبەكتىلەر مەن كەمەلەردى سۇيرەۋ, زاكىرلەردى بۇراۋ جانە وڭدەۋ, كەمەلەرگە اسسيستەنتتىك قىزمەت كورسەتۋ, ناۆيگاتسيالىق كومەك كورسەتۋ, سونداي-اق باسقا دا قوسالقى كەمە مىندەتتەرىن ورىندايدى.
بۇل بۋكسيرلەرگە ءتان ەرەكشەلىكتەردىڭ ءبىرى – جۇمىس جۇرگىزۋ ايماعىندا تەرەڭدىگى شەكتەۋلى جاعدايدا قۋاتتىلىعىنا قاتىستى جوعارى تالاپتاردىڭ قويىلۋى جانە كەمە ولشەمدەرىنىڭ شاعىن بولۋى. كەمەلەر «قازتەڭىزكولىكفلوتى» ۇلتتىق تەڭىز كەمە قاتىناسى كومپانياسى» جشس-ءنىڭ, «Damen» كەمە قۇرىلىسى كومپانياسى جانە Al Hilal يسلام بانكى اراسىندا جاسالعان ءۇش بۋكسيردىڭ قۇرىلىسىن قارجىلاندىرۋ تۋرالى شارتقا سايكەس ىسكە اسىرىلۋدا. ءۇشىنشى بۋكسيردىڭ قۇرىلىسى 2018 جىلى اياقتالادى دەپ كۇتىلەدى.
باس كەڭسەسى نيدەرلاندتا, گورينحەم قالاسىندا ورنالاسقان «DAMEN Shipyards Group» حالىقارالىق كەمە قۇرىلىسى توبى 40-قا جۋىق كەمە قۇرىلىسى جانە كەمە جوندەۋ وندىرىستەرىن بىرىكتىرىپ وتىر. بۇگىنگە دەيىن بۇكىل الەم بويىنشا 6 مىڭنان استام كەمە جاسالعان, جىل سايىن 160-قا جۋىق جاڭا كەمەنى پايدالانۋعا بەرەتىن كومپانيادا قازىرگى تاڭدا الەم بويىنشا 9 مىڭ ادام ەڭبەك ەتۋدە.
«DAMEN» بۋكسيرلەردى, كاتەرلەردى, پاترۋلدىك, جوعارى جىلدامدىقتى جانە جۇك كەمەلەرىن, تەڭىز پلاتفورمالارىنا قىزمەت كورسەتۋگە ارنالعان كەمەلەردى, مۇنايدىڭ اپاتتىق توگىلۋىن جويۋعا ارنالعان كەمەلەردى, فرەگاتتار مەن ءىرى ياحتالاردى جوبالاۋمەن جانە ولاردىڭ قۇرىلىسىن جۇرگىزۋمەن اينالىسادى.
– «قازتەڭىزكولىكفلوتى» جاڭا كەمەلەردىڭ قۇرىلىسىن جۇزەگە اسىرۋ ارقىلى دامۋ ستراتەگياسىن جۇيەلى تۇردە جانە كەزەڭ-كەزەڭمەن ىسكە اسىرادى, ال بۇل كاسپي تەڭىزىنىڭ قازاقستاندىق سەكتورىن يگەرۋ بويىنشا جوبالار شەڭبەرىندە كومپانيا ۇسىناتىن قىزمەتتەر اياسىن كەڭەيتە تۇسەدى», دەدى سالتاناتتى راسىمدە «قتكف» جشس باس ديرەكتورى مارات ورمانوۆ.
جوبانى قارجىلاندىرۋشى Al Hilal يسلام بانكى 7 جىلدان استام ۋاقىت بويى قازاقستاننىڭ ەكونوميكاسىنا قارجى قۇيىپ, كورپوراتيۆتىك كليەنتتەرمەن جانە ۇلتتىق كومپانيالارمەن تابىستى جۇمىس جۇرگىزىپ كەلەدى. «بانكىمىز ءتۇرلى سالالارداعى, ونىڭ ىشىندە مۇناي-گاز سەكتورىنداعى جوبالاردى قارجىلاندىرادى.
«قازتەڭىزكولىكفلوتى» جشس ءۇشىن بۋكسير كەمەلەرىنىڭ قۇرىلىسىن قارجىلاندىرۋ كاسپي قايراڭىنداعى كەن ورىندارىنا قولداۋ كورسەتۋ, جالپى ءوڭىردىڭ دامۋى ءۇشىن ەڭ ماڭىزدى جوبالاردىڭ ءبىرى سانالادى», دەيدى بۇل تۋرالى Al Hilal يسلام بانكى اق باسقارما توراعاسى گوردون حاسكينس. كوك تۋدى سالتاناتپەن كوتەرىپ, كوك تەڭىزگە بەت قويعان كەمەلەر كوپ ۇمىتتەردى ارقالاپ بارا جاتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
سۋرەتتەردى تۇسىرگەن
سەرىك مايەمەروۆ