بۇگىن قازاقستان پرەزيدەنتى نۇرسۇلتان نازارباەۆ رەسمي ساپارمەن بەلارۋس رەسپۋبليكاسىنىڭ استاناسى مينسك قالاسىنا باردى.
پرەزيدەنتتىڭ ەكى كۇنگە جوسپارلانعان ساپارى اياسىندا نۇرسۇلتان نازارباەۆ ۇجىمدىق قاۋىپسىزدىك شارت ۇيىمى ۇجىمدىق قاۋىپسىزدىك كەڭەسىنىڭ مەرەيتويلىق سەسسياسىنا, قازاقستان-بەلارۋس بيزنەس فورۋمىنا جانە باسقا دا ءىس-شارالارعا قاتىسادى دەپ جوسپارلانعان.
ءبىر ايتا كەتەرلىگى, قازاقستان مەن بەلارۋس اراسىندا ءارتۇرلى سالالار بويىنشا 70-دەن استام كەلىسىمشارتتار جاسالعان. ال ەكى مەملەكەت اراسىنداعى ديپلوماتيالىق قارىم-قاتىناستىڭ ورناعانىنا بيىل 25 جىل بولدى. قازاقستان تمد ەلدەرى ىشىندە بەلارۋس رەسپۋبليكاسىنىڭ نەگىزگى ساۋدا سەرىكتەستەرىنىڭ ءبىرى سانالادى. ەلىمىزدىڭ ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتتەرى بويىنشا, بىلتىر ەكى ەل اراسىنداعى ساۋدا اينالىمى 364,5 ملن دوللاردى قۇراعان. ال 2017 جىلدىڭ قاڭتار-تامىز ارالىعىندا بۇل كورسەتكىش 375,6 ملن دوللارعا جەتتى.
ەلباسى نۇرسۇلتان نازارباەۆ بۇعان دەيىن بەلارۋس ەلىنە 2012 جىلدىڭ مامىر ايىندا رەسمي ساپارمەن بارعان ەدى. ال الەكساندر لۋكاشەنكو قازاقستانعا رەسمي ساپارمەن 2013 جىلى كەلدى.
ەستەرىڭىزگە سالا كەتسەك, نۇرسۇلتان نازارباەۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن وسى جىلدىڭ 8 ماۋسىمىندا شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسى اياسىندا كەزدەسىپ, ەكىجاقتى سەرىكتەستىكتىڭ ماڭىزدى ماسەلەلەرىن تالقىلاعان بولاتىن.
گۇلنۇر قۋانىشبەكقىزى,
"ەگەمەن قازاقستان"
مينسك